Hiai khovel dan bang in om kei unla; Pathian deihlam a hoih leh lungtuah huaitak leh hoihkim na theih tel theihna ding un, na lungsim uh a thak a om in hong lamdang zaw ta un.
Rom.12:2
Sawltak Paulin Rome khopi a teng Jentel Khristiante/Saptuamte kiang a, a gen latnop mah mah tuh Khristian hinkhua leh thugin ahi. Pathian hehpihna ziak a ginna tung tawn a hotdam ihih dan leh huai in Juda leh Jentel khentuam nei lou ahihdan chiangtak in a gen chian hi. Hehpihna ziak a ginna tungtawn a hotdam a om mite tuh ‘gingtute’ chih ahi uh. Gingtu teng teng tuh Jesu nungzuite ahihman un “Khristian” chih tuh kilohna leh min hong hita. Huai Khristiante niteng nuntakna dan tuh “Khristian hinkhua” a hong hita hi. Kristian hinkhua tuh Khasiangthou pina leh makaihna toh nungta hinkhua ahih ding, Khrist leh Khasiangthou deih leh utte a deihpih, a utpih hinkhua neitu ahih ding chihna ahi.
1. KHOVEL DAN BANG: Khovel a teng a, khovel a nek zong, khovel a khosate adingin khovel dan bang a om louh tuh hong hai huai lawdeuh lou ding hia ? Mi bang lou, mitoh kituak thei lou, mi toh kiton thei lou, mitoh semkhawm bawl khawm thei lou ding, nekhawm dawn khawm thei lou ding chihna himai lou ding hia ? Khovel in apiak theih hamphatna leh tanvou teng taan ding maw ? Himah lou ding maw, hiai khovel dan bang in om kei un chi hiven. Khovel dan toh kituak, khovel in a deihdan, khovel etdan leh muhdante Pathian mit ah a kilawm in Toupa Jesu lungkimna ahi diam chih kivel chian in a hoih loute zong khisiang, hahsiang ngam lehang chih tuh Pathian in laisiangthou a hon sinsak ahi.
2. PATHIAN DEIH LAM: Pathian tuh thil teng teng siamtu ahihman in, a siamsa thilte tuh a zatna ding bang, a om ding dan bang, leh a damsung ding tan zong bikhiah sak chiat hi ding hi. Deihna nei a hon siam, tup leh ngim nei a hon bawl mihingte tuh amah batna nei a hing ding, thilsiam dangte kemtu leh enkoltu ding bang leh mihing leh mihingte mah kitung ding tuah ding, kiphatuam tuah ding, ki-it tuah ding, kihehpih tuah ding, thil bangkim a pang khawm ding a hon lam ette hingei ding in gintak huai hi. Pathian deihlam leh a lungkimna pen tuh mikhial hih kiphok a ngaidam theitu Pathian kiang mah zuan a Lal leh Hondampa a pom ahi. Thil hih leh nasep a bel a deihlam leh lungkimna tan chin zohna ding om lou ahi. Mikhial in bel i gen chiang a leng khial, i sep a leng khial, i gamtatna khempeuh pomtak, leh san tak ding khop a ching zou ding om lou, maipha muhzoh ding hilou himahleh a itna leh hehpihna ziak a ginna tung tawn a midik mi hoih leh khiallou bang a hon pomtu tuh Pathian ahi.
3. NA LUNGSIM UH THAKSAK A OM IN: Khovel dan bang a om utna lungtang akipan Pathian deih dan toh kituak ding a lungsim thaksak a om ding tuh Laisiangthou sinsak dan ahi. Hiai in a tup leh a deih tuh Pathian deihdan bukim, hoih leh a pomtak hih theihna ding ahi. Lungsim thaksak zel tu mihing ading a poimoh mah mah thilkhat ahi gige hi. I tawl mah mah laitak bang, i lunggim mah mah chiang bang, lungkham leh beidong a i om hun bang in, tawlna, lunggimna, beidotnate kia ngaih tuah tuah leng kisiat loh thei ding ahihman in, lungsim thaksak zel, lametna thak, kinepna thak neih zel poimoh mah mah hi. Siamsinna ah bang, sum leh pai zonna ah bang, nek leh tak zonna leh damsungkhosak ngaihtuahna ah bang lungsim thaksak zel tuh michihte poimoh ahi. Himahleh hiai tuh mitampi a ding in thil baihlam hi lou hi. Lungsim hon thaksak theitu Pathian Khasiangthou in bel hih zoh louh leh hih theih louh nei het lou hi. Pathian bel thilbangkim hihthei, bangkim thei ahihman in a bel baih baih hampha baih, kisik om lou, ahihman in khawl khawl, hal hal lou in zuan meng ni i zekai kha ding uh.
4. HONG LAMDANG ZAW UN: Nidang a na omdan leh gamtat, na duh leh deih, na gennop,na sak nopte, na sepnop, na bawl nopte, na muh nop, na zak nopte, na khoih nop, na lawn nopte, na pai nop leh na hoh nopnate, na muh nop na etnopte, na tep nop, na muam nopte, na nek nop, na dawn nopte teng teng a kipan hong lam dang ding a chial ihi uhi. Mikhial Pathian apan taimang leh a ngaihdamna itan ma a inkuan sung buaisaktu bang, veng leh pam a dia mullit huai, ngaih huai lou tak bang, nupa kal kilem lou bang, lawm leh vual toh kilem thei mah mah lou bang, mi gensiat hat, thu hoih leh kam pha zang ngei lou bang, angkawm hat, guta hat, leh khelhna tuam tuam a na kibualte hitamah lehang huaite a omden lou a mikikhek, thilsiamthak i hih ngei ngei ding uh ahi. Khoveldan bang a omna tuh Pathian toh kikhenna ahi,lungsim thak a lamdan zawkna tuh Pathian deih lam a hoih leh lungtuah huai tak leh hoihkim theih tel theihna, thu manpha pen pen ahi. Omdan lui Pathian deih louh dante a kipan omdan thak diktatna a Pathian pomtak hiding a lamdang ngam ding in Toupan hon vualzawl chiat hen.
