Thupatna: Kumteng a i zat zel uh Saptuam nipoimohte lak a khat ahi. Hiai ni tuh Naupangte kihel khakna leh manpha tak a akizat theihna ni uh ahihman in Naupangten leng ngaklah mahmah uhi. Nikum 2020 apan Covid 19 pandemic ziakin deih thusam tak a zat theihlouh in a hong om a, tukum 2021 ah zong kumdang, hunpaisate bang a zat theih hinai tuanlou ahihman in poi petmah i sa uhi. Himahleh i zat theih dandan leh lemtang om thei bangbang in Saptuam heutu leh makaiten a zat ding dan hon gel ua thupi leh manpha i sa uhi. Pathian saptuam tengteng Palm Sunday chibai.
Palm Sunday program zat chiang a genkhak zel a om thil khenkhat sau lou in gen khawm leng:
SABILTUNG NOU: - Palestine gamsung a vanpua bang, thauhekna mun a khawl peitu bang leh mite’n tuanna dia a zat sek uh ganhing sakol toh kibang himahleh sakolte sang a neu zaw hat mahmah van puak siam mahmah ahi a kichi. Nidanglai kumpite galdou ding a, a kuan chiang un Sakol ah tuang in kuan zel mah le uh lemna thugen ding, lemna palai a akuan chiang un Sabiltung zang zel uh kichi hi. Palm Sunday ni a Toupa Jesu tuanna sabiltung nou tuh kuamah tuan khak ngei nailouhna athak set ahi. Tulai a kizang lenna leh motor/gari chihte bang nidang a om nai hetlou ganhingte mah kizang zaw hi.
TUMNAH/TUMTEH LEH SINGSAWL: - Hiai tuh a kung toh akikhennung a leng vullou leh vuai lou a sawtpi pi om thei singteh chikhat ahihman in vualtung tuangte kipahpihna leh pahtawina dia nidang a kizang zel ahi. Toupa Jesu Jerusalem a vualzoutak a’ a lutni a bel pahtawina sang pen, deihsakna thupi pen tang in mipi tampiten ahih theih bangbang leh a neih bangbang uh toh pahtawina pia in phaltak in a paina ding lampi na ngawn ah a puante uh phah in “Toupa min a kumpipa hong pai a hampha hi, Tung nung pen ah Hosanna” chi’n ngaihtak in kikou zuazua maimah uhi. Hiai ni mipi kikouten a aw kia uh deihkhop lou in singsawl leh tumnahte tawi kawm in thupina pia in na pahtawi uhi. Tuni’n eiten bang toh dawn ding leh pahtawi ding in i na kisa ua chih kivel in, thupitak a pahtawi sawmni.
MIPI ANUNGLAM A HONZUITE LEH A MALAM A PAITE:- Mipi tuh tam mahmah ahi ding, Jerusalem a lungzing zou hial hiding hi. A thawm thupi, mipi zong tam, kikou ging zong ngaih mahmah hiding hi. Van thupina toh kizem a, vaihawm ding a sakol kang tung ah tuang a, sikchiang tawi kawm a thuneihna bukim toh hong pai ni chiang in Oliv tang nangawn hon tuankham ding hi. Huai hun chiang in tuh vualzou a Jerusalem a lut toh teh theih vual bel hi nil-nellou ding hi.
HOSANNA: - Hiai thumal poimohtak tuh a zil kholh uh hihet lou na pi mipi’n amun a genkhawm thei chih mok pen zong a lamdang leh thupi mahmah khat himok hi. Pau tuam tuam Hebrew bang, Greek bang,Latin leh Aramaic bang in na om vek mah leh a tup pen bel “Tu in koute hon hondam in” (Save us now) chih ahi. Mipite tuh amau gamsung mahmah a leng Rome kumpi thuneih khum, suakta lou leh a salam uh leng hotdam ngaite ahi uh. Israel nam sawm leh nihte tuh midangte thuneih khum a om suahtakna lunggulh mahmah a om laitak uh leng ahi. I Toupan bel Israelte kia hilou mi tengteng Pathian hehna leh thangpaihna thuak a tangtawn a mangthang dingte suahtak sak ahi a tup lian pen.
TOUPA MIN A KUMPIPA HONGPAI A HAMPHA: - Tulai India kumpi vaihawmna mun ah BJP ticket tang kha huai zang a MP hong chingte tuh a vaihawmpawl a pang kha ahihman un hampha akisa mahmah uhi. Huai hamphatna tan theihna ding in a line a om khak, a group member hih banah deihsak tu neih leh mi muantham hih tuh a poimoh ahi. Khovel vaihawmna, leitung lalna leh thuneihna lamsang mah in leng Toupa min a kumpipa hong pai nang a ding in na sang kha ta hia? Ama’ lalgam ah na khosa ta hia ? A gou luahtu hiding a hamphatna mi kuapeuh adia phal ahihlai in, kinmeng in.
GAM HONG TUNG DING DAVID GAM A HAMPHA: - Gam hampha, nam hampha, inkuan hampha leh mimal hampha chih khong deih huai, ut huai tak ahi. Gam galmuang lou, nam kithutuak lou, inkuan kilem lou tuh sihma apata gawtmun tung khin sih chiang a a sa zaw leh a mulkim huai zaw lai ding. Gam hong tung ding David gam ah bel natna leh satna, lungkham mangbatna, dahna leh kahna om nawn lou ding i Pa Pathian in diktatna toh vaihawm dia a gam in zong beini nei lou ding hi. Huai gam mi leh sa, khua leh tui hithei dingte zaw Jesu Khrist sisanpha toh a khelhna uh silsiang a omte ahi uh.Tua gam nuam leh gam hampha a teng thei chiat ding in simtu tengteng Toupa’n hon vualzawl chiat ta hen.
