Midang Toh Kal A Kingaihdamna

Pulakna

Covid19 hipi leng nuai ah sihna limguam tawn a pai bang a kithei a I pai lai in leh it-le-ngaih bangzah hiam in hon muallliamsan tatak nung un, amaute’ sang a hoihzaw, ithuaizaw, ki-itzaw, kithutuakzaw leh kihoutheizaw hituan lou eite Pathian in hon kem leh veng lai a, A zahngaihna ziak ahi chih phawk in kipahthu I gen masa ahi.

Hoih bukim lou mihingte I hihlam kiphawk in leh tua ziak mah a ngaihdam kisam gige leh tua kawmkawm a ngaidamna pesawntu hiding a lamet a omte I hi uhi

Ngaidamtu leh Ngaihdam a ompen Bukkakna

Ngaihdamna I chih chiang in a kihelkha a pangkha party zil in chi 3 in khentheih hi: khatna ah, Pathian in mihingte a ngaihdamna, nihna ah, Mihing-le-mihing kingaihdamna leh thumna ah Mahni-le-mahni kingaihdamna. Tuate lak ah I gensawm pen a nihna ahi.

Midang toh kal a kingaihdamna I gen chiang in a tawmpen in mi 2 telkha hi. A ngaidamtu leh ngaihdam a om pen.

Ngaihdam a om pen tuh a hihkhialtu ahi. Aman kisik in ngaihdam ngen thei a, liau thei a, a lehlam ah kisiamtan nilouh thei hi. Bangteng hih in hih kei mah leh ngaihdamna a tan ding leh a tan louh ding pen amah khut ah kinga lou hi.

Ngaidamtu in amah thu liauliau in ngaidam thei hi. A hihkhialtu in ngaihdam a nget hiam nget louh hiam, a liau leh dit hiam liau/dit louh hiam, kisik/kisuahlah leh kisik/kisuanlah louh chihte ah kinga lou hi. A hihkhialtu pen bangzahta a kisik in, kisuang lah in liau in ngaihdam ngen mah leh ngaidam lou thei veve hi. A ut leh a hihkhialtu apan bangmah ngiat sese lou in leng ngaidam thei veve zel hi.

Hiai ah deihtel theihna, ngaidam ding maw, ngaidam lou ding chihthu ah, deihtelna, thupukna a bawl kisam hi. Deihtel a thupukna bawl thei dinmun ahi hi. Himahleh, tua a deihtelna thupukna in bang chi bang gah suang ding hiam chihpen aman tel thei nawn lou hi, amah khut ah kinga lou hi.

Deihtelna Hinkhua

Mihing hinkhua leng, a pumpi a gen in, deihtelna hinkhua ahi hi. Life is a series of choices followed by a series of consequences.

Zing I thou a, chih phet louh I thohma, I khanloh apan I lupkhit a I ihmut tan dong in deihtelna hinkhua ahi hi. Khanloh phet a thou khia a, kihahsiang a, nekledawn khawng ban ah sun chiang a koi a hoh a bang hih di chihte ban ah nitak hong hi a, lumta di maw, ahih kei leh lupnung a le bang thu ngaihtuah di chihte, deihtelna ngen ahi hi. Akhente I zongsatsa (habitual) thil ahih ziak in ngaihtuah luat ngai lou in deihtelna kibawl pahpah hi – deihtelna omsa zuihthoh lel in. Akhente lah ngaihtuah petmah kisam hi.

Na hih ding leh hih dingdan deihtel thei dia zalenna nei himah lechin na deihtel pen in bangchibang gahsuah ding hiam chihpen na telthei kei hi. You have the right to choose your course of action, but you don’t have the right to choose the consequences of your action

Ngaihtuahna Hinkhua

Huchi ahihleh mi’n I tung a bang hiam hihkhelh a neihchiang un bang I loh a chih limtak a kivel tuak ahi. I pona ua, poi I sa ua, ei’ sang a hatlouzaw bang ahih ua leh thuk ut, phuba la ut, liausak ding chih khawng ngaihtuahna I nei uhi. Ei sang a hatzaw I zoh louh ding a hih ua lelah I heh velvul maimah uhi. I tung a hihkhial a om chiang in hiai teng lak a khat hiam, khat sang a tamzaw hiam ahih kei leh a vek bang in leng I suangtuah uhi. Ngaihtuah bangbang va semkhe vek kei mah lehang ngaihtuahna I seeng ua, I ngaihtuahtuah mai uhi.

Laisiangthou in bangbang ngaihtuah ding in hon sawl a le?

Laisiangthou in I ngaihtuah ding a a gen bangzah hiam om hi. Pathian nasep ngaihtuah in: Ama'n a kawisaksa, kua ahia bawl tang thei ding leh? Eklijiasti 7:13. Miksi kiang ah hoh in, nang thadah; a lampite ngaihtuah inla, pil in, Paunakte 6:6. Gamlak lili pak khandan hoihtak in ngaihtuah un, Matthai 6:28. Ka thugentak ngaihtuah in, 2 Timothi 2:7. Innsung khosak ngaihtuah uh hen, 1 Timothi 5:14. Ahon sapna ngaihtuah dih ua, 1 Korinte1:26. Pathian mitmuh in Pathian thu man sa'ng in noumau thu man a dik zaw hia ngaihtuah un, Nasepte 4:19. I thu gin a Sawltak leh Siampu Lian, Jesu tuh, ngaihtuah un, Hebrute 3:1. Na khalam ua na bah ua, na lungkiak louhna ding un, mikhialte a pan a huchibang a selkalhna thuakpa tuh ngaihtuah dih ua leh, Hebrute 12:3. Mi tengteng muh in thil kilawm ngaihtuah un, Romte 12:17. Thil dik peuhmah, thil phathuai peuhmah, thil kilawm peuhmah, thil siangthou peuhmah, thil hoih peuhmah, thil minhoih peuhmah, hoihna himhim a om a, phatna ding a om a leh, huai thilte tuh ngaihtuah un, Philipite 4:8.

Hiaite apan I muh bang in, mi’ hihkhelh khawng ahih kei leh ngaihdam ding leh ding louh khawng, ngaihtuah dingte’ lak ah Laisiangthou in telsak lou hi.

Ngaihdamna toh Kisai a Pathian Deihdan

Ngaihtuah sese ngai lou ding in hih dingdan kichiantak hon lak khin a, tuate zuih di leh zuih louh di pen ei thu ah koih in zalenna hon pia hi. Ahihleh Bible in bang gen?

1. Khrist ziak a Pathian in hon ngaihdamna enton a midangte ngaidam din hon hilh: Kuapeuh in kua tung ah leng thubuai nei bang hile uh chin, kithuakzou chiat in, kingaidam tuah unla, Toupa'n a hon ngaihdam tak bang in, kingaidam sam un, Kolossate 3:13. Huan, kihehpih chiat a lainatna nei in om unla, Pathian in Khrist a a hon ngaihdam bang in, noumau leng kingaidam tuah chiat un, Ephesate 4:32. Hiai Laisingthouten thubuai neithei I hi chih hon pompih a, kithuakzou din hon hilh a, Toupa/Khrist ngaihdamna enton a ei’ tung a hihkhialte ngaidam din hon hilh hi.

2. Midangte ngaihdamna siksan a mahni khelhna ngaihdam ngen dia hon sawl: Matthai 6: 14 ah mi a tatleknate uh na ngaihdam uh leh na Pa uh van a om in leng hon ngaidam sam ding, achi hi. Tua ban ah, Jesun thum didan hon sinsak a, “Ka pa uh van a om…………Ka tung ua khialte ka ngaihdam bang un, nang leng ka khelhna uh hon ngaidam in….” Hiai pen Pa chi a Pathian samtheite’ thumna ahi. Pathian pen Pa a chi thei loute a ding a hi kei a, Pa chihtheihna dia thumna leng a hisam kei. Pa chitheite kia thumna ding ahi.

3. Midangte’ khelhna ngaidam loute amau’ khelhna ngaidam lou dia vau: Matthai 6:15 ah “Mite’ tatlekna na ngaihdam kei ngal un, na pa un na tatlekna uh a ngaidam sam kei ding hi” achi hi. Hiai thu genchetna ding in Jesun Van gam kumpi khat a sum thu saifel tum a, a sikha sum bate sam toh kisai tanchin a gen hi. A sikha khat in talent 10,000 a bat dinzou lou a om man in a zi-le-ta zuak a din ding in thupia hi. Himahleh hon pena ding ka hi chi a a nget ngutngut ziak in khah in a batte ngaidam zomah hi. Tua sikhapa’n bel a sikha hihpih khat, makhai 100 ba mu a, a bat a dit zohlouh man in suangkulh ah khumsak hi. Hiai thu sikha dangten van gam kumpipa va hilh ua, aman “Sikha gilou, n’on nget ngutngut ziak a na hon bat tengteng hon ngaidam hi ing a; k’on hehpih bang in nang leng na sikha hihpih na hehpih sam ding hilou hia? Matt 18: 32,33 a chi hi. A bat a ngaihdamsa bang leng lehkiknawn a bang hi. Hiai thu a gen zoh in “Michih in na lungtak tak ua na unaute na ngaihdam kei uleh ka pa van a om in leng huchi mah bang in na tung uah a hihsam ding” Matt 18:35 chih toh a thuah hi.

Mi 2, Lampi 2, Tawpna 2

I tung ua khialte ngaihdam ding leh ding louh toh kisai ah Pathian’ deihdan kitel sitset hi. Pathian’ deihdan zui ding maw zui lou ding chih ei’ thupukna leh deihtelna a kinga ahi hi. Azuite’ tunna tuam a, a zuiloute tunna leng tuam bok hi. Sam 1 na mi 2, lampi 2 tawpna nih kigelh hi.

Pathian limsakte bel “Tuiluang kiang a singsuan, ahun a gah zel, anah leng kai ngei lou bang ahi, chi a, “A thilhih peuhmah lamzang zel” chilai hi. Pathian limsak loute bel “Buhsi huih in a mut leng bang ahi uh” a chih ban ah, “Mikhialte’ lampi mangthang ding” chilai hi.

Hiai gelhtu kumpi David ahi. Amah leh kumpi Saul hinkhua tehkak dih. Amau gel tuh amau’ utna leh kinget ziak hilou in Pathian in kumpi ding a a thaunilh ahi uhi. Tua dungzui in hih ding kichiantak leng a hilh hi. Himahleh Saul in Amelek mite thahvek ding chih thupiak zui lou a, amah sep louh ding pi kithoihna bang lan thethup hi. Alehlam ah, David in leng Pathian thu palsat in, angkawm in, a sepaih muanhuai bang thatsak in, mipi peuh sim a, Pathian’ deihdan pialsan hi. Himahleh Pathian in ka lungsim bangpu a chi thethup hi.

A hihkhial tuak ua, himahleh Pathian’ deihdan a zonnawndan zil un a tawpna uh kibang het lou hi. Saul bel a suanten kumpi hihna len lou ua, David bel a suanten tangtawn a kumpi hihna len ding chih ahi hi. Atapa Solomon leh a tasawnte lak a  kumpi khenkhat in Pathian’ deihdan pialsan in milim khawng biaksan mah le uh Pathian in a thuchiam tangtun teitei hi - Amah ginomna ziak in, David ginomna ziak hilou in.

Kumpi David leh kumpi Saul tawpna kibang lou tuh mi a ngaihdam uleh ngaihdam louh ua kinga ahi ka chi kei. Pathian’ deihdan a zuih uh leh zuih louh ua kinga ahi hi.

Thukhitna

Midang ngaihdamna toh kisai in Pathian’ deihdan kiteltak I muta – Khrist ziak a Pathian ngaihdamna I tan bang a en le midangte ngaihdam ding, midangte I ngaihdamna pansan a ei’ khelhnate ngaihdam ngen ding leh tua bang zui loute ngaihdamna tanloh khak di vauna.

Huchi ahihleh Pathian thu – ngaihdamna toh kisai a Pathian deihdan, zui ding I chi diam, zui lou di I chi diam? Ei’ thupukna leh deihtelna ahi. Ahihhang in tua thupukna deihtelna I lak bangbang in a gah bangchibang suang ding hiam chih I deihtel thei kei hi.

Pathian’ deihdan a midangte ngaidam thei ding leh tua ngaihdamna toh kizui hamphatna tang thei ding in Pathian in hon vualzawl hen aw!

------------------------

NOTE: Thugelh tomkim honpetu Upa H Kam Suanthang, tulel a EBCC Delhi chairman hihna lenlel ahi. Ama'n hun paisa in DEW/ GC adi thugelh ana pe zeuhzeuhta. Lungdam hang. Thugelh ana piaksate hiai anuai a link-te ah muhtheih hi:

https://blog.ebccdelhi.org/a-haksa-ngaihdamna/

https://blog.ebccdelhi.org/kumthak-2021-thupuak/

https://blog.ebccdelhi.org/biakna-mun-leh-biak-a-om-pa/

https://blog.ebccdelhi.org/hattak-leh-hangtak-in-om-in/

https://blog.ebccdelhi.org/thil-neu-leh-thil-lian-a-ding-a-muanhuai-pathian/