Toupa Pathian a nei nam a hampha uhi, amah gou luah dia a tel mite mah (Sam 33:12)
Tukum in Pathian toh na kal uh teh ding hileng bang tan a kinai in na om ua? Pathian in hon naih in na kithei hia? Ahihkeileh en Pathian bangtan in i naih un i kinai ua? Hiai dotnate kidong kawm in “Pathian naih un, aman a hon naih ding” chih ahihman in en i naih masak poimoh gige hi. Pathian naih lou a, a ompihna leng tang banlou mite dinmun tamlou en leng hiai anuai a bang in.
1. KUMPI SAUL: Kumpi ding a bawlpa Pathian Saul in a thei gige kei a, a thupiak leng a manlouh ziak in Pathian in kumpi Saul tuh a nuseta mai hi. Pathian in a nutsiat a kipan mipiten zong taisan ngam mai uhi. Lau leh ling a om in, sep louh ding teng Siampute lat ding kithoihna bang lan kha a hihman in a khelhna hong sang semsem hi. Chimoh gawp in Dawi aisan siam numei kiang bang va tung in muanna leh bitna va zong mahleh mu tuanlou hi. A tawptawp chiang in melmate khutlum a vuallel tak a si ding veve chi in ama’ thal mah boh in amah leh amah kithat hi. Pathian naih louhna ziakin vuallelhna leh sihna tuh a tan ahita hi. Pathian naih un, aman a hon naih ding chih ahihlam mangngilh het kei ni.
2. SAMSON: Samson in Pathian naih a kichimat tak a om lai un Samson tuh mihat, thil hihthei tak, mite lauh leh zahtak mahmah ahi. Pathian ompihna leh panpihna toh Israelte tung ah kum sawmli vai a hawm hi. Himahleh Pathian in a paisan khit tak in tuh melma-te’n a mit a khelkhiak sak ua, Gaza khua ah a paipih suk ua, sikkol a bun sak ua; suangkul ah buh gawizantu in a pang hi. Pathian in hon pai khiak san mimal, inkuan, pawlpi, gam leh nam i hih khak ding mulkimhuai tak ahi, kingaih tuah ni maw.
3. LOT: Bitna leh muanna, hauhna leh khosak theihna delh a Sodom khopi zuan a, huai khopi a tensawm Lot tuh a tup bang ngei in va teng lut thei hi. Himahleh a lunggulh leh utna mun pen zong chiman lou a taikhiaksan hong ngai in, azi hon tan in kawlhawm khat sung ah hong kibu maimah ta hi. Huai mun ah a tanute toh ta bang hon nei in tuni tanpha a Israelte om muangsak thei lou chisuan hon neih loh maimah ta hi. Nopna, dahna, hauhna, zawnna paulam bawl lou in Pathian mah naih gige ni. Pathian in mi a nutsiat chiang in, kisegawp in, kilawmlou lua chih omlou in mulkim huaipi tun thei hi.
4. JUDA ISKARIOT: Jesu’n a nungzui ding a’ atel mi 12 telak a khat ahi. Lemgel a siam a, sum leh pai Kep leh etkol dan zong a thei leh a kiva mahmah, hisap kin gang tak leng hiding hi. Kum thum bang Jesu toh kithuah, a tanghou leh a ngasa sukpungte ne pa ahi. Nungzuite lak a mite theih leh zah a om pa ahi. Himahleh dangka sawmthum toh a nung a zuihpa na khong leh na taisan tu ahi. Jesu a taisan nung amah leng hong lamzang tuanlou in, lungsim tongkhong lamet bei a om in a sum leng siampute kiang a va pekik vek in amah leh amah va awklum, a khau kitan a, lei lak a khuplam a tu in a gil puakkham kichi hi. Sihna leh sihdan ah leng tel huailou leh mulkim huai tak mai in a hinna bei hi.
A ziak bel Pathian in mi khat a nutsiat chiang in a ma omom a om himailou in Setan in manpah ngal in ten chilh pah sek hi. Setan in mi a mattang vanglakte khah zalen nawnlou in kolbulh den hi. A.W Tozer thugen khenkhat - “Setan in belam thum thumte lau lou in a belampu ahi a lauh”. Sehal in belam kii hoih leh kithutuakte laulou hi, a gal a’ a et gige tuh belampu om leh omlouh ahi. Huaiziakin belam honte tuh belampu naih a, a om gige ding uh ahi, tuabang a, a om ua leh Ngia a mau a dia lauhhuai nawnlou ding hi. Setan holkhiakna ding a hoih pen tuh Jesu Khrist chial lut ding ahi. Amau gel mun khat a om khawm theilou ahihman un kuapen i deih in, kuan hon uk leh chih i ut ua ei thu ahi.
I Pa Pathian ompihna leh hehpihna dai kaihkhumna ziak lel a bit lai i hi uh. Pathian lungkim lou a’ adai hon lakkhiat sak chiang in tuh, huan dai sia sung a haichi gan hon in a ut bangbang ua a totchil gawp uh toh i kibang ta ding uhi. Huaiziakin Pathian ompihna tuh bitna, ki-ningchinna, galmuanna leh thil bangkim a nopna leh lung muanna ahi. Pathian ompihna polam zaw huihpi vuahpi thuakna mun bang, kulh neilou khopi, melma-te’n ut hunhun a’ a sim theih uh, gallak a lak theih gige toh kibang hi.
Tulai in bittak leh lung muang tak a teen theihna ding chi in i gam chiangchiang umna ding in inn i bawlma nangawn un dai sang huntawk tak bang i bawl sek uhi. Huai dai sung ah leng Pathian a hong tel kei leh zaw bitna leh gal muanna om tuan kei lai hi. Pathian tellou in teklei sah tak in dai um in, sik gate bawl in, inn bangte leng thautang but louh ding in bawl mah leng leng’ bitlouh theih hilai e. Jesu Khrist tuh nang leh kei a ding, mi tengteng ading in naih taak, belh taak, suantaak, muan taak, Pathian tengteng a tungnung pen, kumpite kumpi, toupate Toupa ahi, na naih khak nai kei leh tuni akipan in naih pah ta in. Pathian naih thei chiat dingin a vualzawlna bukim Toupan hon pe chiat ta hen.
