Khrist laudansiam in kiniamkhiak chiat un(Eph.5:21).
Insung tuh huihpi vuahpi a pan i bitna ding, kholum khovot a zong i belh ding, nek leh dawnna mun, gim leh tawl hun a zong i tawlngakna ding, nopni dahni a i vai teng teng i saina ding, thu hoih thusia om hun a zong i saina tuh insung ahi. Inn khat sung ah tuh a tawm pen in leng intekpa leh inteknu chih bang a om ham tang hi. Nauvual insung ah bel pi leh pu om ban ah mou leng nih leh thum bang om in a thuah thuah a omna bang leng om hi. Insung vai hawm haksa pen pen kichi hi. Saptuam vaihawm, khotang vaihawm, mipi makai hoih leh siam mah mah tampite insung kisia om thei veve hi. Insung mi a neu alian, a tek a khang in neih ngei ngei ding a hoihte tam lou en khawm leng maw:
1. KI-IT TUAHNA: Ki-it ding thu igen chiang in i theihsa, i neihsa hi chikha mai thei hihang. I neihsa leh theihsa himahleh kibang lou, kikim lou thei hi. Inkuan khat hinapi ki-it het lou, si le uh zong kikah lou ding bang om theih hi. Nute paten tate it ding, moute leh tuten zong tekte, pite pute it ding, a ki-itte mah kideihsak, kinekngaih, hihna bang bang kipomsiam, omkhawm khawlkhawm nuam, biakkhawm phat khawm zong manpha se se hi. Ki-it tuahte lak ah kihazatna, kimuhdahna, kimullitna, kigensiatna, kilang bawlna chihte leh a hoih lou tuam tuam ten mun nei lou ahihman in nuam pah hi.
2. KIZAHTAK TUAHNA: Ji in a pasal a zahtak mah bang a, pasal in zong aji, taten a nu leh pa uh a zahtak mah bang ua nu leh pan zong tate, moute leh tute a zahtak chiang in, kizahtak tuah hong hithei uhi. Mi kizahtak tuah ichihte bel,a tekpen leh hatlou pen naupangte tanpha kisimmoh tuah om lou, kithupisim chiat chihna himok hi.Naupangten nu leh pa zahtak ding, nu leh pate thuman ding, mouten tekte zahtak ding chih chiang kia toh kim lou, nu leh pa leh tekten zong a tate leh moute uh a zah ding dan mah a hon zah chiang un KIZAHTAK TUAH i chih hong pak khe thei in hong gah khe thei hi.Ki-it tuahna leh kizahtak tuahna a nei inkuante ah Pathian in intekna la in insung nuam piangsak hi.
3. THU KIMAN TUAHNA: Kithumantuahna hiam thu kiman tuahna nei mite lak ah kinak kisel, kivuak kisat, thusia leh thuhaksa tam lou hi. Hiai insung ah tuh numei leh pasal, pitek putek, leh naupangte thu zong kingaihkhiak sak chiat chihna ahi. Huchibang mite lakah sep leh bawl zong kideidan om lou in numei pasal, a neu a lian kipanpih tuah, kihuhtuah in sem khawm liai liai uhi. Upaten paunak in “Sepkhawm nuam, nekkhawm lim” a chih uh hiai insung ah muh theih in leh phok theih a om in, kuapeuh intek tak chiat leh kimaingal tuah chiat a om in a khosa khawm diam diam uhi.
4. GIN-OMNA: Inkuan in thu nuam thukipah huai leh a hoih lam kia kituak gige lou a kal lak lak In haksatna tuam tuam, dam louh hitan hun, taksap lungjin hun, chihmoh beidotna chihte tuah hun a om tou zel zel hi. Nupa, ji leh pasal kal ah leng haksatna tuah chiang a vul mai lou a, thuchiam a gin-om, chitak,leh kuhkal taka pan ngai, thuak ngai tampi mihingte damsung thil tuah hi gige hi. Mihausaten leng a pumpelh theih louh, mipil pilna a suk veng theih louh natna chihte thuak hun a zong ji leh pasal ading, inkuan a ding, i biak Pathian a ding a gin-omna mah suah in dawi leh kau, maibi, maiba, milem pathian kiang peuh a kikhong bei mai lou ding in inkuan gin-omna toh kikem chiat ni.
5. KINGAIHDAM TUAHNA:- Tuni a i tangtel ah Khrist laudan siam in kiniamkhiak chiat un chi a sawlin i om uhi. Hiai tuh kingaihdam tuah na ding a pansan muanhuai pen, vanzat phatuam pen ding ahi. Ngaihdam a i om theihna ding in mikhial hih kitheih chetna, kisikna leh hon ngaidam dingte mai a kiniamkhiakna neih ding tuh i moh puak ahi. Pasal in ji a ngaihdam mai hilou in,ji in zong a pasal a ngaihdam ding, nu leh paten tate moute leh tute a ngaihdam mai uh hisam lou in, tate, moute leh tuten zong pi leh pu, nu leh pate a kingaihdam ding uh, insung ah kuamah a khial ngei lou leh dik gige ki om lou ahihman in, kingaihdam tuah ding ei Jesu nungzui gingu Khristiante hih ding a kilawm ahi.
Kuamah phukilak louh ding ahi. “Phulakna himhim keimah lak ding ahi, kei mah in ka thuk ding” (Heb.10:30). A tawldam huai mahmah ve maw, noumau kilak chiat un hon chi maizen leh a gimhuai ding dan, laktuak pi pi lakzoh louh bang tam ding, nupa leh inkuan bang kimohsa tuah ding, ei hon sawl lou a ken ka hih ding Toupan a chih, Toupa Pathian in hon thadawnnate muang in tawldam tak in om hithiat leng a hampha hiding hihang. Insung a kingaihdamna kipan sak thei chiat ding, saptuam leh khotang lohsawn sak chiat a, insung nuam, saptuam chidam khotang khangtou bawl khetu hiding in inkuan chih leh mimal malte Toupan na vek un hon vualzawl kim chiat ta hen.
