Kei ka hih leh Chennai khopi a khosa a, Indian Railway a sem ka hi a, Covid-19 a hong kipat in (23rd March 2020) ni in India pumpi a Passenger Train tai tengteng khawlsak ahong hi guih ta hi. Huchilai-in, sepna tuamtuam te khak in hong om a, niteng nektawm zong te a patau masa pen a hongsuak uhi. Huanah, private sector te le hon nawk zom ngal hi. Govt a sem te chiang in bel lawh kila chiat sam hi. Orgn tuamtuam- ei theih deuh te NEIWAC, ZYA-CR leh Saptuam te'n Relief Fund dong in Panpihna poimawh diak te nek-leh-tak ding pia in Panpihna veng tuamtuam ah ka bawl uhi. Huchilai in Tamil Nadu Solkar in omna di omlou leh nek-leh-tak tasam te om nadi mun li leh nga ah bawl ua, eimi bangzah hiam te'n le phattuampih kha uhi. Hiai hi-pi bangtan hon daih di chih theihlouh ahihman in State tuamtuam Solkar te'n le panla in mahni state mi leh sa mundang a nektawm zonga omte samkik/pikik na di plan hon bawl souhsouh ua, ei Manipur sungmi Tamil-Nadu a nnasem a om te pai na di Train Trip 3vei banah, State dangtawh kigawm a Trip 2vei hon ki sawlkhia hi. Lamka(ccpur dist) mi vuak mi 3000 hu bang phazou dia tuat ka hi- a list dungzui in. Thawmhau huai zawzen
Khaguk sung September 2020 kha bei tan TOTAL LOCKDOWN in hong om hi. Huchihlai in Goods Train te leh hiai Special Train te tai ahihman in Dept tamtak te khawl mah le uh kou(Railway a te) bel ni khat/nih hal khawnga kai gige ngai thou hi. I kailouh chia le inn a om maimai pen chimhuaipi suak maimah hi.
Hiai khaguk hun sunga office kai chianga Glove ki bun, mask ki bulh, Face-Shield le kizang den a, ngeina seh simsim in om man hial hi. Toupa pi-na, hoihna leh kepna liauliau in bangmah ka chi kei hi. Seppih te khenkhat a vei ommah le uh - Toupa'n hon ching ahi ka chi ngam hi. Toupa phat ni.
Huchi-in October kha luttawh hindan pa-ngai kipan dia kisa tou panpan kikhopna te bang pan nawn thei panpan chihleh 2nd Wave hongtung nawn in kei ngei leng 27th March 2021 nitaklam in Luna in hon pha ta hi. Luna maimai hilou ahihman in ka Bedroom uah ka ki khumtuam ngala, ka zi chihlouh tate tawh ki su/hih kha(lawngkha) in omlou in pilvang tak in kalnih sung ka ki khumtuam hi.
Ken ka vei na apat - theihte leh kikep dan.
Lu na pet mah bangmah ki ngaihtuah theilou. Ph le ki enpeih lou. Dolo-650 chi-sa in honphak tenga ne.
Hiai a ni masa leh ni nihni te bang bang chi ka hia chihle theih mumal om nawnlou.
Ann-kam limlou petmah banga ki ne le a lim leh al le ki theithei lou. Damna leh hatna poimawh ziaka ne teitei.
Antibiotic - Azithromycin nikhat a khat ne himhim (ni sawm sung).
Tui-lum dawndawn mai, luaksuak dek zenzen a.
Fresh Juice - Lemon a tangpi a ice tellou a dawn zelzel. Vitamin C tablet 2 ne zel ni tenga.
Huchia ni 15 zawh a halhkhia, himahleh kei honkem ka zi a zingchia hong kipan - Aman a lel zawdeuh in ka thei uh. Numei ahihziak le zaw ahi deuh dia, amah tuh ani 21 nitan a hong halh khe pan ahi. Ka kep dan tuh kei honkep dan tawh kibang damdawi nek-te le kibang.
Ha(teeth) na neilou te'n ha natdan a theihlouh mah bang ua, a veikhalou te'n le a noplouh dan, a gimhuai dan, lu nat dan le tuam velvul ahihdan gengen le le theituanlou di uh ahihman in, hiai zah in gen phot ni.
Nitak teng in innkuan kikhopna ka nei gige ua (2005 ka zi neih apat), Tuchiang dong tatsat lou in Toupa'n honpi hi, Amah phat na in. Minletna, Thupina leh Pahtawina te tengteng ka pia hi. Ken ka makaih theihlouh chiang in, ka zi in makaih in Innkuan kikhopna ka ngai poimawh petmah uhi. Hawhna/Pawtna khat nei le ung le Innkuan kikhopna tuh lap teitei di chih ka thupi uh ahi.
Khalam leh Taksa-lam, theihna, pilna leh siamna a kuamah el vual hikei mah le-ung 'Toupa kianga kiniamkhiak a, Amah biakna' ah tuh lauh neilou in ka pang uhi.
Khopi a khosa himahle-ung ka tate(a li ua) eipau a thumna kum 4 (khat a pau chiang hak ziaka 5)ahih un nei thei chiat ta uhi(thum siam, ei pau siam chihte hilou in).
Hiai hi-pi in khentuam a neihlouh dan - neih leh lam, pau leh ham, upat leh naupan thu ah kilang mahmah hi.
Toupa apan hilou ahihdan ka theichian mahmah hi.
Khenkhat te a ding-in sana halsiangna banga etchetna le hithei, Job banga.
Huailaia ka ngaihtuah khenkhat a sau pai mahmah mai a himahleh Toupa theihpih leh phalna lou in ka tungah bangmah a tung kei ding, ka tuah bangbang ah ka lungkim di ahi chih ka thupi ahi, ka zi leh tate le ka hilhsawn ahi.
Hiai khovel ah bangmah tawh ka lutkei a, bangmah keng/tawi lou mah a kik ding ka hih dan ka damlouh in ka theichian semsem hi. Toupa adia ni khat / hun khat ka zat te kia tawh ka tangtawn mun ding zuan ding ka hihdan ka chian semsem hi.
Bangkim Toupa min thupi na di'n!
