Gingtu EBC Church, Delhi te’n kum 2021 adinga Nipi nanungpen ah Pathian kianga kipahthu genna hunseh (Thanks Giving service) 11 am leh 2pm in kinei thei hi. Hiai tan honpi Pathian min phat in om hen aw.
Thanks Giving Service hunah, saptuam member te laka bangzah-hiamte kiang ah Pathian mina pan ana laknate uh kipah thugenna in pahtakna leh kipahna thilpiak piak in om uhi. Amaute kipiakzohna leh hihtheihnate tungtawnin Pathian min phat in om hen! Huan, hiai hun ah Saptuam member di’a hong kipia bangzah hiamte laklutna leh thumsakna hun leng zat in om hi.
Sharing: Unaupa Robert Suanlian Guite (RSG) apan a hinkhua a Pathian hoihna a tante sharing manphatak ngaihkhiakin om hi. Amah (RSG) kum 25 sung EBC Delhi saptuam a member ana hi hi. Hiai hun sung in Pathian saptuamte kepna ah lam chituamtuam (Sunday School heutu, TBUC member, MC Member leh Prayer Cell Convenor) te ah manpha takin kizang den hi. Pathian thu a lunglut leh kipezou tak ahih dungzui in Govt service a om sungin Laisiangthou M.Div, Asian Institute of Theology, Bangalore apan galzilna zong na nei hi. Huai banah, Local Mission Committee panlakna outreach program te ah main speaker in mun tam tak ah kizang hi. Unaupa RSG saptuam member gahsuah leh mitampi adinga hasuantu (encourager) ana hi gige hi.
Unaupa RSG ahihleh Govt of India (Parliament House) a Deputy Secretary apan tu November 31, 2021 in voluntary retirement la in Pathian nasepna a hih theih bangbanga kizang dingin Shillong lam ah a inkuante toh hon zotsan pahta ding ahi. Toupa'n amah leh a inkuante ompih henla, manpha sema kizang thei dingin Khasiangthou in thuam denta hen!
Messages from Pastors: Biakna hun nihte ah Pastor G Khankham@11am leh Pastor G Thuamminlian @2pm te’n thugenna manphatak nei uhi.
Sermon manpha tak Pastor G Khankham apan om hi. Aman tuni prog Thanks Giving ahih toh kitonin kipahthu genna apoimoh dan leh kipah thugen theihdan chituamtuamte hon gen hi. Hiai sermon apan, 'Kipah thugen' pen Pathian nasepna ahihdan honphawk khesak thak mahmah hi. Saptuam sung khawnga fulltime/ partime leh dinmun leh hihna poimoh taktak len mah lehang kipahna dan theilou a, phunna ding kia khawng mukha I hihleh Pathian nna sem khalou ki hidi hitah e, chih hon phawksak mahmah e. Manpha lua.
Sermon @Pastor TML sermon: Kum khat sung vingveng "NGAIHDAMNA" chih thupi in I neita ua. Nang mah mimal in na hinkhua ah hiai Jesu Kris tungtawna Pathian NGAIHDAMNA na tangta hia? Tua ngaihdamna na tan tak leh nang midangte na ngaidam thei hia? Hun hoih bangtan neilai ding I hia, kuaman I theikei...... Ngaihdam louh khelhna, midangte ngaihdam theihlouhna lungtangte, kum abei toh kitonin nusiata ni, Unaute. Hiai chialna in lungsim tawng hondenga, ngaihtuahna hon sukha mahmah hi. Saptuam chidam leh khangtou hihna ding bulpi hiai "NGAIHDAMNA" a hong kipan ding ahi mahmah ve.....
Jesu Kris tungtawna Pathian Ngaihdamna tang ding leh tua tungtawn in, mihinpihte ngaidam thei chiat dingin simtute Khasiangthou in hon houpih zom zel hen aw!
