JESU HONG PIANG: A pianma kum za sagih paita in Jesu pian ding Jawlnei-te’n na gen khol uhi. A gen bang un a hunbi hong kim in numei suan in, pasal chi tellou in, nungak siangthou Mari naubawm zang a pai a om tuh Bethlehem bawngbuk sung ah hong piang in, gan an piakna kuang ah sial in om hi. Jawlnei ten a pian ding a na genkholh lai un a min ding zong na gen khin ua, amin apan a sep ding zong kilang thei hi. A paaitu ding nungak siangthou Mari, Pathian sawl Angel Gabriel in a hel lai in naungek dinmun ding hichi in gen hi, “Amah milian a hong hiding a, Tungnungpen Tapa a chi ding uh; Toupa Pathian in a kiang ah a pu David tutphah a pe dia. Jacob suante tung ah khantawn in a lal dia, a gam in bei ni a neikei ding hi”(Lk.1:32-33). Hiai bang dinmun a ding ding’ naungek paaitu a ding in zong kisaktheihna tham ding ahi. Himahleh Mari in bel “Toupa sikhanu ka hi, na thu bang zel in ka tung ah tung hen” chi’n kiniamkhiatna toh Toupa sawl Angel Gabriel chialna na mang hi.
VUALZOU A JERUSALEM LUTNA: Jawlneite genkholhsa mah bang in sabiltung nou kuamah tuan ngei nailouh na a tuang in thu nuailut leh kingainiam tak in Jerusalem khopi ah lut hi. Huai mun a mipi tampiten “Toupa min a kumpipa hong pai tuh a hampha, tung nung pen ah Hosanna” chi a kikouna thawm thupitak ban ah a paina ding lampi ah a puante uh phah uhi. Puan phah ding neilou ten zong singsawl la in lampi ah phah uhi. Pahtawina thupi tak toh Jerusalem zuan a’ a pai lai in, Jerusalem khopi dinmun leh tunung chiang a’ a thuak pah ding thilte mukhol ahihman in poisa in kah khum hi. Leitung mihng ten i thuak ding Pathian thangpaihna mulkim huaitakte Toupa Jesun muchian zaw, thei chian zaw in hon awlmoh gige hizaw hi. Huaiziakin pahtawina thupitak toh vualzou a na lungsim sung a Jesu hong lut theihna ding in na lungsim kong khak hong inla, amah vaidawn ding in kisa in a kikhel ma in.
GOOD FRIDAY NI AH: Palm Sunday toh a kibang nawn kei ngei mai, Ningani zan a Jerusalem pindan tung nung a nungzuite toh nitak ankuang a umlai ua, a tanghou diah pih pa nungzuite lak a ngei in dangka sawmthum deihna ziak in a heutupa mansak tu in a hong pang ta mai hi. Mat a hong om a kipan a tungthu ngihtuah ding in Siampu liante kiang bang, kumpi vaihawm gam ukpa’ Pilat leh Herod-te kiang bang ah paipih in om zel hi. Hiai gam ukpa nihte’ et chetna leh thudotna ah sihna khop khelhna gentak louh vuak leh satna ding khop khelhna leng a mu kei tuaktuak uhi. Huaiziakin Kumpi pa Pilat in tuh ka zep dia ka hon paisak ding amah a khelhna ka mukei a chi hi. Himahleh hazatna ziak in Siampulian leh vaihawm pawl ten tuh mipite tokthou in “Kross ah kilh lum in, Kross ah kilh lum in” chi in a kikou sak ua, Barnaba hon khah inla Jesu Khrist kilhden in, amah nakilhden kei leh Kaisar lawm na hi theikei ding,Kaisar lou ngal kumpi dang ka nei kei uh, hiai mi kumpi a a kibawl ziakin Kaisar dou ahi” chi’n mipi a kikou zuazua uhi. Palm Sunday ni a kikoute khong mah good Friday a kikoute ahi zel ding uam. Amah zuaktu leh dangka a khong tu zaw mun dang gamlapi a kipan hilou in, a nungzuite lak a mi mah ahi bang in Pathian vualzawlna tampina tan deih khoplou a diklou tak a zuaktu a pang lailai khong i hi kha ding uam, kivel ni, ki-enchain ni, hun omlai in kibawl pha mengmeng ni, a kikhel ma in.
JESU THAH A OM PEN MAH AHI A THOU NAWN: Melmate’n a soisak lai ua daidide a kam khat a leng dawnglou, kumpipate mai a leng a siamna thu kam khat leng genlou, moh loupi mohpaih a om hun a leng a dikna thu genlou, vuallel tak a kross a khai kang a om pan’ kei leh nang khelhna a puak ziak a mohpaih a om, siamlouh tan a om ahi chih na thei chian ta hia? Hiai Jesu pen mah ahi han a vui a om a nithum ni a han khuk a kipan vualzou a hong thou nawn. Na khelhna hon puaksak pan sihna leh han chiang kia hon tut sawm hilou in, sihna leh han thil hihtheihna khenlam a vualzou a hon thohpih ding pa leng hilai ahi. Amah mah ahi itna ziak a hon tanpa, hehpihna toh honkempa, hon vualzoh pih dipa.
MISIANGTHOUTE LA DING A HONG PAI NAWN DING: Toupa Jesu toh i kisaina ah a nasep ding omlai tuh a tatsa misiangthoute la ding a hong pai nawn ding leh thukhenna ni a vaihawm ding, kelnam leh belam nam khen ding a hong pai na ding, sep thaman kipahman hawmna leh setan leh a nungzuite tangtawn mei mit theilou a tangtawn gawtna pe dia hong pai nawn na hita ding hi. Hiai tengteng thu genkholh a tung nailou, tunung chiang a hong tung ngeingei ding thu ahi. Jesu’n kipahman pedia hong pai chiang in bang zah san ding na neita dia? Nang kiang‘ hih hoih a hon chi diam?
