Leitung pian tung apan a tung ngei nai lou, tunung a leng a tung ngei nawn louding, mitphiat kal khat sung a leitung mun chih a hong tung ding, thutang lamdang, lung phon huai, dipkuan huai thu lung jinhuai tuam tuam a sim seng louh et seng louh khop Televisionte, WhatsApp groupte, Facebookte leh huihkhua zang a kithuzak tuahna teng teng a luah dim ni chiang in nang a simtu, a suahtu leh a buaipihtu in na pang lai diam? A hih keileh koi a om hiam chi a na inkuan, tanau lainate zon leh kan in na om zaw diam? Pathian in a Laisiangthou zang a hon hilhkholhnate tang tung tou tou ahihman in hiai RAPTURE leng khat vei tei hong tung ding hi. Leitung thu thangte lah galgim nam pian pian ta, khovel galmuanna deng del huai huai ding bang ta,kumpi vaihawmte lah lal utna leh thuneih utna lian deuh deuh, a mau hun bei nung a leng ka hun beita midang hun ding hita chithei tawm deuh deuh itna, lainatna, hehpihna leh kideihsakna chihte om nawn lou in, huhamna leh siatna in khovel ah intekna la in vaihawm zaw ta hi
Leitung a bem ahihman in misiangthoute lakkhawmni chiang in mun teng ah ahun leh dak kibang lou ding hi. Mun khat ah zankim lai hiding a, mun dang khenkhat ah jingkal hiding, huchibang zel in sun ahihna, zan ahihna, nitak ahihna chih bang in om veng vung ding hi. Gari hektu, lenna hektu, long hektu chih khawngte lakmang a om in, huihkhua a lenna leng lai ke ding a, tuipi a long pai lai tummang ding a,lamlian a gari tailai kiphu tuah, ken a taikhia, mi si leh liamte tanchin in internet, television, radio teng luah dim in kahna leh mauna toh kizonna hun hong tun ding hi. Nitak a inkuan kim a mahni lupna chiat zuan, jingkal a kim nawn lou, kong khak lah kihong lou, jingkal vaikuan nitak a tung nawn lou, a kuan khawmpih ten le thei tuan lou, naupang kimawl khawm laite lak a zong thakhat a mang pawl om ding. Hiai hun a. numei pasal, a neu alian inkuan kimtak a omlaite maban tuh Tangtawn gawtna meidil hita ding a hihman in a hehpih huai inkuan, a lungjin huai leh mangbat huai maban nei inkuan hita ding hi.
Huai hun chiang a leitung a omlai mihingte tuh pawl nih in kikhen thei ding hi: Pathian thu a za kha lou leh gingtu na hi kha ngei het loute leh a min a Khristian, saptuam lak a zong na tel himahleh a na piangthak loute hi ding hi.Saptuam ading a na hahpan mah mah, Department sung a mohpuakna lian leh poimoh pi pi len kha napi a piangthak kha lou. Khenkhatte lah laisiangthou bang zah vei hiam na simsuak hinapi piangthak kha lou, Khenkhat lah Pathian thu za za, chialpina leh camp khong a leng na lut zel napi piangthak lou chih bang. Hiai te lawi a ding bang in kisikna lian in huai sediak ding in gintak huai hi.
Apoi mah mah kholdiak ding tuh- Khristian na kichi, Khristian inkuan a na khang khia, biakin kai, saptuamte activities tuam tuamte a leng na kihel, ahihhang a mi theihlouh a khamtheih guih theih, tep leh muam khawlsan ngam lou, numei pasal kal thang tatna potsan ngam lou, diklou ahi chih thei gige kawm napi a nekgukna tawpsan ngam lou, thil hoih leh dik hilou ahi chih thei gige kawm napi a sepna mun a om loute, laisiangthou phallouh ahi chih a thei lou kineih a sum pung hawm hawmte. Laktouh a tel kha lou teng in leitung ah kum tamtak zang lai ding uhi. Himahleh hehpihna hun beita ding ahihman in hiamgamna in intekna lata ding a mulkim huai, chizat huai in lungkham mangbatna in dim ding hi.
Huai hun chiang in nang koi ah om in bang din mun na hi dia? Ni leh khate bei bei, hun leh kumte thak zel, nang lah lamdang tuan thei lou na hihkhak leh kivel in, patau in ahun kikel leh bang mah hih thein awn lou ding na hi. Toupa pengkul hong gin chiang in hun beina a hong hi dia, Tangtawn jing khua hoih a hong vak khe ta ding; Luigal gamnuam a leimi hotdamte kimuhkhawm chiang in, Tunglam a min sap chiang tua ah ka om ding. Meikai lou tua jing khua vak a Khrist a misite thou a, A thohnawnna thupina atan chiang un; Vandumte khena a inn ua a teelte a khop chiang in, Tunglam a min sap chiang tua ah ka om ding. Tua chiang ka lei hinkhua hong bei a ka nna ka sep zoh chiang in TUNGLAM A MIN SAP CHIANG TUA AH KA OM DING. Toupan hon sap hun hun azui thei ding in kiman chiat sawm ni.
