Huchi in amasa pen in thilnget thumnate, thumna himhimte, thumsaknate, kipahthu gennate, mi tengteng a ding a bawlsak ding in ka hon hasuan ahi. Kumpipate leh thuneite tengteng a ding in leng; Pathian limsak leh zahtak huai taka, kituak a khamuang a i om theihna ding in (1Tim.2:1-2).
Khovel gam zapi huap a hipi leng, India zong a tang hoih pawl leh a nak thuak mahmah gam i hi uhi. Kidalna leh kikepna lam ah lam tuamtuam ah kumpiten panla in theihtawp suah a hong pang ahihman un kipahhuai i sa hi. Mipi nautang ten zong ei omna mun chiat ah i bitna dia thu kigente zui in thumang tak in thumna toh pang in om lehang kipanpihna hoih pen hong hi ngei ding hi.
Delhi khopi ah damdawiinn kumpi a, private a tampitak om, Doctor leh Nurse zong tam, vanzat leng hoih pipi mah omna mun, i muan mahmah na mun himahleh damlou pen tam lua mahmah ahihman in, lupna kidaihlou, vanzat tuamtuam zong kidaih lou hi. Doctor om in Nurse om mah leh zat di van om kei leh kikepna, ki-etkolna deihbang theilou ahihman in poi mahmah hi. Misi koihna dim, amaute non tuahtu Ambulancete zong buai, a vuina lam leh a halna mun ah leng kivual mai mah chih pen a lungzin huaipi khat hi. India gam sung mun tuamtuam a damlou nikhat a, a nuai a sim bang om chih tuh thil mulkim huaitak ahi. Hiai bang lak a nang leh kei bit a i om Toupan hon deihna khat om himai thei ahi. Natna thuak sam himahleh gimlua lou a dam nawnte Toupa khut muanhuai in hon kepna i tante ei chiang a beisak mailou in midang gimthuakte adia thumsaktu hih sawm chiat ni maw.
THILNGET THUMNATE:- Ei gingtute hamphatna tuh i poimoh tengteng thumna toh i tutna ding mun a muanhuai leh hon chimtak ngei lou, hon limsak gige Pathian neite i hi uhi. “Ngen un piak in na om ding uh” chi’n hon chiam hi zaw mah lai hi. Huaiziakin, hamphatna leh tanvou i neihte manphatak a zang ding leh phattuampih chiat ding in kisa ni. Khovel a milian leh mihausate kiang a ngetsang in Pathian kiang mah a tai in ngen leng i lung nuamzaw ding, i tawldam zaw ding, aman poimoh a sak leh milian mihausa leh thihlhihthei mahmah-te zong zang thei lai hi. Lunglel lou in ginna tak toh thum chiat ni.
THUMSAKNATE:- Pastorte leh Upate kia hilou in michih kithumsak tuah thei chiatte i hi uhi. I taangtel in a genna ah “thilnget thumnate, thumna himhimte, thumsaknate, kipahthu gennate, mi tengteng a ding a bawlsak ding in ka hon hasuan ahi” achih man in. Sum-leh-pai, tha-leh-zung, in i kipanpih zou kei mai thei, Pathian kiang a chiklai peuh a kithumsak tuah theite ngen i hi uhi. Thumna ding in a hun sehtuam a om kei, nang lemtan hun, nang man hunhun a, na utna munmun a thum theih hilai ahi. Tulai a damloute bang va kiveh theih leng hilou, mi nautang in i va hih theih luat leng omlou ahihlai in, kalsuan khiak hetlouh a i innmun a Pathian kiang a kithumsak thei i hihman un manpha lua, huai zang siam ni. Phatuam pen, hoih pen, baihlam pen, thasen kullou, sumsen ngailou,michih hih theih.
KUMPIPATE LEH THUNEI TENGTENG A DING IN:- Kumpite leh vaihawm thuneite tuh Pathian seh ahi uh (“Mi chih a tung ua vaihawmte thuthu in om heh. Pathian thulou in kuamah vaihawm a om ngal kei ua, vaihawm mi a omte Pathian seh ahi uh” Rom 13:1). Kumpi gilou leh vaihawmtu hoihlou bang Pathian mitel Israel mite lak ah zong tam veipi na om ngeita hi. Huaite tengteng zong Pathian in a mite amah phoklou a’ a om chiang ua gawt kawm a’ a kipulakna ahi. Pathian in amah toh kichimattak leh amah deihdan toh kituak a om ding, ama huangsung a bittak leh galmuang tak a om ding a hon deih gige ahihlam i mangngilh louh ding uh ahi. Kumpi hong gitlouh chiang a thuaktu tuh a gamsung a tengte, a thuneihna nuai a omte mah ahi. Huaiziakin gam galmuang, gam khangtou leh masawn a i om theihna ding in hon pe thei Pathian kiang a mipiten thumna toh i nget ding tuh i mohpuak uh ahi. Gensiat in bawl hoihlou ding ahihman in Pathian kiang a michihte’n i thumsak zawk ding uh ahi.
Miten Pathian limsakna nei nawnlou, kizahtakna om nawnlou, kituahna om nawnlou, khamuan na chite leng om nawnlou chi’a gen bei mai ding hilou hi. Hiai tengteng bang chidan a, bang jiak a hong om nawnlou mok leh hong bei mok hiding hiam chih sut in sui khe leng en leng i hih theihna om kha ding hi. Gingtute tuh michih ading a mohpuakna liantak leh poimohtak neite i hi ua, huaite mah Pathian deihdan toh kituak a sep khiak a om chiang a gah manpha tak hong om ding tuh:- Pathian limsak leh zahtak huaitak a kituak a khamuang a om theihna ding a na hi.Thilnget thumnate, thumna himhimte, thumsaknnate, kipahthu gennate, mi tengteng a ding a bawlsak ding, kumpipate leh thunei-te tengteng a ding in leng; tua hileh Pathian limsak leh zahtak huai taka kituak a, khamuang a om thei ding ana hilim i hi uhi. Kuhkal tak leh chitaktak a thumna mah toh pang thei chiat di’n Toupan hon makaih in hon vualzawl chiat hen.
