Lallukhu Chi Ngate

Etdan tuam tuam, tehdan tuam tuam zang in kitaitehna tampi i nam bing bang, i khobing bang leh i veng bing bang ah i nei uhi. Hiaite ah tuh misang a vou zawkna, tuambikna nei,  mitung  a deuhte tan ahi sek hi. Hichibang pahtawina tang ding mi telkhiakna ding in tehna chi tuam tuam kizang sek mah ahi. Huai tehna zang a ettelna neih nung a chinna neite kiang ah, amau phubang zel kipahman tuh a enkaituten a pezel uhi. Toupa Jesu nungzui gingtute niteng hinkhua a kitaitehna a isan ding uh kipahman chinga i Laisiangthou a kigente toh kisai LALLUKHU CHINGA chi a min vohte gen sawm ihi.    Laisiangthou a kigen lallukhu chingate toh kisai tukum nipi skul kumtawp examna ah hong kilang a, mi tampiten thei  napi in i bulh khial kha ua, awl moh huai sa in chiangtak in gen khe zou keimah leng gen zek tuak sakna om man in tam lou Laisiangthou a i muh, bang bang gen beh tuan lou  in ka hon luikhia hi. A ban sutbeh thei bang om leng nuam zaw sem kithalop huai sem lai ding in ka um hi.

1. DIKTATNA LALLUKHU (The crown of righteousness) Hiai diktatna lallukhu tuh I Toupa Jesu Khrist kilakna lamen a gin-omtak a ngak mite kiang a piak ahi ding. Diktatna tuh Pathian hihna leng ahi. Douna hoih ka dou khinta a, ki taitehna ka tai khin ta, ginna ka lenkip paisuakta hi. Tun ah zaw diktatna lallukhu kei a ding in koih in a om ta, Toupa vaihawmpa diktat in huai ni chiang in kei a hon pe ding,kei kiang kia hilou in, a kilakna it peuhmahte kiang ah a pesam ding hi(2Tim. 4:7-8).
2. KIPAHNA LALLUKHU (The crown of rejoicing). Hiai kipahna lallukhu tuh Khamangthangte Toupa khebul a tuntute kiang ah piak hiding hi.I thilpiak leh thumna ten Khamangthang tampi Pathiang khebul a tun thei ahihman in kipahna lallukhu tang thei te ihi. Ka lam-etna uleh, ka kipahna uhiam, ka lallukhu suan uhiam bang a hia leh ? A hong pai chiang in I Toupa Jesu ma ah nou mau mah mah na hi kei ding ua hia ? Noumau mah mah ka suan uleh ka kipahna uh na hi uhi (1Thess.2:19-20).
3. THUPINA LALLUKHU (The Crown of glory).Hiai lallukhu thupitak mai tuh kemtu muanhuaite kiang ah piak ahi ding hi. Kemtu muan huai ten tuh a gah sak, a pungsak uh chih i thei uhi. Huchi in Belamchingpa lianpen a hong lat chiang in, thupina lallukhu tul theilou na mu ding uhi (1Pet.5:4).

4. HINNA LALLUKHU (The crown of life). Hiai hinna lallukhu tuh khemna a puklou a thuak mual suah, mikuhkalte kiang ah piak hiding hi. Khemna thuak tei tei mi a hammpha hi; zeet a omnung in hinna lallukhu, Toupan amah itte kiang a, a chiam a muh ding ziak in (Jak.1: 12)

5. LALLUKHU TULTHEILOU (Imperishable crown) Vual tung tuang ding a mahni kithunun zou mite kiang ah hiai pahtawina lallukhu thupitak, tul thei lou, a ngei bang gige ding tuh piak hiding chih ahi. Huan kidemna a kimawlmi peuhmah bangkim ah mahni kithunun in a omnak uhi. Amau zaw lallukhu sethei muding in a hih ua, eiten bel lallukhu sethei lou mu ding in (1Kor. 9: 25).

Hiai lallukhu chingate tan theihna ding in ei mihing lampang a ipanna ding tampi tak omte ah hihtheih louh luat ding om louh man in hamphat huai isa uhi. Sawltak Paul in douna hoih ka dou khinta, a chi ngam vil vial a thupitak tuh ahi. Kitaitehna ka taikhinta, ginna ka len kip paisuakta, hiai chingam pa tuh a nungtolh tuak het kei a thup isa hi. Amah tuh mihing ahi a, eite mah bang a khovel a khosa leh nek zong leng ahi sam hi. A tan ding “Diktatna lallukhu” amah a ding a koih a om ahihdan leng a thei chian mah mah hi. A petu dingpa  ahihna hon gen thupi mah mah nawn tuh “Vaihawmpa diktat” chih ahihman in a phuloute kiang a bel pe lou ding leh piaktuakte bel pekhial lou ding, maih nei lou ding ahihna hong kilang hi. Tuabanah Paul in a ma muh bang bang mu thei ding mite pulakna leng a hon nei a “Kei kiang kia hilou in, a kilakna it peuhmahte kiang ah a pesam ding hi” hon chi hi.

PAHTAWINA:-  Khovel theihphak kimawlnate ah, a va tel mite tuh a tenna gamten a kuankhiak ding chiang un thopna hoih pen, kithuah pihna hoih pen toh khakhe zel uhi. A hong lohchin chiang un leng kipahman hoih tak tak pia in pahtawina thupitak toh vaidawn in om uhi. Amauzaw lallukhu sethei muding in ahih ua, eiten  bel llallukju sethei lou mu ding in. Denchiang a vaihawmni chiang in Pathian in a mah adia gin-om taka pang mite kiang ah, “Sikha hoih leh muan huai na hih hoih e, na pu kipahna ah lut in” a chihna miite ihih sam na ding un leh ikisik het louhna ding un Laisiangthou sim ah, thumna  leh thilpiak  ah, biakna leh nasep ah chihtak suah in kuhkal  tak a pang thei chiat ding in Toupan michih a Khasiangthou thil hih thei in hon thuam kim chiat ta hen..