I Toupa Jesu eite tan ding a ahong pianna kipahpihna vualnuam Krismas hong tungnawn ding in naichik ah omta a, hiai tan honpi a tua I ngaklah hunnuam hon pikai ding leh manphatak a hon loppih ding I biak Pathian min I phat uh ahi.
Tukum I saptuam thupi ‘Ngaihdamna’ tuh tua I vualnuam lopding Krismas thupuak laigil tak mahleng ana hi ahi. Mikhialte tanding a mihing a hongpiang I Toupa Jesu’n leitung a ahong paina san ngaihdamna nna ahong sep ahi.
Tua ngaihdamna ina tangkha samta de aw, unau.
Hiai ngaihdamna tankhak theihna ding a chitna omsun tuh ngaihdam kiphamoh ding khop a khial hihna kiphawk ahi. Laisiangthou in mi tengteng in thil ina hihkhelh takdan uleh Pathian thupina i tan zoh nawnlouh (Rom 3:23) dan uh hon hilh in; khelhna man tuh sihna (Rom 6:3) ahih dan leng honhilh zuingal hi. Huan Laisiangthou tungtawn mah in Pathian in khovel mihingte ahon itluat dan leh amaute tang a a Tapa apiakkhiak; kuapeuh a gingtate a manthat louh ua khantawn a hinna a neihzawk theihna ding uh (Rom 3:16) lampi ahon bawlsak ahihdan chiangtak in honna hilh hi.
Hiai Laisiangthou tungtawn in khelhna ziak a Pathian toh kizopna kitan ahihdan leh tangtawn manthatna leh sihna in honna ngak ahihdan theihsak in i om hi. Huai dinmun setak apan hon honkhe thei khatkia omsun tuh, tua amai a siamlouh itanna pa mah ana hi ahi. Huai tuh kuadang hilou in eite hon it mahmah Pathian mah hi ahi. Aman, huai pumpelh theihlouh sihna apan eite ahon hotkhiak theihna ding in tua sihna ngei tuh tapa tangkhat neihsun a thuak sakta a, eite hotdam in i omta uhi.
A thangpaihna I thuakna dingpa’n a hon ngaihdam nop ziak a pumpelh; amah senna leh supna a ahon bawlsakna tuh ahi, a ngaihdamna ichih. Huai phulouh ngaihdamna tuh ahi tangtawn dong a genchimlouh ding pen. Hiai bang zahta a thupi ngaihdamna ina tankhak hampha I kisakluat lai in, enleng ngaihdam samding neih ina neihkha de aw, chih kidot uthuai isa ahi. Laisiangthou in, Mi a tatleknate uh na ngaihdam uleh, na Pa uh van a om in leng a hon ngaidam sam ding hi. Himahleh mite tatleknate na ngaihdam kei ngal un, na Pa un na tatleknate uh a ngaidam sam kei ding hi. (Mat 6:14,15) chiin hon thuhilh hi. Hiai omzia bel, I Pa uh van a om in I tatleknate uh ahon ngaihdam tak ngalleh, enleng midangte, eitung a a tatleknate uh I ngaihdam sam ding uh chihna ahi.
Leitung khovel maikhaih a hiai vualnuam, gingtu hiin gingoute natan in Krismas lopdan chituam tuam in ina lawmsek uh hi. Tuate lak a a manpha mahmah khat ahihleh, thukhah – lemna, muanna leh kipahna deihsakthu iki khaktuah khiukheu uhi. Huai mahle a Krismas omzia omsaktu ahih ban ah hoihle hoih in kilawm mahmah hi. Ahi a, tua mimal kikal a deihsak thukhah a manphatluat lai in, itna leh deihsakna tehvuallouh a Van Pathian in mihingte ahon deihsakna a tapa Jesu Kris tungtawn a ahon lahkhiak Ngaihdamna pen khupzou ding deihsakna thukhah omthei ngeilou ding hi. Hiai bang ngaihdamna thupi leh manpha ei tan a tawp maiding ahi diam? Laisiangthou intuh, Khasiangthou a thop a I om chiang a gam chih apai ding leh kawlmong pha a a thu theihpihte (Nasepte 1:8) hiding ihihdan honhilh ahi. Huaiziak in, tutung Krismas vualnuam hun ah, a naungek aa hongpiang I Toupa Jesu Kris in ahon sinsak ngaihdamna mah thupi a nei in ngaihdamna thu thehzak ni. Ngaihdamna poimoh, koi ah ngaihdamna om hiam chih theikha nailoute kiang ngaihdamna thu thangsak ding in kisa ni. Huai ding in, mahni neihlouh piaksawn chihdan omthei ngeilou ahihman in, a ngaidamtu ihih masak kisam hi. Huaiziak in mimal kal hiin khawtang ah hitaleh; Laisiangthou in “Kuapeuh in kua tung ah leng thubuai nei bang hile uh chin, kithuakzou chiat in, kingaidam tuah unla, Toupa'n a hon ngaihdamtak bang in, kingaidam sam un” (Kolossate:3:13) chiá ahon sinsak bang in kuaman ngaihdam hon ngen takhol keileh leng, ngaihdam a om a hamphat huaidan theisa eite’n tua mah sepkhiak mohpuakna piak a I omna kilawp tak a semkhe diing a kisa in, ngaihdamna thu puangzak ni. A ngaidamtu tuh a tawl adam a, a vualtung tuangzaw leng hi ahi.
Huaiziak in, eite ading a tangtawn hinna hontun I Toupa Jesu Kris mihing hongsuak a naungek a ahong pian kipahpih a lopna vualnuam Krismas hun ah mimal khat-le-khat kal ah hiin khotang ah hitaleh, ngaihdamna thukhah puangzaktu leh lemleng saktu a pang thei chiat ding in Toupa’n I omna munchiat uah hon ching in hon ompih hen aw.
