Himahleh, kitaitehna lam ka maban tun ding leh, Toupa Jesu kiang a huai nasepna ka muh pen semkhin phot leng, ka hinna leng khiaklah tuak in ka sep kei hi (Nas.20:24).
Khovel a bang tan dam ding ? chih leh chikchiang a si ding chih i theih louh dan uh mi teng teng kibang vek mai ding hi. Laiasiangthou tungtawn a sehsak a i om tan tuh kum 70 bang, hatna ziak a 80 bang hithei chih chiang khawng ahi. Khenkhat kum 80 sang a damsawtzaw leh kum 70 tung man lou a si tampi om hi. Damsung kum sawt leh tom thupen a tuam hihenla, damsung hun bang chi zat, bang bang sem khia,i sep teng teng thanuam tak leh kilop tak a i sep uh ahi na diam chih dotna poimoh ahi.
Tulai khovel khang hattak lak ah semtu senior deuhte a ding in sin beh ding zil beh ding leh ki update na ding hong tam mah mah hi. Kipat tung lai a, a hoih lawi leh fit mah mah hinapi tuchiang a ding a thing lawta, fit nawn lou chih bang om theih ding hong bang ta hi. Huchih laiin a hun toh kituak a ki update zou gige te bel thupi lua uhi. Vanzat bang zong neih zoh ngai, chidam ngai, hun leh tha piak ngai, limsak leh lunggulhna mah zong poimoh pen lai hi. Ei kia in i zoh louhte kipanpih tuah siam zong poimoh, kumpite leh private companyte bang in a semtute uh training pezel un hih hoih mah mah uhi. Sawltak Paul thugen tampite lak a tuni a i telkhiak te uh hiai anuai a bang in genkhawm leng ichi uhi:-
1. KITAITEHNA:- Niteng hinkhua tuh kitaitehna a dim ahi. Na bang teng sem, bang zah sem zou, koi/bang tan tung ta, bang chi sep ? Huai ah kuate hat pen ? kuate siam pen ? kuaten ma telh pen ? thugente lak leh lasate lak mah ah leng kitaitehna ngen mah hi in, kua la siam pen, thugen kua siam pen ? kuan sa siam pen, kuan gen siam pen ? Hiai teng teng banah naep a kua gin om pen, kua kuhkal pen, kua chitak pen, a awhoih, a la hoih,a sak dan zong selou, himahleh a satu pen a omdan hoih lou chih chiang in mark a muh ding zah mu lou di hong bang mok hi. Thugen lah siam a theih le thei, ngaih khiak nuam lua chih chiang khawng hileh mark akim a mu ding hinapi “athugen a man hinpih lou” athu gen a teng lou, a kichih touh lai chiang in a sam om ahihman in mark zong a full a mu lou suak ta hi.Paul in kitaitehna ah a khatna, a nihna a buai lou in a maban ‘matut’ ding bel poimoh sa chih kimu thei hi.
2. NASEPNA KA MUH PEN:- Kumpi nasepna muh ding pen mi tampite ut leh lunggulh ahihmah bang in kum teng in tampiten mu in sem uhi. Eimi khawngte bel a nna a lunglut chih lam sang in loh nei ding, khasum sang ding chihna lam mah hitadih phot hi. Sawltak Paul in bel Toupa Jesu kiang a kipan a muh huai nasepna pen thupi sa mah mah ahihdan muh theih hi. Sum loh hilou in, a nekmuhna ding in puanbuk (tent) bawl in zuak zel a, huai a a muh bang bang tuh a kivakna ahi kichi hi. Himahleh a theih chet mah mah tuh a sep nna, a neitu leh huai nna sem ding a samtu hihna leh dinmun a thei mah mah mai hi. I theihsiam ding in gen leng state government nuai ah leng na tampi sep ding a om mah bang in semtu tampi petmah leng om hi. Huaisang a deih huai zaw leh mi tampite telzawk tuh Central Government service ahi, huai ah leng Union Public Service Commission (UPSC) conduct na tungtawn a muh sepnate bang thupi isa uhi. Huai ah tuh thuneihna a lian a, huai dungzui in a loh mah leng tam pah geih hi. Hiaituh mihingte tehna dan leh muhtheih sepna toh kisai a kitaitehna thupitak mite lungulh tuh ahi. Hiai a nna nei tu leh enkaitu tuh India phualpi a kumpi leh vaihawmtute ahi uhi.
3. NA NITENG HINKHUA A:- Jingkal na thoh akipan nitak na lup nawn ma teng a na buaipih leh na tawlpih, na lungsim teng, na hatna teng, luah dimtu, na delh leh hon kai tun tun bang khop a na zuih law law sek pen bang hi in na thei a ? Na hun manpha teng nebeitu, na tha hatna teng ne kiamtu, gimtak leh tawltak a i om a leng ka gim, ka tawl chi ngam lou zen a i delh uh MINTHANNA hia, HAUHSAKNA hia, NOPSAKNA hia, LUNGKIMNA hizaw hia, ahihkeileh DAMSAWTNA ? Hoih takin kingaihtuah thak leng i buai pih leh i gimpih mah mahte uh itate kiang a leng piakson theih louh, isih chiang a leng i ken theih louh, ei toh bei khawm ding lel khawng a na himaimah thei himok veh aw.Sawltak Paul in tuni a itang tel a a gen, a sihma a sep tei tei ding a deihhuai a sakte – Ama a kitaitehna matut/zoh ding leh Toupa Jesun a got nasep ding pen semkhin phot leh chih tuh a damsung a hinpih ding, sihni tanpha a huaimah buai pih pen a neih ding chih ahi.
