“Na thute ka kam ading in khum hina tel e! ahi, ka kam a di’n khuaizu sangin a khum zaw hi” Sam 119:103
I tenna khovel ah thu-le-laa zak ding a hoih leh a hoihlou tam mahmah hi. Huchia thu-le-laa zak ding tampi omlai in, bang thute na za nuam pen a, na sim nuam pen a, ahihlouh leh bang thute ah hun na pe tampen a chi’n kidong masa chiat leng ut huai kasa hi. Khenkhat te govt. apan thuthak bang om dia aw chi a’ a bil doh lai un, khenkhatte lamka lam election boruak bang bildoh huai sa, gam khat leh gam khat ki-ngiikna thu leh eimah lunglutna tuamchiat bildoh mahmah i hih uh kagingta hi.
Tua banah chiamnuih gensiamte thugen, lasa siamte lasak, mipil-misiamte banah gamsung vaihawm tute thugen ngai nuam in mi tampi pi kipunkhawm sek uhi. Mi kuapeuh in bil tai sak leh i zakthute apan kipahna leh nopsakna lunggulh chiat i hih uh ka gingta hi. Himahleh thukdeuh a i ngaihtuah chiat uh ka ut mahmah hi. I zaknop thute i zaktheihna ding un sum bangzah khateng in i seng ding ua? Ahihlouh leh tha-le-zung banah hun bangzah mawngmawng i zaknopte i zakna ding in i pe khia a? I zaknop mahmah thu-le-laate i hinkhua adia phatuam taktak mah ahi diam?
Khovel ah, i theih ding thu, i zak ding thute phawk khaklouh tuh mawlna chikhat ahi. Theihna in mi pilsak a, theihlouh na in mi haisak ahih dang leng i thei mahmah hi. Himahleh i zaknuam mahmah thu-le-laate i hinkhua susia tu leh a hoihpen leng na hi khollou thei ahi. I hun zat tamna pente leng i poimoh pen leng na hikhollou theilai hi.
Sam gelhtu in hichibang in na gen hi. Pathian thu in, amah doute sanga pilzaw ding in bawl a, amah hilhte (sinsaktute) sang a pilna nei zaw in bawl a, tekte sangin theihsiamna a neih zawk banah a thuzakte a zuih theihna dingin, gitlouhna lampi tawn dingin a khete phallou ahih dan chiangtak in gen hi. Huaiziakin Pathian thu manpha salua in, khuaizu toh tehkak hial hi. Tua banah, a thuzakte kithu zohsak ahihman in omdan diklou peuhmah hua ahih dan gen lai hi.
Tu khovel ah, i thuzak theihna dingin, internet fee, cable fee, Mobile phone recharge man banah hun tampi pi i seng behlap lai hi. Tuate banah laibu leh newspaper man i seng lai hi. Hiaite poimoh lou chi i hi kei a, poimoh vek mah hi. Himahleh vanzat tuamtuam tungtawn leh laibu volume tampi i simkhiakte pansan a pilna leh theihna i kaihkhawmte sangin Pathian thu a pilna leh theihna tam a kiphum zawk banah khelhna lampi tawnlou dingin hon humbit lai hi. Huchi ahihman in, Pathian thu simlou a, khalam thu i theih dingte i theihlouh ziakin, salam a pil mahmah bangsim napi khalam a mawl mahmah kitam hi. Pathian thu simtam in, zak tam sawm chiat ni. I thusim leh i zak tamte mah in i hinkhua thunun baih ahihman in, Pathian thu tungtawn in Pathian naih dingin kisa chiat ni. Toupa’n simtute hon vualzawl chiat hen aw! Amen.
