Unau piangkhawm 3 (pasal 2 & numei 1) laka upapen Tg. Ginmuanlian 2017 kum in Delhi hongtung hi. A’ pa Phamsa Pa Lallianzem, a nu Ngaizaning. EBCC Dorcas Veng a hong kipan; Delhi a tuailai pawl, BCD & WT a kizang lai, sinna sangzaw zom di’a SAIACS, Bengaluru 2020 kum a na zuan; EBCC Delhi Theological Scholarship hamphatpih kawma, tukum April 9 a M.Th. in Pastoral Theology and Counselling (PTC) zoukhia ahi. Amah April 13 ni in innlum (Lamka) na tung touta. Tg GML leh DEW saite houlimna saulou:-
1. Lian, M.Th. in Pastoral Theology and Counselling (PTC) 2 yrs course SAIACS Bengaluru apan zoukhia a Apr 9, 2022 (Kiginni) - Lukhunelkaai khuksak hun online tungtawn a na uap di'a Saptuamte na cialna a kimuh in kipahna sousang hi. Hiai ni & hun a na feeling (kipah zia) sau lou in n'on gen thei dia'm? Na grade muhdan la...
DAWNNA: A masapen in hiai tan honpi Toupa tungah kipahthu ka gen hi. Banah, Saptuamte’n thuumna leh lam chituam tuam a na hon panpihna ziak un ka kipak petmah hi.
Ka graduate khiak ni in ka kipak petmah a, ka puakgik (laisimna lam a) te beivek mah bang in ka lungsim a nuam mahmah hi. Banah, ka hinkhua ka ngaihtuah kik a, Pathian hon pina leh ompihna ten ka lungsim a luahdim a, ka lungsim a nuam mahmah hi.
Ka graduate ni in zoukhia ka hihdan theihpihna certificate hong pia ua, marksheet te ahihleh awl a post a honkhak ding uh chih ahi a, huai ma kithei chianlou hi.
2. M. Div. zou a, tua khit a M.Th course la tou hi'n k'on thei. Ana kikhoukhiak viau hia? Na zil sung, na hun zat dan tangpi, Tuailai & naupang lai simlaite mitsuan deuh in...
DAWNNA: Master of Divinity (MDiv) leh Master of Theology (MTh) ana kikhoukhiak petmah hi in ka mu. Sim ding, gelh ding leh theih ding a tam petmah a, SAIACS ah ahihleh college dangte banglou in Module system a zat ziak un khateng a hahpan gige poimoh hi.
3. M. Th. Pastoral Theology and Counselling (PTC) course zil di bang in hon lunglut sak ahia? Na zil sung in kisiik sim hun om kha zenzen hia? Omleh bangci'n tha na la a?
DAWNNA: Ka lungsim a ka put gige ahihleh, laisim lai i hihleh laisim mah pibawl ding, hoihtak a zohkhiat ngeingei ding, thildang tuamtuam te ziaka i laisim bah (down) di i hihleh thildang te koihkhiat a, laisim pen (primary purpose) poimoh pen a koih ding ahi. Banah, thuumna leh Pathian muanna, Amah toh kinaih gige poimoh ka sa mahmah hi.
4. M. Th. zil sunga na phutkhak haksa sak sim & nang hon kipak sak giugiau a om di e. Omleh, TOUPA min thupina di'n na hon gen dia'm?
DAWNNA: Ken Pastoral Theology and Counselling (PTC) course ka lak ziak ahihleh Pastor ka lunglutna (tup) ahih banah counseling lam bang ka lunglutna ahihziak ahi. Ka laisim sung in haksatna tampi ka tuak a, pandemic ziak in online course in ka pan ua, classroom learning toh chu a kikhai mahmah mai hi. Banah, innsung buaina leh lunggimna tuamtuam te tuahkhak ka nei tham a, himahleh Toupa hatna leh panpihna ziakin ma ka suan thei zelzel hi.
5. Secular line a pai thei, theology line na zuihna ziak - testimony saulou n'on gen dia'm? Simtu, tuailai leh naupang lam in a theih uh hoih kha di hi maw..
DAWNNA: Class 12 ka zoh in ka innkuan leh tanau khenkhatte’n secular line zil sunzom a, govt sepna khawng zong ding in hon hasuan mahle uh ke’n bel Pathian nna sep ka tup tinten ziaka theology line ana zui ka hi.
6. SAIACS Bengaluru a na om sunga na sinkhiak a tam di e. Point 3 tan hon-gen in. Maban lam ah bang tup-le-ngim na nei?
DAWNNA: SAIACS, Bengaluru a ka om sung in ka zilkhiak tampi a om a, huaite lakah lawm-le-vual polhna ah lungsim piching tak a michih ahihna bangbang ua theihsiam (understanding) ding, eimah deihdan leh muhdan kia enlou a, midangte' muhdan leh ngaihdan muhpih dan kisin ding, banah Pathian a muanna koih kawm a, michih tungah kiniamkhiatna leh itna toh sep (serve) ding.
Maban ah Pathian panpihna leh deihsakna toh Pastor nna a Toupa nasep ding ka tup ahi. Toupa kiang ah hon thuumpih zelzel lai un.
7. EBCC Delhi in Scholarship abawl zal zou kha na hihna ah phatuam na sakna dan leh, hiai scho tawh kisai kup beh nop om hiam... Simtute bang vaikhah nop na nei a...
DAWNNA: A tawppen ding in, EBCC Delhi in Scholarship a bawl zalzou kha ka hi a, hiai ziak a ka laisim sunzom leh zou thei ka hihman in phatuam ka sa petmah hi. Noute (Saptuam te) ziaka M. Th. zoukhe thei ka hi a, noute ziakin Toupa tungah kipahthu ka gen hi.
Toupa ei toh tonkhawm ahi a, Amah kiangah i buaina leh haksatna, i lunggulh te gen in Amah muang in om le’ng, Toupa’n A’ thupihna hon musak zelzel ding ahi.
Simtute, Toupa’n hon vualzawl chiat hen! Ka kipak.
