“Khenkhatte hihdan bang a i kikhopnate uh tawpsanlou in, kihanthawn chiat ni; ni hongnai hulhul a na theih un kihanthawn tuah sem un” Heb. 10:25
Simtute tengteng na vek un chibai!
A sakminthang Covid-19 hiipi hong leng a kipan kum nih val bang kikhawm ginalou in i omchiat uhi. Mipi kikhopna a om theihlouh poi mahmah a, himaleh a langkhat lam ah kikhoplouh bangle a na nuam lua zel bang hi. Kum nih nung a kikhop nawn theih liangliang a om pen kipahhuai lua petmah hinapi kipak zou taktak lou bang i na omkhak ding lauhuai hi. Covid hiipi ziaka mipi kikhopna khak a’ a om tunglai in, mimal in Toupa i bia thei a, online tungtawn inle Pathian thu i ngai thei aka chih ngaihdan i nei ua, adik mah leng hi ahi. Biakna i chih chiang in Mimal leh Pathian kikal kisai’ na petmah ahi. Himahleh biak khawmna pen gingtute adia poimoh hi a, nelhsiah theih vual ahihlouh dan Saptuam kipat tung, nasepte laibu ah chiang hun tawk mahmah hi. Pre-Covid leh Post Covid ah biakna paidan kikhek mahmah a, Media tungtawn a Toupa nasepna suk lian semsem in a om hi. Himahleh, maban a i phut khak ding ua, ka gingtak leh lauhhuai mahmah tuh, mipi biakkhawmna nelhsiah a, Pathian thu i ngaihnop leh Youtube khong ah a tam vele chi a paulam i neih khak ding uh ahi. Media ministry poimoh thamtham a, zat leng i zat phatuam ding mah hi. Himahleh kikhawm thei ding a omna pi, live in ka na en ding/ Youtube a hong kikoih khiak hun ka ngak ding chih teitei louh ding ahi. Taksa a mipi biakkhawmna, Saptuam kipat tung a’ a poimoh bangin, tuhun ah leng a poimoh dan kibang toutou lai hi.
Kikhop louh tuh zongsat baihlam mahmah hiding in ka gingta hi. I kikhop kei vanglak leh kikhop khaklouh louh in om nuam mahmah hi. Melma Satan leng hiai mun tak ah, na tangpang petmah hi ding in ka ngaihsun hi. Lockdown hunsung a kikhoplouh nuam i sakna te bang genkhawm ding hileng, gennop tampi kinei mahmah chiat ding in uphuai hi. Huchih lai in kikhop i lunggulh dan gen ding chi leng le om thou dingin ka lamen hi. Himahleh kikhop peihlouh na lungtang pen nei lian kha a, kikhop i tawpsan khak ding thil lauhhuai ahih banah Satan kipahna ahi chih phawk thak leng uthuai kasa hi.
Delhi saptuam te’n kikhopna kinei tam hetlou hi. Nipi Kalkhat sungin Pathiani (Sunday) kia in kikhopna i neithei uhi. Sepna a suty neihlouh ziaka kikhopna a telnuam mahmah, himahleh Pathianni na ngawn khawl neilouh ziaka, hong kikhawm theiloute kon phawk mahmah a, poi leng kon sakpih mahmah hi. Toupa’n na pomoh bangbang un A thu leh la in hon veh zel hen aw! Pathianni khawl a, Kikhawm thei ding a omte hampha kasa hi. Sepna nei chiatchiat i kikhopni (Pathianni) khawl kha chih pen Pathian a pan hamphatna i tantuan ahi chi’n ngaile uthuai kasa hi. Huaiziak in Toupa’n taksa damna honpiak nakleh Amah bia ding leh Amin a kalsuan ding in kisa gige leng uthuai kasa hi. Biakinn i tungzoh louh khak a, Pathian mite kithuah khawmna a i telkhak louh ding lauhhhuai sa mahmah kahi. Sam gelhtu in “Na biakin huangsung intual a nikhat om tuh mundang a ni sangkhat sang in a hoih zaw hi. Gitlouhna puaninte a om sangin i Pathian inn kongkhak ngaktu hih leng ka utzaw ahi (84:10).”
Delhi saptuam in Nipini chiangin kikhopna thumvei i neithei a kipahhuai kasa mahmah hi. Tulel in zingkal 9:30am ah mipi thumkhawmna kinei zel hi. Hiai kikhopna tuh mimal leh Pathian kal saifel na ding leh kipumpiakna ding a hunlem tak ahi. Saptuam hat leh hatlouh tehna ding in thumna kikhopna a poimoh a, ngaih leng ngaih poimoh huai petmah hi. Huan ah, Biakna kikhop dak 11:00 am leh 2:00 pm in i nei thei ua, Toupa pahtawina leh a aw zakna dinga hunlem tak hi nawn leuleu hi. Hiai hunte ah kikhawm ding, a bial in i kikhen ua, ahi theitan zuih bel hoih dingin ka gingta hi. Himahleh ei mah lemtang dan etlouh theih louh pawl om i hihman un kisuanglah lou in eimah lemtan hun pen ah kikhom dingin ka hon chial hi. Huan ah sepna ziaka biakna kikhopnate ei adia lemtan kei tak in zong, zingkal thumna i telman liai nak leh delh teitei mai ni. Toupa’ delh chihtak a delh mite’n, a ompihna naktak in dong uhi. Rev. Paukhankhai in a thugenna khat ah, “Toupa vualzawlna kia i delh leh kipha ngeilou dinga, Amah delh leng a vualzawlna in hon zui ding” na chi hi.
I tangteel bang in, i kikhopnate uh tawpsan mai lou in, kikhoplouh khak lauhhuai sa in, Toupa biakna ah paikhawm siausiau ni. Huan ah, na kikhawm zawm nawn chiahlou i hih khak leh leng, kisa thak in, kikhawm kik in, Toupa thute ngaikhia khawm in, phatkhawm siausiau ni. Pathianni hun nei mahmah lou le nahi khathei, himahleh biakna hun thum i neihte lakah khat bek a tel teitei dingin i hunte eu khia in, thathak la ni. Tuni a na kikhop in midangte hanthawn in tawsawn kha ahi chih na manghilh louh ka deih hi.Toupa honvualzawl chiat hen!
