Thumapi: EBCC Complex Dedication & Ground Breaking Program, Bhalswa (Burari' kiang) ah Aug. 28, 2021 @ 2:00 PM in neih na hita. TOUPA hoih hi. Hiai hun ah EBCC Delhi & Central Delhi, Pastors Prayer Fellowship (PPF), Delhi akipan & midang tamloute cial hi ua; biakinn mun di latna leh suangphum honna Rev. Paukhanmang Guite, Gen. Secy. in ONLINE tungtawn in nei hi. Hiai ni a lei tawhna (ground breaking) hun zang Upa Lalthanghlun Guite, Chairman, CEC - hunzek 03te zat zawh a - DEW/ Gamchiam saite tawh a houlimna uh, a nuai ah aw. Nipini nawn cia'n, TOUPA'N lem A sakleh, DEW ah Htp Upa Darneingam, Chairman, P&FSC tawh houlimna suahzom hi di. Simtute, TOUPA thupha!.
1. Heutute, tutung Delhi n'ong zinsan uh - EBCC Complex Dedication & Ground Breaking Program - zou hita mai maw. TOUPA hoih hi. Hunzek 03 zat a omte etkik in bang ci na sa uh? Joint Building Committee tawh kisaina, vaisaina ah bang khawng in hon kipaksak a.
Dawnna: EBCC Complex Dedication & Ground Breaking prog toh kisai hunzek 03 zat a omte manpha leh thupi ka sa. Committee Member-te kipumpiakna ka muh in hon kipak sak.
2. Tutung Delhi vai adi'a nana kithawina uh hun sawt kuam paita akipan ahi ngei di. Tua sung in Khalam-salam ah muh thak, theih thak (TOUPA hon houpihna) cih bang om hiam.. omleh hon-gen in.
Dawnna: Hiai toh kisai in tamveipi Toupa ka sam a, 'Kei leltak' chih kia ka lungsim ah tamden hi. Atawp in Pathian muanna in hangsanna hon gahsuah hi.
3. Nipini (29 Aug), 2:00 PM - Na thugen in honchawm in saptuamte tha guan hi. DEW/ GC simtute theih di'n tua ni a na thugen tomkim hia'h n'on taklang thak thei dia'm?
Dawnna: Nisim 29.8.2021 ni a ka thugen laktom hiai bang ahi: Kipumpiakna gahsuah lohchinna ahi . David in kei lam a bangmah senna omlou in Pathian kiang ah haltum thillat ka laan kei ding (2 Sam. 24:24) chia Pathian lungkimna a khoihkhak ziak in a gam in damna ngah hi. Esther in, "Dan bangzaw ahi kei. Ka man leh mang ka hi mai ding," chia kumpipa saplouhpi a pisa a valut ngam ziak in Juda namte'n hotkhiakna ngah uhi (Esther 4:16). Joseph pianpih Benjamin suak-le-sal di'a mat a om himahleh Juda in, "Kei, Benjamin taang in na suak-le-sal in ka om dia; ka nau Benjamin khah in lan a ute zuisak in" chia a kipiakna in thudik puanna leh ngaihdamna tun hi (Gen 44: 33). Phak 4te'n, "Khopi sung ah lut ni chi le'ng kial ziak a si ding, hiai ah om ni chi le'ng le si thouthou ding," chia sih ngam a Suria sepaih camp a vahoh ngamna ziak un Samaria kulhpi sung a kial ziak a si dingte tengteng hunkhia uhi (2 kum 7:3-7). Huaiziak in DELHI khopi a biakin lam thei dinmun a i dingh bangzaw thupi lua leh hampha lua i hi. I kipiakna a san zoh phot leh lohching ding, zat senglouh sum thoh, honglut ding ahi. Central Govt. in DA 10% a hon punsak bang kumkhat sung i biakin lamna di'n thoh maizen le, lohsap chih om mahmahlou ding hi. Heutute'n i biak Pathian nungzuihna ah i kipiakna a san photleh i gahsuah di'a, huai bangmah in i biakin lamna ah i thohzah a san photleh saptuam member dangte apan leng a hong lut tam ding hi
4. EBC Pawlpi ah 'Khawpi saptuam' bangzah a dingta ngut? Tuate lak ah mun-le-mual tawh khawsa, koi tualsung saptuamte bang ahi ua? Maban ah adg ngim simsim, pipeline a om om hiam?
Dawnna: NE tellou in khopi saptuam 7 bang phata hi. Delhi ah biakin khat neita in tu'n khat lambeh sawm i hi. Bengaluru ah gam nei in biakin lamlel uhi. Kolkatta ah gam lei mahle uh felchiah thei nailou a; Chandigarh, Chennai leh Mumbai ah saptuam dinkhiak himahleh mun-le- mual chih ding om tadihlou hi.
5. Mun-le-mual neihna di'n, adeuh khol in khawpi ah, sai di neneuh om. Lungkiakhuai a.k.l. kisikhuai phut khak hun leh mun bang om hiam? Omleh tuate bangci'n na pal mualsuah zel ua - Experience sharing, nou heutute apan zak nophuai e.
Dawnna: I Saptuam paidan in Local khut ah nna tamzaw kinga hi. Local saptuam, Pathian it, mi fel taktak om ahihban ah i biak Pathian eilam a pang hi-ngal buang ahihchian lungkiak luatna ding ka thei kei hi. Buaina bawl sawm akipan pawl hilou in Jesu Khrist in a lamkhiak saptuamte ahi.
6. Jesu Khrist Suangpi tunga lamtouh tualsung saptuamte, betu saptuam apan theihpihtu saptuam (from worshipping church to witnessing church) hi di'a lamet I hi. Tua dana et in EBC tualsung saptuam te na muhdan tangpi banga? Heutute'n mipite bangci paipih le'ng hoih banah a hing saptuam hi seem di I hi ua le?
Dawnna: Saptuam sung leh polam hindan kibanglou om lailai abang. Khalam gahte ban ah Mimal kipumpiak thumna, Laisiangthou sim leh i gente hinpih le huai akipan in Saptuam hing seem hihna gahsuah ding hi.
✓Na LST tang deih leh laa deih khat veve le aw.
Dawnna: Laisiangthou tulai a ka deihbik banah ka sim chiang a ka taisan theihlouhte:- Sam 118:17 - "Ka si kei ding, ka dam ding hi. Toupa thil hihte ka theisak zaw ding". Jakob 4:8 - "Pathian naih unla, Ama'n ahon naih ding." Pathian ngaihla No. 401 - "Aw Kalvari tang gal in ka don a.." chih la, inkuan kikhopna a ka sak mun uh leh deih mahmah, ka zi in zing leh nitak a ka compound sung ua, S.Pausianlian in a sak play kawm leh Halleluiah chia kikou kawm a a laampih gige ahi.
7. Heutute lak ah senior lawitak na hita hi. Sepna/ dinmun tuamtuam lette leh innkuan khawsa na paipih dan (work-life balance) saulou n'on gen thei dia'm?
Dawnna: Manipur State Govt. ah Deputy Secretary in ka pension, ka zi Chingzaniang leng Corporation a Clerk nasem in, tun EPF pensioner ahi. Tapa nih leh tanu nih goutan Pathian in hon pia a, sepna, khosakna leh zi leh pasal nei chiat in inkuan khosa uhi. Numei leh pasal nasep ding chih khentuamlou in a neulai ua kipan mahni kuang (plate) chiat kisil, school/ college/office suty chiang a compound leh inn hahsiang, puansawp chihte social work ka puang zel uh. An huan leh meh huan siamchiat in hong khangkhia ua, tu'n ah Lamphel a ka tapa Upapen, a zi leh a tate pasal nih leh numei nih toh ka khosa ua; nu-le-pa, pi-le-pu' phutluih a sawm ziak hilou in a neupen inle inkuan biakna neih ding chih lungsim ah kiphuh denta hi. Music, keyboard, guitar leh khuang toh Pathian phat khawm in niteng in minute 10/15 ka zang gige thei uh.
✓DEW/ GC simtute thu vaikhah nop, na neih bang le awle.
Dawnna: Dew/GC saite'n hiai bang hamphatna na hon piak ziak un kipahthu leh lungdamthu ka gen hi. A saite hun extra piak hituan lou, mi tengteng in hun kibang i neih lai a nou hiai bang semkhe bik theite zahna salam ka hon pia hi. Delhi khopi a EBC Saptuam om tengteng tung ah DEW tungtawn in zahna chibai hon buk kawm in kipahthu ka gen hi. Delhi khopi a na teen uh a mawkna hilou in Pathian in PURPOSE nei a hon koih ahi. Mi poimoh leh mi thupi na hi uh. A selam sang in a hoihlam promote tou gige kawm in sem thei le EBC Saptuam leh Zomi nam, khovel theihphak in Pasian in hon lamtou ding hi.
