1. A masa in i Pathian min Jehova k’on zang di’a lamdang na sa kei unla, ka zatna ziak k’on gen ding aw. Ni khat ka ngaituahna ah, hichi'n ahong suak a, min tengteng (mi aa hi'n kei aa hi'n nang aa hitaleh) Sapte, Vaite leh ei Singtangmite’n le hon sap chiang un i min mah (a tuamtuam hi tuanlou in) a hon sam chiat uhi. Bible a mi min omte etsakna di’n Mosi, Joseph, Johan leh a dangte tengteng, pau tuamtuam a paute’n le a min uh kuama’n akhek sak omlou hi a, himahleh, I Pathian min pen Sapte’n God chi ua, Thadoute’n Pakai, Luseite’n Lalpa, a chi ua; Paitete’n Pathian i chi uhi. Ni khat hi chi'n ka thum hi: “Pa, Nang min lah kou pau chiat in, ka phuak ua, midang min lah a kibang vek in ka sam chiat ua, Pa, ka hih khelh uh hia? Na min diktak honhilh in,” chi'n zanlai in ka thum hi. Ka mang hilou in Toupa’n chiangtak in ahon hilh a, “Ka min Jehova ahi” ahon chi hi. “Ei mahve maw, Pa, ka kipaklua! Laa inle a kisasa vele” ka chi a, kipak lua in, huai nung siah JEHOVA ka chita hi (Nasepte 4:12 sim in). Toupa Jesu min leng a tawp ah “a” ka behlap a, ‘Jesua’ - hondampa chihna a hithou hi. ‘Jesu’ leh ‘Jesua’ kei a ka chiandan – ‘Jesu’ pen sa suan, ‘Jesua’ pen kha suan. Hiai pen hiai tan in I gen di’a, i theihchian louh a omleh I kidong thak mai ding.
1. Joseph tuh a’ pa Jacob in a zi ittak tawh a ta ahi a, deih leng a deihsak chih a ute’n a thei ua, a heh un a haza mahmah uh chih i thei hi. Ama’n mang lamdang leh thupi mahmah ahon neilai a, a ute’n huat leng ahua mai uhi chih i thei. Kawkhuk ah vuaktang in a khia ua, a mang ahong tangtun theihna ding a lampi hong kipatna ding in a niamtheipen in ahong kipan kihkih a, a khesukte mahmah in a kai khetou nawn uhi. A kimvel teng bing himahleh a tung lam vang (open) in Pa'n mu gige - itna lampi ahi. Huai mah bang in eite le haksat-lungkhamna tampite’n hon um kimvel mahleh Joseph bang in i tung lam vang hi. Toupa lam nga in, thum le Ama’n honmu in hon hih vengsak di hi, bangkim i hoihna ding in.
2. Kumpipa innsung a lut theihna di’a kalbi khatna ton ahi a, eite leng Pa kiang i tun theihna di’a Khros a i sihna lampi i tot ngai masapen mah ahi, I hinna di’a itna lampi i tot ngai mah hi.
3. Joseph koi ah a si a? Apa lungsim, a’ lungtang ah a si hi. Eite koi ah I si ua le? Pa Jehova lungtang (lungsim) ah a ngaih tuah na ah i si khin uhi.
4. Potifer innsung hongtung a, a zi tungtawn in a khial loupi khial a ngawh in a om a, Suangkulh a khum in a om hi. Ama’n a mah dikna thu kam khat le gen lou in, amah a ding kia enlou in midangte aa ding en zaw a, a pute nupa kal a buai ding leng a vengpha hi.
5. Huai bang in Jesua in leng eite khelhna ziak in gawtna, sawina, enghouna, sihna tanpha thuak in, Amah dikna thu kam khat leng gen lou hi. Joseph hoihna tuh Jesua batna ahi. Joseph tuahte khempeuh Pa Siang phal leh a program vek ahi chih a lang chiang mahmah hi. Gen. 39: 3-4, 21-23; Joseph in Pa Siang lau a, thupipen a aneih man in Pa Siang inleng amah pahtawi in domsang a vualzawl in lamzang in a sepna khempeuh mavang in lawhching sak hi. Gen. 39 sung ah Joseph kiang ah Pa Siang a om chih 4vei tak kimu hi. Pa a kiang ah om chih suangkulh vengtupa’n a thei a, suangkulh a heutu in a koih hi. Eite kiang ah leng Pa Siang a omchih mite’n bangchi’n atheithei ding ua? I omdan, I paudan, I gamtat khawhei in.
6. Pa Siang in Joseph’ mang (dream) hilhchettheihna a pia hi. Pharoh in a mang hilhchian di’n amah a sam a, Joseph in a dawng a, huai a hihleh amah a om ahi kei a, Pa Siang apan amuh ahia, Ama’n Pharoh mang lungkimhuaitak in a dawng ding a chi a, Pa Siang thupina a pia hi. Huai bang in eite’n leng I hih peuh ah, Pa Siang thupina pia in phat ni.
7. Joseph in Kumpipa’ mang hoihtak in hilhchian hi. Pa Siang in Pharoh tungtawn in Joseph hamphatna chi 10 tak a pia hi. (Gen.41: 40-45 sim in) A tan di’a kilawm lou khop hial in, Aigupta gam tengteng tung a heutu in a bawl a, a thupi mahmah hi.
8. Eite’n leng Pa’ deihdan leh lungtuak, a diktak leh siangthou in a thu piakte mang in zui le’ng, a hehpihna ziak in I tan di’a kilawmlou, i luah di’a lawmlou, a van khawpi thupitak, sana (gold) leh suangmantam chikim a bawl i luah ding hi.
9. Pa’n kial kum a, Aigupta gam a, Joseph buh hawmtu a a zat bang in, eite leng Pa’n khalam an leh salam an hawm tu in honzang thei a, zat theih ding in om sawm chiat ni.
10. Joseph mang a tangtunna ding in, a u-te puktaw in Aigupta gam a Joseph kiang a hongtung ua, himahleh amau Joseph a thei nawnkei ua, ama’n a ute ana thei mahmah hi. Joseph ute bang in, en i theih ma pek in Pa Siang in eite honthei in ahon it a, i tangtawn hinkhua ding ahon na gelsak khinvek hi.
11. A sawt chiang in a unaute’n Joseph asi hita ding in koih ua, Joseph kiang mah ah Joseph sih thu a hilh uhi. Eite leng I pianma pek a Jesua a i sih thu Paul in Kol 3:3, Rom 6:2-3, 2 Korin 5:14 ah hon hilh khinta hi.
12. Joseph’ mang a hong tangtungta, huchi in a mai ah, a unaute hongkun uhi. Joseph in, “Noute gam en khete hi uteh” ana chi a, a maute’n, “Pu aw, hi peuhmah lou, midiktat ka hi ua, pa khat suan ngen ka hi uhi. Ka lak ua khat a si khinta” a chi uhi. Joseph kiang ah amah sih thu vagen ua, himahleh ama’n a’ u-te na thei mahmah hi. Eite’n leng zuau I gen leh thil hoihlou i hih chiang in, Pa Siang in hon nathei in hon namu gige ahi chih i theih chian chiang in zumhuai in kisuanlahhuai in, kisikhuai petmah hi.
13. A ute’n a buhpuakte uh aman lalou a, a puakkik sak chiang in a buaipih ding a chi hi. Joseph hilh bang in a ute’n buh lei di’a a kuan nawn un Benjamin a pi ua, amah ip sung ah a theihlouh kal un Joseph nou ana om hi. Hiai pen Joseph in a ute theih di’a tup khat a neih ziak a ahihsak ahi a, amah ahong kipuankhiak na di’a vanzat a zat ahih bang in.
14. Eite’n leng i theihma pek in, Setan hinna nin/ botlawh - tangtawn sihna gu - ana paai kha gige I hi mawk uhi. I pa hehna leh a huat mahmah gawtmun (hell) I lutna di himawk hi. Himahleh i Pa Siang’ itna thu a hong kipuankhiakna ahi chih i theih kipahhuai in a thu pi in a manpha lua hi. Joseph in a pu hehpihna leh deihsakna a tang a, a innkuante tung ah le heutu in a koih hi. Amah ziak in Toupa’n Pharoh nakpi’n a vualzawl a, Aiguptate neih-le-lam tengteng Joseph ziak in Pharoh aa ahong hi vekta; a thupi luah hi. Huchibang in Toupa Jesua ziak in van thupina tengteng i luah di (i tan vek di), hitamai hi a, hamphathua in a thupi lua hi. Hallelujah!
15. Joseph sanggamte’n buh man piak teitei a sawm bang un eite’n le Tangtawn Hotdamna a thawn a Pa Siang in a honpiak hinapi'n, a man piak teitei I sawm ua, ei lam a banghiam om masa ding I sa ua, ets. khelhna kisikna puaknatna, kipahna Bible tang hiam, laa hiam ei lam a hong suak di'n i buaipih ua, Ama’n huai honngiat lou hi. A thawn a honpiak, laa lam ah a lunglutte laa hongsuak om a, Bible sim tamte Bible tang hongsuak a, mi muhdan a muh tum teiteite buai uh hi.
16. Gen.48:13-20 Israel in Joseph tate nih a vualzawl deklai in, a khut sawkkalh in, a taklam khut a nauzaw Efraim lutung ah a koih a, a khut veilam a’ uzaw Manasseh lutung ah a koih hi. Joseph a lung hikei a, “Pa, huchi ding hilou ahi. Manasseh a uzaw ahi, na taklam khut amah tung ah nga in” a chi hi. Himahleh a pa’n, “Ka thei hi, ka tapa aw” a chi hi. A taklam khut pen vualzawlna thupi zaw ahi a, a pa’n a sawkkalh teitei hi. Khut kawkalh/ sawkkalh vualzawlna eite’n leng Khros a Pa vualzawlna i donna ahi, kipahhuai in a thupi lua hi. Hallelujah!
17. Jakob a hongsih leh Joseph in a ngaihdamsa hinapi'n a unaute amau kizephawk in, Joseph kiang ah mi a sawl ua, “Na pa’n a sihma in hichi’n thu a honpia hi. Joseph kiang ah hehpih in na unaute tatlekna leh a gitlouhna uh ngaidam in a chi,” chi a vagen ding mi a sawl ua a vagen uleh, Joseph a kap hial hi.
18. “Noute’n ka tung ah thil hoihloupi na hih ua himahleh Pa Siang in, hiai gam ah mi tampite damna ding a hon na sawlkhol ahizaw hi. Lau kei un, noute leh na tate uh nek-le-tak ding ka hon suktuah sak ding” a chi hi. A unaute a ding in a muanhuai chi in a kipahhuai chi mahmah hi. Himahleh hiaite sang in eite hon Khamuan Pa a muanhuai in a tawldamhuai in a kipahhuai petmah hi. Toupa’n honkem tawntung ding hi tangtawn dong in, Hallelujah. Amen.
Photo source: https://ministry-to-children.com
