Keimah lou in lah bangmah na hihthei ngalkei ua..............., Amah hon hihhatpa ah thil tengteng ka hihthei hi. Johan 15:5 & Philippite 4:13
Eimah ikitheih dan sang a hon theichian zawtham, pawlam mellat vuak hilou a lungsim tawng tanpha hon theisuak khat om a; aman tuh bangmah hilou ihihdan leh eimah a bangmah hihtheih neilou ihihdan hon theichian mahmah hi. Mihingte tuh ina kitheihchet louhdan, dinmun hoihdeuh a dinkhak nikhua a khutkuak sung a khovel tawi bang kisakkhak baihlam mahmah. Himahleh Toupa Jesu’n tuh, amah lou a bangmah hihtheih neilou ihihdan honna theichian mahmah in, niteng khawsakna thulel ahleng ‘hiai lelleng hihtheiloute bang in, bangdia thildang lunghimoh nak na hi ua’chiin (Luka 12:26 ah) nungzuite ana taihilh ahi.
Huaiziak in, eite tuh Pathian theihchet luatte ina hi chihna ahi a, hamphathuai mahmah hi. Huai sang a hamphathuai zawsem ahihleh lei leh van bawlpa Pathian; eite theihphak ding a ahong kikoihniamna ah ahi. Khovel leh a sung a thil omte tengteng siamtu’n tuh a thilsiamte lak a khat ahon theihchet ding tuh thil lamdang hilou hi. Himahleh eimah thulimlouhna ziaka, a melma a ina kisuah khitnung nangawn a, itna ziak a amah aa hihnawn theihna ding lampi hon bawlsak a, a tapa hilhial a tatngam ding khop a ahon itna – hiai ahi thil lamdang, a lamdan luat ziak in mi tamtakte’n ina theihsiam louh uh. Khelhnate ziak a pumpelh vuallouh tangtawn sihna in maban a honna ngaklai a, ei sik leh tang a tapa’ hinna ahon luikhiak a, eite’n tangtawn hinna ina neihlawh hilhial, a thupi luatziak in Khasiangthou pina lou a mihing lungsim in theihsiam zohlouh mah ahi. Hiai thilthawnpiak a hamphathuai dan theisiam a, huai mah ahi ka taksap chiá kipak tak a sangthei eite hamphatna, laphuaktu Pastor S Thangkhanmang in ‘Kei kan a hampha omtuan ding hiam….’ana chih.
Ahi a, hiai hotdamna hamphatna tuh tutdet pih mawktheih hitheilou in, huai ineih apan gingtu hinkhua hong kipan hiphet ana hi a. Hotdamna ngahna ding in eilam hihtheih omkei mahleh gingtu’ nungzuihna hinkhua atuh hihding mohpuakna leh tanvou tamtak toh hasotna piak in ki om hi. Huai ahihlai in, i tangtel a Toupa Jesu’n agen, amah lou a bangmah hihtheih neilou ihihdan chiangtak a theihsak in i om hi. Hiai tak ahi i hamphatna sawnsawn uh, ei hihtheihna omloupi zangding a sawlluih hilou a, khuavannuai vaihawmpa’ thilhihtheihna toh tanvou leh mohpuakna semkhe ding a nna got a i om.
Sawttak Paul intuh Korinth khua a Saptuamte kiang a a laikhakna (1Korinth 6:19-20) ah man a leisa ihihtak ziak a i pumpi Khasiangthou temple hita ahihthu, huaiziak a i pumpi ua Pathian pahtawi ding ihihdan honna sinsak hi. Huai in tuh i taksa kepsiangthou a poimoh dan, thilchiin - tep leh muam ahleng Pathian temple siangthou sukbuah louh ding ahihdan hon sinsak hi. Huan ah, leitung a khawsa hilai mahle hang, lei a thil omte a ngalou a tunglam a thil omte a lungsim nga ding in (Kolosate 3:2) hasot a om in, kawlmong pha a athu theihpihte (Nasepte 1:8) hiding i hihdan bang, leh innkuan khawsak dingdan leh kisai dingdan (Ephesate 5:21 – 6:9) bang leng sinsak in i om hi.
Huan ah, man a leisa himahle hang, leikhiaknapa khel gamtat mahmah in leikhiaksate laksuh kiknawn theihna lemtang zong gige ahihdan bangleng chiangtak a hon theisak a vauhilh (‘Pilvang unla, limsak un; na melma uh Diabol humpinelkai humham bang in nekthei ding zong in a vialvak hi 1Peter 5:8) in i om uhi. Hiai thupiakte i sepzoh theihna ding bang leh melmapa i douzoh theihna ding leh i zoh khit nunga leng i dinkip theihna ding in Kristian Galvan bukim (Ephesate 6:11-17) bangle piak in i omlai hi. Tuateng toh gingtu hinkhua a gah tampi suang ding a lamet ihihlai in, amah a grape gui a i om gige keileh ei a bangmah hihtheih kineilou hi.
Huchihlai in Sawltak Paul mah in Toupa ah leh a hatna thagui ah thilhihtheihna nei a om ding in hon hasuan nawn a (Ephesate 6:10), huan Amah hon hihhatpa (Toupa Jesu) ah thilteng hihthei ihihdan hon theisak nawn hi. Huaiziakin bangmah hihtheih neiloute, I Toupa Jesu ah thiltengteng hihthei hi ihi chih thei in, kilawptak leh hangsan tak in i gingtu hinkhua zang in, thilhihthei tak a omding in kisa thak chiatni chiin iki chial uhi.
Toupa’n amah a om gige ding leh amah vang a thilhihtheihna ineihte manpha tak a zang ding in hon vualzawl hen aw.
