EBC in kum tengin thupi paipih i nei tou zel ua, hoih ka sa mah mah hi. Nikum 2021 in “Ngaihdamna” thupi a zang in – Pathian leh mihing kal a ngaihdamna bang, mihingte kal kingaihdamna bang i na genta ua, a phattuam pih, a na kingaidam, ngaihdamna tang leh ngaidamtu a pang bang zong i om ngei uh ka lamen hi. Ngaidam a om tuh thil kipah huai mah mah ahi, puakgik hon delh gige beina, minsiatna leh hoih louhna chiamteh a omte thaimang na, nulsiangna leh dik leh hoih a pomna ahi. Huchi a ngaihdam a om suahtaksak nung a leng vakmang laite ading in tukum 2022 thupi “PATHIAN NAIH UN” chih a hong hi a, hong kituak tou nawn mah mah zel hi. Hiai thu “PATHIAN NAIH UN” chih tuh Jakob in a laikhak na mite kiang a, a thugen poimoh mah mahte lak a tel thu manpha khat ahi.
Hiai Jakob laikhak tuh Rome kumpi thuneih khumna, mun tuam tuam a om Juda Christian taidalhte kiang a khak ahi. Piangthak nai loute hong pianthakna ding uh, gingtu hinai loute gingtu hong suahna ding uh, khristian hiloute Khristian hong hihna ding uh chih lam sang mah a leng Khristian a na hita mite niteng hin ding dan leh midangte tung a gamtat ding dan sinsakna laibuta pomoh tak ahi. Hiai laikhak a thumal lunglut huai mah mah khenkhat bang zah hiam sau lou lou in enkhawm leng:-
1. GINNA ZE-ETNA:- Khemna tuh Setan akipan ahi a, ginna ze-etna tuh Pathian a pan ahih ziakin lung lelhna ding leh lungkiatna ding hilou in chetna hoihtak a leng puk lou dia din kip gige na ding ahi.
2. MIZAWNG LEH GENTHEI:- Khristian piangthak hih nung a leng zawnna leh gentheihna in hon tuam nawn lou ding chih hi lou hi. Zawnna leh gentheihnate zong ginna a i muanhuaina a dokna ding a Pathian hon sawl himaithei ahihman in lung lel lou in Pathian muanhuaina tamsem muh sawm ni.
3. MIHAUSA:- Hauhna, neih leh lam tuh a poimoh pet mah a, khosakna ding in leng a phatuam lua hi. Himahleh sawtpi daih lou ahihman in genthei chimoh mangbangte panpihna ding a zang thei mite a nung a leng kisik tun tun lou uh ahi. Mihau hihneu a om ziakin kipak zaw hen (1:10).
4. KHENTUAM NEIHNA:- Ka unaute aw, i Toupa Jesu Krist, thupina Toupa gingta kawm in, mi khentuam kei un (2:1). Mihingte pianken lungput tuh khentuam neihna, zahtak leh simmoh neih, it tuam leh muhdah tuam neihnate chihte ei gingtu Khristian piangthaksaten i tawpsan ding uh hita hi.
5. GINNA NASEP IN A ZUIH DING:- Ginna in thil hih toh a semkhawm a, thil hih ziakin ginna a bukim ta chih i thei uhi. Ginna ziak kia hilou in thil hih ziak zaw in min siam a tang zel uh chih na theita uhi. Kha pang lou in pumpi a si ahi, huchi bang mah in thil hih pang lou in ginna leng si ahi (2:22,24,26).
6. LEI VEN HOIH KUL:- Thil tampi ah i vek un i gilou nak uhi. Kuapeuh thugen lam a, a gitlouh kei leh mi pichng a hi a, a pumpi veng thei mi ahi. Huan, lei tuh mei ahi,pumpi hiangte lak a gitlouhna lumpi, pumpi a vek a ninsak a, mihing kisuansawn dan pianphungpi kang sak ahi, huai lei mah in gawtmun mei toh a peh hi. Lei zaw kuamah in a khoizual thei kei uhi, sihna gu a dim, gilou om kin ken thei lou ahi(3:2,6,8). Kamsiam tak a hon houpih mite leh thugen siamte thugen ngaih nuam kisa hi.
7. PILNA CHI NIHTE:- Tunglam akipan pilna bel, a tung in a siangthou phot a, huaikhit in kituah a ut a, a nunnem a, a chihnuam a, hehpihna leh gah hoih in a dim a, khentuam a nei kei a, a lepchiah kei hi. Himahleh na lungtang uah hazatna thupitak leh kidemna na neih uleh thudik zuau san kei un.Huai bang pilna zaw tunglam akipan a hong paisuk ahi kei a, khovel leh pumpi utna dawi akipan ahi zaw hi. Hazatna leh kidemna omna ah buaina leh thilhihkhelhna chiteng a om hi (3:17,14-16) Huchi in Pathian thu thu in om un; himahleh Diabol dou un, a hon taimang san ding hi. Pathian naih un, a man a hon naih ding. Khialte aw na khut uh silsiang un: lungsim bulbal nei loute aw, na lungtang uh hihsiangthou un (4:7-8) Hiai sung teng tuh tuni a i tangtel leh i gen nop pen thute ahi:-
PATHIAN THUTHU in om ni, a ma hon sawlna mang ni, ama deih dante zui ding in amah kipisak ni.
DIABOL DOU NI – melma pa i dou kei leh aman i lungsim, i deihtelna, i insung, i khosung, Saptuam, khotang leh i chi leh nam gal lak in hon la dia, hon thuneih khum dia, i suakta zou nawn kei ding uhi.
PATHIAN NAIH NI – Khovel vaihawmtu, Pathian tundingte kiang a va pukgawp a omlou in a tung dingtu Pathian naih in, amah kipisak in, a mah bel in, a ma thuneihna leh lalna sung ah khosa lehang i bit pen ding ua, igal muang pen ding ua, i tawl uh a dampeng ding a, gah tampi suang in sawt i daih thei pen zaw tham tham ding uhi. Tukum thak 2022 a Pathian naih a, amah toh kinaitak a kithuzak thei gige ding in Toupan hon hon kem in hon makaih chiat ta hen.
