Sum thil tengteng awnghukna ahi [Ekli 10:19] Dangka sum deihtak zaw gilou chiteng bul ahi ngal a… [1 Tim 6:10]
Tuni’n sum kichi lungsim a hong om bangbang leh Laisiangthou gen khawng toh enkhawm in saulou kikum lehang ut huai ka sa hi. Theihbatlouh hun akipan in thil kileituahna dan khat omlou a hithei lou ahihman in ‘van-le-van kikhektuah’ (barter system) in ana kipan hi. Bawng (cow) deih in amah neih lawi (buffalo) khat toh kikhekpih ding zong in bawng nei, lawi deih khat a muh khak chiang in kikhek zel uhi. Himahleh muh lemchang ngai ding ahihman in hilian thei hetlou ding hi. Hun hongpai zel in kumpi in amau gam chiat a ding sum a honbawl uhi. Nidang in a sik (coin) vuak ahi a, gik mahmah ding hi. A vomna ding bang in kawnggak dandan a sung vang in puan a khui ua, kawng (waist) mah ah a gak uhi, ke’n leng ka mukha ngei hi. Tuni chiang in a lai (paper) a bawlkhiak in hong om a, zangkhai mahmah in puak vel baihlam tuan mahmah hi.
Sum lou in kikhosa thei hetlou hi. Khopi ah dik kholdiak in ka thei hi. Singtang, zoudawn a i om lehbel a lou in ki-om thei zawdeuh a dia’m chih in om hi. Khopi ah bel pawt ding I chih phot leh sum ngai - metro, Auto, Rickshaw hiam Cab hiam lak ngai hi. Duh khat deih khat nei le’ng sumlou in kuamah in hon na pe mawklou in sum mah ngai hi. Dam leng sum, dam kei lehang le’ng sum mah hi zel hi. Phatuam in manpha mahmah hi. Sum ka neih leh bel ka deihdeih lei in ka nei thei hi.
Tua zah a sum poimoh in manpha ahihmanin miteng in deih in zong hi. A lamdang mahmah tuh mihai, mi lungsim tan phalou khat in leng sum (money/ currency) thei hi. Pe lechin hihse hetlou di’a hoihtak in kem ding hi. Number theiloute tan in a note en in a tam leh tawm bang theithei mawk uhi. Himahleh a sep theihlouhte a nuai abang in i gen lai ding.
a) Kipahna bukim a honpe thei kei: Sum in mi kuamah kipahna bukim pethei lou in, a haute’n leng deih behbeh mai hi. “Hunta” a chi omlou hi. Ka hau huntawkta hiai in lungmuanna bukim honpe kei chi a tagah-genthei leh a zawngte a ding in ka zangta ding a chi bang leng tawm mahmah in koihching phitphet uhi. Business bawlte in lah kekkek mai uhi. A damsung lungkim lou ding uh a tazen ve!
b) Sum in lungkham honnem theilou: Tuahsiat hiam sihna leh mangbatna I tuah chiang un sum-le-pai i kipia uhi. I thuakpih genkhiakna ahi. A dongtu leh a petu kipak tuaktuak in thil lamdangpi ahi. Himahleh a taktak in lungkham-sinkham hon neem taktak hetkei maimah hi. I hon zang toutou a, a tawp in a bei hi. Mi khat in sum I chih zaw ‘sum’ (sam gige) chihna ahi a chi a dik ka sa hi. Sum hau in awngphah ding a phah in lukham ding in kham mah lehang hon hehneem theikei a, ihmut leng hon pethei tuan kei hi. Lupna lei theih a ihmutna lei theih hilou chih i gen zel pen dik mahmah hi.
c) Sum in Damna honpe theilou: Khovel a damna/ hinna lei theih hileh mi hausa tampite dam thei mahmah in sih zong si ngeilou ding uhi. Himahleh tuabang ana hi kei chih gensau ngai hetlou a i theih uh ahi hi. Damdawi-inn thupi leh hoih penpente ah ki-enkol zou in damdawi man tam penpente zang zou mah uh, ahi a, damna pen sum in lei thei lou in si veve uhi.
d) Sum in bangmah hih theilou: Sum kichi laidal mai hi a, amah in bangmah hih theilou hi. Sum kichi taktak teng khat ahi a kichi. A ziak chu a dang tengteng ah note a kichi a teng khat ah bel ‘One Rupee’ a kichih ziak ahi. I zat chiang a nasem pan ahi. Zu i lei leh zu a suak di’a, antang I lei leh antang a suak ding, mel-le-puam leng a nei ngellou pi khat ahi. A phattuamna leng a zangtu zatdan a kinga ahi. Huaiziak in biakinn a I thoh chiang in Pathian khut ah Jesu min in I lan uh ahi. Pathian deihna bang a zat a hihtheihna ding ahi. Missionary vakna i pia ua, a missionary te a ding in nakpi in i thum nawn lai uhi. A ziak sum, nektak leh tenna i piak zoh chiang a Missionary pen in lohching tak a khamangthangte a na man ziahziah hilou ahi.
Thukhitna: Sum tuh a poimoh in a phatuam a i Toupa Jesu’n leng tamveipi ana gen kha hi. Hauhna leng a se kei a, sum zon pai zon leng a se kei. Himahleh Laisiangthou in gingtute a hon sinsak bel ‘deihtak louh ding’ chih ahi. Deihta i chih chiang in lungsim tengteng pia chihna ahi. Nungak-tangval kideihtakna toh kibang ahi. I deihtakte i mangngilh sung tom mahmah ding hi. Pathian adi’a mun awn nawnlou khop a sum kia ngaihtuahna min a hon neih chiang in deihta ahong himai mah hi. Dangka sum deihtak zaw gilou chiteng bul ahi. Pil vang ni.
Note: Pastor Khup in EBCC Delhi Biakna Kikhop a hun a zatna: Feb. 12, 2017 (Zinglam); thugen ngaihtheihna link: https://www.youtube.com/watch?v=kvEUpuhM6Oc
