“Huai thu ziakin ka bahkei uhi, i polam mihing zawngkhal hiaihiai mahleh i sunglam mihing pen nitenga bawlthak in aomzaw hi. Ka gimthuakna neukha uh tu mitphiatkal sung kia a omdin thupina thupitak tangtawna omdingin ahon bawlsak hulhul ahi. Thil muhtheihte enlouin thil muhtheih louhte kaenzaw uhi, thil muhtheihte zaw sawtlou kala ding ahi a, thil muhtheih louhte bel tangtawn ading ahizaw hi” (2 Korinthte 4:16-18).
March 2020 apan natna hipi lauhuai takin khovel pumpi tuilian bangin hontum a, hileng khamna dingin Indian PM in March, 2020 in national lockdown honpuangin hindan ngeina zuithei nawnlou in michih kipumbuai hi. Biakna innte bang khaka omin tuni tan normal service i zangthei nawnkei a i zangthei laidiam chihle itheikei hi. I minam leh saptuam ah leng tamkhop in hiai hipi ziakin sihna hanmual honliam santa ua, adamlaite bangle banghuna hiai natna in honphadi chih ngaihtuahna toh hinkhua giktakmai kizang hi.
Ana veikha nailoute bangle hampha ahih kawmun banghun a honphadi chih ngaihtuahna ziaka lunghihmohna (anxiety) level sang mahmah hi. Ana veikha, gimseloua damte bang enhuai sakton ommawk hi, ahang bel kavei keidi chitheilou uhi. Himahleh ei gingtute, Jesu Khris sisan manpha ziaka vangam tungdia kilamen te ihihmanin i hampha mahmah hi. Khovel natna hipi in honnawk mahleh Jesu Khris liim ah bit leh lungmuangin iom thei hi. Huai in salama a lunggimna hon dawnzang mahmah sek hi.
Hiai thute ka ngaihtuah laiin khatvei khualzin, lenna ngaka airport a kaomlai kaphawk khethak hi. Lenna lah hongtun hunta, huihpi vuahpi zudia kisa huih hatsimtak nung vevu in lunghimoh takin kiom hi. Passengerte bangle tumaimai thei ki-om lou in dingzel tuzel uhi. Huchi lakpi ah lenna in hongboh theiin khonim, vuahzu huihnung vevu lakah lenna sung kalut ua, bangmah buaihuaina omlouin lenna lengkhethei hi. Khonim, huihnung, vuahzu-te tunglam pekah nisa sirser lakah kileng henhen mai hi.
Hiai ka thiltuah leh tuhun in kibatna nei mahmahin kathei hi. I tenna khovel ah lungkhamna meipi jingin dahna lusunna ten honbawm hi. Nopna ituah inle sawt daihlouin beipah zel hi. Huntamzaw ah natnate leh lungkhamna inkuan kikhennate tanpha ituak hi. Huchibang khovel a iom laiin tunglam mitsuan ni. Hiai lungkhamnate nawkphak louhna hondampa tuallenna, lungnop bukimna ngaihtuahin huaimun tungngei din kisa ni.
I Laisiangthou tangtel a i muh bangin khovela i tuahte hun tomkal sunga ding ahihdan leh thupina hongtungding toh tehtheih vual ahihlouhdan athaka ngaihtuahin huai dia mansa a omchiat din i ki-hasuan hi.
