Toupa ah kipak gige un, ka chi nawn ding hi kipak un(Phil. 4:4)
Sawltak Paul in “Toupa ah kipak gige un, ka chi nawn ding hi kipak un” chi in Philippi Saptuamte lai na khak hi.Hiai thu a gelh laitak va mu thei hileng lamdang sa lou kuamah om lou ding in gintak huai hi. Hiai laithon a khak laitak in amah tuh Rome khopi a suangkulh a khum a om laitak ahi. Akhut a sikkhau, a khe a kolbun kawm a agelh ahi a kichi lai hi. Hiai a kipak gige chih pen “Toupa ah” chih a hi sese hi. Hiai muchiante leh theichiante kia ahi “Chiklai peuh in Toupa hoih hi” a chi thei te. Sihna tung ah, natna tung ah, taksap lungzinna tung ah leh vuallelh hun in leng Toupa mah hoih hi. Pathian a mi ginom Job in vangsiatna lamchiteng ah a tuak a,a taksa tung ah natna huaisetak a thuak bok hi. Job in Pathian hon gense ngei ngei ding sa in Setan in lamentakin a na galdot hi. Himahleh Job in bel Toupan a pia a, huan Toupan a lamangta hi Toupa min phat in om hen,Pathian khut ah hoih leng i mu dia, hoih lou leng i mu kei dia hia ? a chi hi. Hiai teng teng ah Job in a hihkhial kei a,hai huaitakin Pathian leng a mohsa kei hi. Job zong nang leh kei mah bang a leitung mihing sa leh sisan a bawl mah ahi.
Tutung Covid 19 sukpi nihna thuak nasa pen pen tuh Indiate ihi uhi, huchih lai in ei singtangmi tawmchihkten leng i na nak thuak mah mah uhi. Siamneltak a sut a data khawng luikhiak sawm ka hi kei. Himahleh ka gennop dan tuh i tuah haksatnate lel a, puk ding leh ding khe nawn lou ding in kingaihtuah kei ni. Hiai hipi ziak a damdawiin lutngai,damdawi inn tunnung a leng bed muh haksa, oxygen ngah ding baihlam lou lai. Damlou pen lah gim mah mah hiai bang hun a damdawi inn a sem Doctor leh Nurse i neihte tungtawn a kikem thei leh dam a potkhe thei a om tampitakte ziakin Toupa min thupi i phat uhi. Hiai ah tuh khat leh khat ki-itna leh lainatna zang in Toupan hon siam piching nuam ahi ngei ding chih muh theih hi. Hinna mansuah bang i hong om lai chiang un ngaihtuah ding a tam petmah mai, inlam a kipo dingte, Delhi a kivui dingte lai poimoh a lang lang ah lak ngai, tua bang hun in Philanthropic Organisation a heutute leh i officerte hong pang in ma i sawn thei zel ua hiai lam ah leng Toupan dinmun leh tanvoute zang in hon siam piching nuam ahi chih muh theih a om man in kipah huai ka na sa lua hi. Haksatnate i tuahte tung tawn in Toupan i minam hon siam piching hen.
Mimal leh inkuan bing a i tuah haksatna, milak a leng kup ngam louh, kuaman leng hon genpih noplouh buaina leh haksatna nei leng om theih hi lai hi. Nek leh dawn taksapna ziak bang, zat ding sum leh pai taksapna bang, nupa kal kilemlouhna bang, tate thulimlouhna ziak a buaina bang, khamtheih guihtheih a buaina bang,sum leh pai a kimawlna thanghuaite ziak a leiba tampi nei a buaina bang leh igen khak louh thildang tuam tuamte ziaka buaina tuak bang zong om theih lua ahi.
Tuni a tuak loute zong thoveng gige ding chih hituan lou, tua a buai lelte bang zong buai gige lou ding thoven hun hong om ding ahi. Buaina tung tawn in pilna behlap in teina leh kizenna toh met bawl lai leng chih deih huai lua hi. Haksatna leh buainate khovel om sung teng om tou tou ding, a tuak mi kikhek zel ding, khenkhatten a sih loh a man loh lai ua, khenkhatten pilna, teina leh kizenna a zang bang, neih behlapna, hauhna leh minthanna a zang bang om ding hi. Tuni a haksa mahmahte zing khong chiang a panpihtu muanhuai pen hong hidingte, tuni a dahna lunsun ziaka bah mah mahte zong tunung chiang a hehnemtu, tung dingtu hiding a Toupa bangkim hih thei in hon seksek bang zong hi thei hi. Kuapeuh buaina leh haksatna tuak tengtengte Toupa toh thuak khawm chiat ni.
Haksatna, buaina, natna, sihna i tuah zel zelte Toupan mi teng teng in i tuah theih vek ding ua ana bawl ahi. Pilna ziak leh hauhna ziak a hing paisuak ding, buaina leh natna tuak lou ding chih a bawl om tuam lou hi. Himahleh huchibang tuakthei mihingte huaite ziaka kingaisia a, vuallel tak a om ding in deih lou hi. Laisiangthou ah sawltak Paul zang in “Nuam gige un” chih bang “Toupa ah kipak un ka chi nawn ding hi kipak un” chi in kipak ding a hasotna i za uhi. Huaite banah “Lametna lam ah kipak unla, gimthuakna lam ah kuhkal unla, thumna lam ah thum teitei un” (Rom 12:12) ah imu uhi.
Toupa a i kipahna ding pen zaw haksatna leh buaina chiang kia hilou in tangtawn hinna, a bei nawn ngei lou ding nopna tang ding a hinna hon piak dingte ziak mah mah a leng kipah huai lua ahi. Toupa a kipak ding leh kipak thei zel ding in I tuah haksatnate uh zang in Toupan hon bawl piching chiat hen.
