A tatlekna ngaihdam a om a, a khelhna khuh a om in, nuam a sa hi. Toupan thulimlouhna nei a a sehlouh a, a kha a zekhemna om lou min nuam a sa hi. Sam 32:1-2
Ngaihdamna ziak a hong piang thei leh hong tung thei mihingte tung a gah hong kilang thei tampi omte lak a khen khat a nuai a bang in saulou in kikum khawm leng chi’n kong kisa leu leu ahi.
1. GAM KISIATE: Kumpi khat leh khat a kilemlouh chiang un gal hong piang in a gam mite adingin launa, thomhauna, sihna, manna tung sek hi. Gamsung nek leh tak, sum leh pai zonna, siamsinna leh thiltampi ah kiak niamna hong piang in, agah tuh kial leh taksapna, hipi lauhuai taktak ten zui zawmah lai hi.Tua banah gam leitang nangawn a vualzou gamten luah in, siah tuamtuam a chih bangbang uh a piak louh-thei-louh uh hong hilai hi. A vualzou gam ten a vuallelte sal ding peuh a man in kibawl gentheihna uang mahmah ahihman in vuallelh ding bel uthuai mahmah lou tel huai vetlou hipen hi.Salmat a om leh mi gam a saltangte dinmun khenkhatte:-
(a) Saltangte a mau ut thu hilou a, a mau deihtelna leh lunggulhte midang in a thuneih khum ahi.
(b) Suakta lou a, a mau ut leh deih bang sem thei lou, a utna mun ua a ut hun ua hoh thei lou,
(c) Mi thuneih khum, a ngaihdan uh leng gentheilou hoih leh hoihlou toh kisai a mau dot hilou.
Kumpi khat leh khat kal a Ngaihdamna hong om chiang in kilemna hong gah khia in, huai in mite galmuang sak hi. Gam galmuang leh a suakta gam tuh a sung a teng mite tawldam, khamuang, michihten a ut bangbang uh sem thei, nek zonna, sum leh pai zonna, siamsinna chihte michih in amau ut bang chiat a panla thei, huai apan gamsung khantouhna, masawnna hong om. Ngaihdamna gah kilemna in mite leh Pathian hon kilemsak. Mi Pathian toh kilemna nei peuhmahte lak ah suahtakna manpha tak om hi.
2. SUAHTAKNA: Kilemna gah tuh suahtakna ahi. Kilemna om masa loupi in saltang khat pawt mawk theilou hi, pot bang hita mawk leh zawng kimannawn ding a, a thuak ding pen na mahmah ding hi. Himahleh Ngaihdamna ziak a kilemna tungtawn a saltang khah khiak a om tuh gal muang tak in a zi leh tate, a inkuante, a khua leh veng ban ah a gam mi leh sa toh suakta tak a kipawl in launa tellou in om thei ta ding hi. Huai tuh Ngaihdamna gah Kilemna akipan hong gah khia Suahtakna thupi ahi hi.
3. ZALENNA: Kuamah thuneihkhum hilou, mahni deihtelna bangbang a om theihna gen-le-sak, sep-le-bawl om dan gamtat thilbangkim, duh leh deih tanpha suakta tak a gen ziahziah, tel ziahziah phak nopna teng pha thei, sepnop teng sem thei.
Deihtel thei ding a zalenna - telkhial louh ding in,
Sem thei ding a zalenna - Semkhiallou ding in,
Gen thei Sa thei ding zalenna - Genkhial, sa khiallou din
Mi tengteng ut leh deih tuh NOPSAK ahi, huai tun theihna ding in pilna bang, sum leh pai bang, inn leh lou bang, silh leh ten bang, nek leh dawn bang kining ching takin om leh nuam ding a chih tuh salam mit in a muhdan ahi. Himahleh, Laisiangthou in hon hilh tuh:-
“Toupa lau peuhmahte’n nuam a sa uh alampi tawnte’n”
“Lampi a mi hoihkimte’n nuam sa uh, lungtang tengteng a’ Amah zong te’n”
“A tatlekna ngaihdam a om a, a khelhna khuh a om in nuam a sa hi.Toupan thulim louhna nei a a seh louh a, a kha a zekhemna omlou min nuam a sa hi. Hiai nopsakna sum-le-pai in a lei theih louh Pathian a suak NGAIHDAMNA Gah Kilemna, Suahtakna leh Zalenna gingtu mimal kim in a tan theih vek pen, tang chiat ding in Toupan hon vualzawl hen.
