Huchi in “Toupan pha a sakleh i dam dia, hiai hiam, huai hiam i hih ding” na chih ding uh ahi(Jac.4:15)
Mi teng teng in tup leh ngim, sepding, bawl ding i nei chiat uhi. Tha-it luat chiang bang in seppih dangte bang mohsa kha thei, hun hoih, hun pha hon petu leh nasem thei ding a damna hon guantu Pathian mah mah zong va lou kha man lou a om theih ahi. Kim leh kiang a kuate om, min bang sem, bang bang kisam, kisap leh poimohte koi a om chite bang zong ngaihtuah det det man lou a hamhaih theih hizaw mah lai hi. Hamhaih lou, lam haih lou leh gammang lou a i om theihna ding in khodak khia a kingaihtuah hun neih zel zel hoih ding hi. Pathian in thilsiamte a siam lai in kinoh tak in sem veng vung lou in awl awl in leh enthak kawm zel in, hoih a sak mah mah chiang in aban sun zom pan lel hi. Na tup leh ngim, na lunggulh leh deihte kintak a hong tun pah louh hun in leng buai lou in ngak hit hiat phot in. Nang sang a a hoih zaw thei Pathian in, nang a ding a hoih a honpi zong na hikha thei hi. Na lohsapna khenkhat a nung chiang a na kipahna leh na bitna hikha zong om thei lai ding hi.
TOUPAN PHA A SAKLEH:- “Tuni hiam, jingchiang hiam in, huai khopi ah i hoh ding ua, huai ah kum khat i va tam ding ua, punna i mu ding” chi a gen mihausate kiang ah Jacob in “Zingchiang a bang hong om ding a hia chih na thei kei uhi. Na hinna uh bang a hia ? Mei sawt lou kal a hong dawk a mang nawn lel bang na hi uh” chi in taihilh hi. Mihingte hinna dengdel tak tuh Pathian thu leh a khut sung a om ahi. Aman hun a chih chiang in hon lohching sak ding a, hon khosa sak ding a, hon hausak ding hi. Huaimah bang in hun a chih chiang mah in i inn leh lou, i neih leh lam, gou leh gam, sum leh paite midang kiang a tun thei a, hinna nangawn ama khut a om a hihman in hon laksak thei gige ahi. Inkuan vai, mimal, Saptuam leh khawtang tanpha in i tup leh ngimte khempeuh ah “Toupan pha a sakleh” hiai hiam huai hiam i zou ngeina ding i chih zel ding tuh Laisiangthou in hon sinsak dan ahi.
TOUPAN PHA A SAKLEH I DAM DIA:- Tomchik nuntak sung a uthuai pen leh deih huaipen tuh dam ahi.A ut mah mahte, a deih mah mahte leh a tum tak takte dam ding chih hilou hi. A pil mah mahte, a siam mah mahte, a hau mah mahte zong dam ding chi tuan lou lai hi. Dam ding leh nat ding kuaman kigen thei lou, hin ding tan leh sih hun ding zong leitung mihingte lak ah a thei ki om lou hi. Sipah ding a bel kikoih lou, sawtpi dam ding chih zong kuaman gen thei tuan lou vek. Doctor siamtak leh damdawi thei mah mah ten zong nalou ding leh silou ding a kuamah koih thei tuan lou uhi. Toupa khut a om, amah thuneihna sung a om vek hihang. Huaiziakin,Laisiangthou a i muh pen mah bang in Toupan pha a sakleh idam dia, chih mah chik laipeuh in mun kempeuh ah chi zel thei le hoih pen hi.
HIAI HIAM HUAI HIAM I HIH DING:- Lungtang kisakkholhna mihng a ah: himahleh leidawnna Toupa a kipan ahi(Pau.16:1). Pil ding, siam ding, hauh ding, let ding, lal ding leh thupi ding a ut lou leh lung gulh lou om lou ding hi. Ei tup man a piang thei, tung thei hilou ahihna hiai ah kilangmah mah hi. I tup leh ngimte khempeuh Toupa kiang ah tun in hoih honsak pih hiam chih mah dong in a deihdan toh kituak mah a sep ding. Ama min thupina ding mah deih pen, utpen leh lunggulh pen hong hi masa gige leh.
