Pathian naih unla, aman a honnaih ding. Khialte aw, na khut uh silsiang un: lungsim bulbal neiloute aw, na lungtang uh hihsiangthou un. Haksa sa unla, lungkham unla, kapkhia un; na nuih uh kahna suak henla, na kipah uh lungkhamna suak hen. Toupa mitmuh in kingaineu un, huchi in a hon hihlian ding hi.
Jakob 4: 8-10
Tukum Saptuam thupi “Pathian Naih Un” chih pansan in, Pathian i naih theih na ding toh kisai tamlou en le hang i chi hi. I tang teel a i muh bang in Pathian i naih theih na ding in Amah lam a hih ding om bangbang Pathian in a Tapa Jesu Khrist tungtawn in zouta ahih man in, tu in eilam ah hih ding (sep ding) kisam hita hi. Pathian in a Tapa Jesu Khrist tungtawn in Kross ah eite hon naih khin ta ahihman in, i tang teel a i muh bangin eite’n Pathian naih le hang Pathian in hon naih khinsa ahih dan i muthei hi.
Pathian toh kinai tak a om pen khenkhatte a ding in lunggulh huai mahmah ahihlai in, khenkhatte a ding in hinkhua a Pathian kigolh ding lau bang a hinkhua zat khak theih hi. Kha Siangthou a om mite leh Kha in a pii mite a ding in khovel haksa leh khemna lak ah Pathian toh hunzat khawmlouh ding ngai ngamlou in hunzang in om uhi. Huchih lai in khelhna hih a taksa deihdan a khosa mite’n bel Pathian muh ding utlou leh Pathian toh hunzat ding utlou hinkhua zang in om theih hi. Hiai bang mite lak ah, koi pen in na pang kha a unau?
1. Jesu Saanna: Jesu in “Keimah lampi, thutak leh hinna ka hi; keimaha pailou kuamah Pa kiang a tungkei” a chi hi (Johan 14:6). Pathian kiang zotna lampi khat kia a om a huai lampi Jesu ahi. Huai mah bang in Pathian toh kinaih theih na ding lampi masa pen ahihleh Jesu Khrist hondampa a saanna ahi. Jesu Khrist hondampa a saanna lou in Pathian kinaih thei ngeilou ding hi.
2. Lai Siangthou Simna: Pathian hihna-te, A deihdan, leh A lungsim i theihtheih na omsun Lai Siangthou ahi. Mi khenkhat te’n mengmuhna hiam, mumang hiam, aw zakna chihte thupi ngaih mahmah in Pathian houpihna huaite tungtawn a tang in kingaihsun uhi. Himahleh i Lai Siangthou ah Pathian kilakna bukim kimuthei ahihman in, kilakna dang zong kullou hi. I Lai Siangthou in “Laisiangthou peuhmah Pathian hatkhum a piak ahi a; huaiziak in thuhilhna ding, taihilhna ding, bawlhoihna ding, diktatna lam a kichilna ding in a phatuam hi” chi in gelh hi (2 Tim. 3:16). Tua ahihman in, gingtu Pathian naih ut mite a ding in Lai Siangthou sim leh sut i neih ngeingei ding uh ahi.
3. Thuumna: Pathian toh i kihoupihna thuumna ahi. Thuumna tungtawn in Pathian i houpih thei a, a aw leng i za theih hi. Pathian toh kizopna hoih leh chidam i neih theih na ding in thuumna i ngaih poimoh mahmah ding ahi.
4. Gingtute Toh Kithuah Khawmna: Saptuam masa ten gingtute toh kithuah khawmna ana ngai poimoh mahmah uhi. Nasepte Laibu sung ah gingtute kithuah khawmna tamveipi muhtheih ding in om hi. Hun haksa i tuah lai un Pathian biakkhawmna nei theilou in i om ua, himahleh Pathian makaihna ziak in tu in neithei nawn in i omta uhi. Hiai bang a Pathian biak khawmna i neih uh ngai poimoh a khat leh khat kitungding tuahna leh kithuah khawmna hun manpha hi sak ni.
Pathian toh kinai zaw sem a hinkhua zang thei chiat ding in Aman hon vualzawl chiat hen.
