Hun tuibang kiam a mualkhum zel in, kum 2021 bang leng a kimkhat val beitou khinta a, ‘..ber’ kha I chih bang leng ni 10 val zangkhinta I na hi maimahta uhi. Hiai tanpha hon pitu Pathian min I phat hi!
Ei’ ut leh utlouh thu hilou in, hun in hon kalsuan pih zel ahihlai in, omna mun khat apan mundang kisuan genna ding in thumal tuamtuam I zang uhi – kiin, vaak, pai, taai, leeng, chihkhawng. Hiai thumalte pansan in a omna mun lui apan munthak a kisuanna a ze-oldan hiam a kindan I chizaw hiam, kitheithei hi.
Phet lou in, nutsiat/paisanna mun khat nei a munthak khat zuan I hihna leng taklat in om hi. Huai in a gen bel manohna lam nei ahi chih muhtheih a, tua toh kiton in nutsiatna mun leng a nei chihna ahi hi.
Kalsuanna (movement) I chih chiang in thil nih – hatdan (speed) leh manohna lam (direction) kigawm ahi hi. Mathematics zang in gen le, Movement = speed + direction, chih theih ding hi.
I nutsiatna mun toh bangzahta a kigamlata hiam kinailai I hi hiam chih hatdan (speed) ah kinga hi. Tua bang mah in, I zotna mun toh bangzahta a kigamla lai hiam kinaita I hiam chih leng kinga hi.
Bangzahta a kin hiam awl in pai ta lehang, koimun tung ding chih pen manohna lam (direction) ah kinga hi. Manohna lam a dik kei leh I tunsawmna mun pen kitung ngeingei lou ding hi, bangzahta a speed hat in zuan mah le hang leng. Chihphet louh in, I tun sawmna mun toh kigamla semsem bang le kihithei hi, manohna lam zil in.
Huai ziak in, I kindan sang in manohna lam a dik ding poimohzaw hi chih I muthei hi.
Ahi a, manohna lam dik leh diklouh I theihna ding in koimun tun sawm (destination) chih telkhiak masak ngai hi. Tua I tunsawmna mun pen I telkhiak khit chiang in, tulel a I omna mun pansan in manohna ding lam hong kikhung thei pan hi.
Taksa a kalsuanna ah hibang ahih lailai in khalam kalsuanna ah leng hi veve hi.
Gingtute’ a ding in I tunsawmna pen Jesu Khrist bang a siangthouna hinkhua tungtawn a Pathian pahtawi leh phat ding ahi. Leitung a I damsung teng tualam manoh a kalsuan dingte I hi uhi. Taksa kalsuanna ding ah I hohsawmna leh tua dungzui in manohna ding pen deihtel thei I hihlai in, khalam kalsuanna ah bel ‘man a hon lei’ Pathian in hiaite ana guansa dimdiam ahi hi.
Tualam manoh in bangzahta a hat in kal I suan a?
Covid19 hipi leng ziak in March 2020 apan in biakkhawmna I neih zel pen nidang a neihdan bang in biakin a paikhawm in I hihthei nawnta kei hi. Himahleh Vanglian Pathian, bangkim tung a om ahih ziak in mun tuamtuam a biaktheih ahi a, a thupina kilang sem hi.
Media tungtawn in biakkhawmna I neithei ua, hiai in gamgi a nei kei hi. Hunbi chiam ah leng gakbit ahi sam kei. Ei’ mimal lemtan hun leh mun ah I na en leh ngaikhe thei lai a, media ministry in Pathian’ hihna – hun leh mun in a chiangtan louh ahihna - a thak in hon musak mahmah hi.
Phet lou in, mipi paikhawm a biakkhawmna neih I hihdan tangpi ahih lai in, mimal khat kia nangawn a leng biaktheih veve Pathian ahi hi, kha leh thutak a biak ding lunggulh ahihman in. Ahitak a gen in, mipi paikhawm chiang a kha leh thutak a biakna neikha lou a ei-le-ei va kithuahkhawm a hunsa maimah hihkhak ding lauhuai pi ahi zaw hi.
“Pathian zahngahna ziak in kithoihna hing leh siangthou leh Pathian lungtuak din na pumpi uh kilan din kon ngen ahi; huai tuh na biakna dan ding him uh ahi” Rom 12:1
Stop thinking adding days to your life. Add life to your days. Everyday should be a day of worship. Aggie Sarthou
Pathian’ lungtuak biakna ding a I pumpi kilatkhiakna lam ah mimal in bangzahta in I na kalsuan ua? Mun tuamtuam a pan hong kikhahkhia thugenna leh vaiguante a Pathian biak ding kinga I hih khak leh ‘kha leh thutak’ a biakna, ei mimal mahmah a pan suak ding pen, tasam khat hikha ding hihang. Kivel ni!
Mipi paikhawm a biakkhawmna I neihte, ahih kei leh mun tuamtuam apan online a biakna vai kineite pen a vanzat lel ahihdan phawk thak in leh zang phatuam sem in, biakna taktak, Pathian pomtak biakna tuh Amah pomtak dia ‘pumpi kilatna’ ahi chih phawkthak lehang I chi mahmah hi.
Tua hileh biakna I chihpen hunseh bik leh mun khat a va paikhawm-hihkhawm toh kisai kia hita lou in, mimal I omna munmun ah hun teng a I nasep, ngaihtuah leh omdan tengteng, khat-le-khat I kisaina telvek in, biakna hinkhua, Pathian’ ‘pomtak biakna’ hinkhua hithei ding hi.
Tuabang hinkhua manoh a kalsuan chiat thei ding in vanglian Pathian in hon makaih in hon ompih hen aw!
NOTE: Thugelh tomkim honpetu Upa H Kam Suanthang, tulel a EBCC Delhi chairman hihna lenlel ahi. Ama'n hun paisa in DEW/ GC ah thugelh ana pe zeuhzeuhta. Lungdam hang. Thugelhte anuai a link-te ah muhtheih hi:
https://blog.ebccdelhi.org/midang-toh-kal-a-kingaihdamn/
https://blog.ebccdelhi.org/a-haksa-ngaihdamna/
https://blog.ebccdelhi.org/kumthak-2021-thupuak/
https://blog.ebccdelhi.org/biakna-mun-leh-biak-a-om-pa/
https://blog.ebccdelhi.org/hattak-leh-hangtak-in-om-in/
https://blog.ebccdelhi.org/thil-neu-leh-thil-lian-a-ding-a-muanhuai-pathian/
