Mipi’n la sa, lengkhawm a Toupa phat ana manpha mahmah hi. La i sak chiangin a sakhawm teng in la te thu (lyrics) kituaktak leh ahun kibangin kigen khawm hi. Huai banah, lunglut taka la i sak chiangin, a satute’ kha, lungsim leh ngaihtuahna tengteng, huai a la thu in a genna mun leh hun ah hon pikhawm thei mawk hi. Atom a genin, la sa lenkhawmna-a tel tengteng dinmun khat, same page ah hon omsak thei hi. Hiai hi “lungsim munkhat in om un” chih laisiangthou in ahon sinsakna pen ataktaka sepkhiakna leh tangtunna hun ahihmanin manpha hi.
Huai banah, Pathian ngaihna la, Vangam ngaihna, hinkhua haksatna ziaka kah leh mau khiakna leh Jesu Kris a lametna hing nei i hihdan toh kisai la te i sak khawm chiangin, huai hunsung/ moment kia himailou in akhonung inleng kipahna thak/ tha thak hon-guan thei hi. Hiai in hinkhua a hatna leh hansanna in honthuam hi. Khat leh khat kihasuana kitunding tuah theihna manpha leh hoihpen tuh lenkhawmna hun ah hongpiang thei ana hi hi.
Kithuhilhna leh sermon hunte ah bel atangpi in agentu leh ngai khetute lungsim munkhata om khak gige theih hun vang mahmah hi.
Thugentu’n limsang leh kithalawp takin gen mahleh ngaikhetute/ audience lakah bel huai bang kithalawpna ana omvek theilou hi. Huaiziakin, thugentu leh ngaikhetute same page leh lungsim mun khat ah om khawm kha theilou suak uhi. Hiai ziak mah ahi di kithuhilhna sermon leh kisinsakna hiai zah zouzai i neihte gahsuah/ impact muh ding tawm mahmah hi.
Tunlai hipi (covid-19 pandemic) in nakpi a honnuai lai in, it leh ngaih tampite’n honna paisanta uhi. Bangchik chianga dam ding, bangzah suakta ding, a hipi hong bei leh leng hinkhua a ngeina bang thei ngei nawnlou ding, chih ngaihtuahnate’n, lungsim hon thawmhausakin, kha leh sa a, kihihhat tuah ngai, lungsim thawmhau kep ding tampi i om uhi. Hangsan taka thu vagen theihna hun leng hilou abang. Tua bangin hangsantakin gen lehang leng mi sentiment leh feeling theihpihlou, empathy neilou bat lel khak ding baihlam mahmah hi.
Covid-19 apan kivenna ding a zuihtuak dan kibawlte ziakin physical taka lasak lenkhawmna leh kithuah khawmna hun neihtheih ahikei hi. Huaiziakin, virtual a lasak lenkhawmna hunkhat organized thei le’ng lunggulhhuai ka sa hi. Lenkhawm la record i neihte toh pangin, a lunglut kuapeuhin mahni omna mun apana ana tel theih chiat ding un. Prog Coordinator khat guangin in participant te apan feedback/ sharing neih theihna di hun bawlsak le’ng unaute khat-le-khat kihihhat tuahna, kikhamuanna hun manpha hi khathei dingin lamethuai leh lunggulh huai ka sa hi. Ahi TOUPA’N, A thu bang zel in eite honpi hen!
*Hiai thugelh tom litlet honpetu heutupa, EBCC Delhi ah Vice-Chairman banah Chairman, Building & Property Maintenance Sub-Committee hihna lenlel ahi.
Thugelh dangte:
https://blog.ebccdelhi.org/nazareth-khomite-phunchiakna-mathai-1353-58-marka-64-5/
https://blog.ebccdelhi.org/2020-thupuak/
https://blog.ebccdelhi.org/kristian-aw-pilvangin-ephesa-41-16/
https://blog.ebccdelhi.org/ebcc-cd-10th-anniversary-25-26-april-2020/
