Thil teng teng etdan kibang lou a et theih leh muhdan kibang lou a muh theh vek ahi. Pianken a thil tung leh mihingten i thuneih khum theih louh thil hong tungte leh hong om zelte ah zong etdan chi nih bang a et theih gige ahi. A hoihlam ngen mu lou nei mi leh a selam kia ensek louneimi tan chn i gen ding. Vuah a zuk chiang in a hoihlam musek louneimi in “Ka haichinte uh tui non piaksak ziak in Toupa kakipak” a chi hi. A selam kia ensek pan ahihleh “Hi e, hichibang a vuah a zuk touh zel in tuh I haichinte uh kise vek dia, haithak lak ding bang mah kinei hetlou ding ei ve”, a chi hi. Ni hongsa nawn leu leu a, a hoihlam etsek tun tuh “Toupa ka haichite uh leh kou a ding mah mah a leng poimoh nisa akipan an hoih leh manpha ngah ka hihman un kakipak uhi, Tukum tuh kou lah chidam ding, ka haite uh zong hong gah pha ding, haithak lak ding hong tam ding ei ve” a chih lai in. A selam ngen a thil entu lounei mi in ahihleh “Hih zaw himah e, hilehleng hichi bang a ni a sat touh zel leh tuh, i haichin teng teng uh vuai vek dia, si vek ding, lak ding mawng mawng om ken teh” chi in a kisu lunglel dim dem zel hi. Vuahzu leh nisa phattuamna neituak etdan leh muhdan kibang lou koilam na neh zaw a nang.
Na hinkhua ah thilteng a hoihlam a et sawm in. Mihing lungsim lam sui miten i ngaihtuah mun lam lam nga in i khosa sek uh chi in a gen uhi. Huaiziakin na ngaihtuahna in thu hoih thuphate, kipahnate, khamuannate, vualzohnate khawng niteng a a ngaihtuah chiang in, huchi bang lam ah kal isuan sek hi. Muhdahna khawng, hazatna khawng,huatna khawng na ngaih tuah tuah leh kuamah nang lam a pang ding leh hon it ding, hon deihsak ding na mu kei ding a, na kingaise gawp ding hi. Na ngaihtuah mun pente mah na gen munte hong hi ding a, na kampau za ten na hihna a thei ding uhi. A vangphat huai mah mah khat bel, i ngaihtuahna leh i thil etdan khek theih ana hih mah mah i hampha law tel uhi. Pu leh pate khang a pan tuahsiatnate, i tuah haksatnate sial sial in ei leng a mial lam leh a hoih lou lam ngen kipe gige leng tuahse tou zel lai ding, dingsuah ngei lou ding hihang. Himahleh tuahsia khanggui pen tuahpha khanggui hihsak sawm in, nikhat tei mite laka theih phakbat a ka om masiah chi in pan la in, tua ding in leng Pathian kiang ngen in huai lampi mah leng tawn leng a hih theipan “Ngen un piak in na om ding uh” chi ahiman in, a thuchiam a zuau ngei lou Pathian in hon pe ngei ngei ding hi. Na ngaih tuah na ahilou lam ngaihtuahna apan ahihlam ngaihtuah ding in khek inla, haksa sim mah leh kuhkal taka panna lak nak leh khat vei tei na lohching ngei ngei na ding hi.
Hong tung ding gintak huai pipi, mi muanhuai leh na etton simte khawng a pat “Na hi thei tuan kei ding, na haksatna lian law deuh ahi, mi a toh leng kibang lou, na leiba leng nang khang a le din zou lou ding na hi” chih bang na za kha lai mai thei. Hon awlmoh leh hon hehpih mah mahte akipan bang leng himai thei hi. Himah nang hatna leh thil hihtheihna a na palzoh nawn louh lungkhamna tuipi pal na hita, nang leh na tanauten a loh ding dan na theih nawn louh uh buaina leh puakgik tuh nang na lelh mah mah lai takin “Nou semgim leh puakgik poteng teng te aw, Ka kiang ah hong pai un, keiman khawlna ka hon pe ding” a chipa kiang zuan in pai inla, na puakgikte hon dawn nuam pa kiang zuan lechin aman hon dawn ding, ama hakkol a nuam a, a puak leng zang chi ahihman in, zottak, belh tak pen dng hi. I inkuan, ibeh leh phung teng, sung leh puteng toh kikup nung a leng veng lou thubuaite “Hong pai un ngaihtuah khawm dih ve ni” chi a hon sampa kiang zuan in pai leng hon ngaihtuah pih ding a, a hoihlam na kipiak theih louhna setan in a luahdim ngaihtuahna Pathian luahsak lehang vak hong tang khe ding a vuallelhna a pan vualzohna ah, aselam apan a hoihlam ah hon pi ta ding hi.
Kum 38 damlou pa kiang a Jesu a pai lai in dotna poimohtak “Hihdam na ut hia ? chi in dong masa hi. Damlou pan leng a tanchin teng gen in hihdam theipa kiang a kipuang hi. A tanchin a gen teng teng a zak nung a Jesun a gen louhte:- “Nak hehpihhuaina chia maw, na inkuanten leng hiai tan hon tut ngal uleh hon taisan mai lou in tui kitoh hon ngakpih leuh hoih ding hi a, lawm hoih hon hehpihtu ding nei lou maw ? Na hehpih huai lua a, na khut hon khak dih ken kon kai tou ding, chi in a dam loupa inkuan pihte leh midangte mohsa lou hi. “Thou inla, na awngphah la inla, khe in paita in” chi in, amah mah in ahih ding in thupia hi. Hiai thupiak thumte tuh chikmah a ahihtheih ngeilouh ngen ahi. Himahleh thupetu Jesu muanna toh a hon hihchiangin hih thei in dam himai hi. Nang leh ken leng ihih theih ngei louh, a hoih lam lohchinna leh masawnna kinem ban lou a om gigena apan Jesu muang a thilhoih hong tung ding lametna lung tang toh a hoihlam mitsuan theiding in Toupan hon vualzawl hen.
