Tukum Khistmas zang theilou ding dinmun a i om lai in lungsim a tawl mahmah hi. Zat theih ding dinmun a i hong om thak leh kipahna in ka dim a, manphatak a hon zangzou saktu Pathian kiang ah kipahthu ka gen hi.
Dec.24, 2021 zan kikhop: Hiai zan kikhopna hun ah sharing ngaihkhiak tungtawn a hong kigen kha “OFFER” chih thumal ka lungsim ah thamden a, tua thumal toh innlam ka zuan hi.
Zing ka thou a, Kilakna 22:17 na thu “…Kuapeuh dangtak tuh hong pai hen, a-ut peuh in hinna tui manbei in dawn hen” chih ka simkhak leh, hiai “HINNA TUI A MANBEI” Pathian hon offer kipahhuai hina maizen e, chih hon ngaihtuah sak zom hi. Huchihlai in hiai offer sang nuam tuanlou ding maw chih dotna michih in i kidot chiat ding un hoih ka sa hi.
Dec.25, 2021 nitaklam kikhop: Tukum Khristmas ah kum hiai zah Khristmas ka na zat nung a ka zak khak ngeilouh Khristmas message banghiam zak ding lunggulh in lungsim in ka na thum hi.
Thugenna tungtawn in CENSUS (Kisimpi) kichi in ka ngaihtuahna hon luahpah hi. Joseph leh Mari minkhum ding a a kuan lai un, Belamchingte’n a Belamte uh gamlak ah ching ua, amau Census chih khong bang le ana buaipih kha vetlou, Census a leng tel banlou uh ahihdan hong kigen hi. Hiai thu ka ngaihtuah kha ngeikei a, ka zakkhak patna leng ahi a, ka lunggulh message Pathian in honpia e chi in ka kipak mahmah hi.
Census ah leng minkhum phaloute’ lak ah bangziak a Jesu hong pianna thu va kihilh ahi di’a aw? chih pen in ka ngaihtuahna a luah zom hi.
Mihingte’ mitmuh a VIP hikha mahmah loute, Pathian mitmuh a VIP i hihtheih dan khong ka ngaihtuah a, hon kipaksak mahmah hi.
Dec. 26, 2021 zinglam kikhop: Hiai ni kikhop ah sharing hun a kigen EXPIRY kichi in ka lungsim luah nawn mahmah ve aw… Pathian in a ta neihsun haksatna chiteng thuak ding a honpia a, en bang i pethuk a? A validity omlai pelou a, expiry nung khawng hia Pathian i piakthuk ding chih in ka ngaihtuahna a luah nawn mahmah hi. Pathian hon sapdan bel kibang lou ding hi. Huchihlai in, i hihtheih bangbang in expiry date in a hon lap ma in Pathian a di’n i hihtheihna lam ah thasial kei ni. A validity omlai ngei a Pathian adi’a kizang khate’n, Pathian ma a a din chiang un hihfuh kisa mahmah ding uh ahihdan bang lungsim mitkha ah hong dawk dundun hi.
Sharing zoh in thugentu in, ka na buaipih leh poimoh ka sa mahmah, ‘KIPAHTHU GENNA A HAUHSAK DING’ chih a hon gen zo-mah a, manpha ka sa petmah hi. Kipahthu genna Pathian in a ngaih poimoh dan bang hon ngaihtuah sak zom hi.
Tutung Khristmas hi salam ah ankuang umkhawmna omlou himahleh, Khalam ah gilvah tak in ka om a, manpha sa in ka kipak mahmah a, Pathian tung ah kipahthu ka gen hi.
