Mei-ek neuchik in gam lianpi a kaatdan ngaihsun dih ua. Lei zong meikuang ahi. Pumpi kahiangte laka khat, diktatlouhna lompi ahi (Jak. 3:5,6); Thu tampi genna ah tatlekna beilou a, a kamsimthei mi bel a pil hi ahi.
Paunakte:10:19
Lei tuh neuchik himahleh, pumpi kahiang lak ah poimoh leh thilhihtheitak ahi. Jakob in a gen chiang mahmah. Mei-ek in gam lianpi a kaat theih bang in, lei in thusia gen in, siatna thupitak a tun thei. Tua mah bang in, thuhoih leh manpha gen in, a hoihlam ah mite a thuzoh thei hi. Huaiziak in, nang leh ke'n i lei bang i chizat a, chih dotna poimohtak ahi
Khatna ah, i lei zatdan in i pichin leh pichin louh gen hi. Lei or kampau a kithunun thei, kipalpai lou mi tuh mi piching ahi, Jakob in a chi. Kampau kisuum hetlou leh midang khual hetlou a paukhiak zialzial chihkhawng pichinlouhna ahi. Pilvangtak a paukhe mi na hi hia? Bangmah khuallou a pau zialzial mi? Kei' mizia ahi, ka ngeina ahi, na chi maithei. Ngeina leh mizia hoihlou ahi chih kipom inla, kikhek in. Jesu Khrist mizia hoih leh kilawm enton dingte ihizaw.
Nihna ah, i lei zatdan in mipil i hih leh hihlouh gen hi. “A kamsim thei or lei thunun thei mi tuh mipil ahi,” chi'n LST in gen hi (Pau. 10:9). Mipil ichihte tuh hih ding leh hihlouh ding, gen ding leh genlouh ding a hun leh mun zil a khentel theite ahi uhi. Khenkhat, thilhoih thei nazenpi in, genna ding mun a genlou, genlouh nading mun ah gen sese zel uhi. Haina chikhat ahi. Pilna (wisdom & discernment) a nei mite'n bel a hun leh a mun ah kamsim or kampau khe geihgeih uh a, manpha mahmah hi. Tua in damna leh kituahna tun hi.
Thumna ah, lei zatkhelhna in buaina tampi piangsak thei hi. Mei-ek neuchik in gam lianpi a katsak theih bang in, mihing pumpi a lei neuchik in buaina lianpi piangsak sek hi. Thu tampi genna ah tatlekna beilou, chi'n Paunakte'n gen hi. Pilvan huai mahmah. I gam ah buaina a pian chiang in, a khamdaihna ding in internet shutdown chih peuh om thei zel hi. Internet in amah kia a buaina bawl hia? Hilou e! A zangtute' haina, kampau kideek theihlouhna leh zatkhelhna ziak a buaina omhizaw hi. A mihing kisuumlou ihih chia, a vanzat hong kisuum himaimah eive! Lungkham huaipi ahi.
Lina ah, lei tuh lemna leh damna vanzat in pangthei hi. Lemna bawlte a hampha uh, Pathian' tate chih a om ding ahingal ua (Mat. 5:9) a chih bang in, Pathian tate' lei tuh Toupa' adia vanzat manpha ahih gige ding ahi. Toupa pahtawina leh biakna vanzat ding, a tangthupha puanzakna ding, lemna leh damna tangkouna vanzat ahih ding ahi. Mi gilou leh Pathian laulou kampau in gam kangsesak thei a, Pathia laumi' kampau in bel a damloute hihdam, a lungngaite khamuan, a hatloute hatsak thei gige hi.
Huaiziak in, mi piching na hi hia, pichinglou? Mipil nahi hia, hilou? Buaina bawl a gamkangsaktu na hi hia? Lemna, muanna leh damna tuntu na hi hia? Na lei zatdan, na kampaudan leh thilgendan in hiaiteng lak a na hihna diktak koipen hihiam, chih hon phoukhe zel hi. Limlang ah nangmah mel na muh bang in, na hihna kimuchian inla, kibawl in. Jesu Khrist ah thilhihtheihna om hi.
Photo by mohamed_hassan on pixabay.com
