Nute’ ni a hong tung nawn ta a, nu nei nawn loute ading in nute ngaihna leh phokna hong lian mah mah nawn hi. Tukum in bel Nute’ ni hong piandan, hong kipat dan a tangthu lam gen sawm lou ihi. Nu chih ding a nei nawn lou tampi omte genna pan nute ngaihhuaina, ithuaina, manphatna leh nute khazaknuai a om a tawldam huai dan a gen uh tampi izata ding uhi. Khenkhat leu leu lah tulai hun in anu ziaka mualphouna, zahlakna leh milak a zumna atuak tampi mah i om ding uhi. A pianna nu kua ahia, koi a om a hia, si hia dam hia chih nangawn theizui lou banah a nu mah in leng ka tate koi ah bang chi in a om ua chih leng kan khe mah mah lou kithei tuah ban nawn lou pawl bang i om ding uhi. Khenkhat anu dam thei mah mah lou, kepding zah don ding zah a leng kem kha thei lou leh don kha thei lou, apan gimtak leh tawl tak a etkol inkuan zong om thei lai hi. Pan zu dawn dawn inn tun chiang a ji leh tate phil phil, phun san san, a khenchiang a khut kha zawmah, nu kuhkalna jiak a taten nu chih ding nei ham ham inkuan bang ki om lai hi. Nu khenkhat kholak pawt pawt, tangval peuh toh va kingai, in tunchiang a tate sal sal, a pasal bang simmoh mah mah, nna lah sem peih lou, kichei bang uang bawl, pawt di chiang a tate kiang a sep ding tampi pi pia, a pasal leh a tate ading a puakgik tun tu, lungkhamna leh mangbatna, a nunglam, anu leh pa leh sanggamte ading a zong mitsip huai tun tun nu nei zong om theih hilai lai hi. Nang kua ta ? Na nu kua ? Na nu bang ahia ?
Pau.31:10-31 sung a numei hoih mizia, omdan gamtat, sepdan leh bawldan te sut leng ichi uhi:
1. AMAN TAM MAH MAH: Nu hoih leh ji pil sum leh suangmanphate sang a manpha zaw, aman ding zah kituat theilou, rubi suang tung pek a om ahi kichi hi. Inn leh hauhsaknate pate akipan gou luah ahi: himahleh zi pil Toupa akipan ahi(Pau.19:14). Tua ahihman in a pil mah mah zi a nei khate hampha lua uhi. Zipil pasal teng teng in kideih chiat ding himahleh a neikha lou kitam zaw ding hi.
2. APASAL TOH KAL AH: Apasal lungtang in amah a muang a, punna taksapna a nei kei, Aman a damsung teng in a pasal hoihna ding ngen hih a, a hoih lou him him a hih kei hi. Gamsung upa vaihawmte laka kongpi a apasal a tutchiang in theih tuam in om hi.
3. NASEP DANTE: Samul leh jija zong a, a khut in kilawptakin nasem hi.Khovakma tham in a thou khia a, a sikhanute kiang ah sep ding guan in a inkuante anpia hi. A khut mui khut ah a nga a, puanphah zehoih mantam akibawl a, a puansilh puanmalngat leh sandup ahi. Hatna in a kong a gak a, a khutte a hatsak hi. Lou a ngaihtuah a a lei a,a khut a gahte in grephuan a bawl hi. Puanhoih puansilh a bawl a, a zuak a sumsinmi kiang ah kawnggakte a pekhia hi. A sumsinna vante a phatuam chih a mu a, zan in a khonvak a mit kei hi. Gentheite lamah a khut a zak a; tasamte lam a sawk hi. A inkote ziakin vuk akihta kei a, a inkote teng teng puan sanau in akithuam uhi. Zi hoih leh nu hoih tuh zan in a mei a mit kei a, zingkal khovakma a thou in bangkim fel leh kizentak a koih in, nek leh dawn silh leh ten inkuan teng a ding a kiching koih in, phalbi hong tung ding ah leng buai tuan lou hi.
4. A PUANSILH: A kizepna tuh hatna leh zahtakhuaina ahi a, hun hong tung ding ah kipak ding hi. Dangkaeng khiohte, suangmantam bilbah leh zungbuhte leng a nei zou ngei ding in a gintak huai lua himahleh huaite gen lou in akizepna tuh “HATNA LEH ZAHTAKHUAINA” chih Laisiangthou ah i mu uhi.
5. A KAMPAU LEH MIT HAH: Pilna in a kam a ka a; siamna dan a lei ah a om hi.A inkote lampi hoih takin a en a, huan thadahna tanghou a ne kei. Kampau a pilvang, kamdam tak zang, a inkuante khase sak lou, itna mit hah kilawmtak toh a inkuan maban ding khodak thei nu manpha, ji hoih ahi.
6. ATATE LEH APASAL PHATNA: A tate a thou ua, amah nuamsa a chi uhi, a pasal in leng amah phat hi.Tanu tampiten hoih takin a hih ua, himahleh nang zaw a maute teng teng na khup vek hi chi in. Deihsakna khemna in a dim a, huan, kilawmna bangmah lou ahi: himahleh numei Toupa laudansiam phat in a om ding hi. A khut a gahte amah pia un; huan, kongpite ah a thil hihten amah phat hen. Zi a kipan nu hong piang a, zi hoihte mah nu hoih hong suakin, nu hoihte mah Pathian vualzawlna toh a hong dam touh zel chiang un Pi hoih hong hitou tou lai ding uhi. Tukum 2021 nute’ ni zang kha zite teng teng leh nute teng zi hoih, nu hoih, inkuan hoih Pathian inteekna inkuan leh inkuan lohching bawltu hiding a Toupa mizat hithei vek ding in Toupan hon vualzawl chiat ta hen.
