Khelhna himhim a lungmuanhuai, a kipahhuai, a tawldamhuai leh khamuanhuai chih a om kei, huai nak sang in, zahlakna bang, mualphouna bang, zumna bang leh maingal louhna hontun zaw hi. Huaiziakin in khelhna ziak a lungmuang thei lou, khamuang thei lou, Pathian mai a maingal thei lou leh hin na-ngawn ning kitel in na om ngeita hia? Nang sang a khial zaw leh botlohzaw a na theihte lah lungmuang leh suakta tak a om a na muh bang leng a om hia? Mikhial hih lam bel kithei chian mahmah, ‘khelhna thaman sihna ahi’ chih chiangtak a theihna in lungmuan louhna, thawmhauna leh patauhna a hontun. Huai tan a khawlte ahi kingaihsiatna, kimohsakna/ mohkisakna khukpi a tungte. Nang leh nang na ki-it sang a leng hon itzaw tham Pathian in, na khelhna ziak a na thuak ding gawtna leh A thangpaihna mulkimhuai akipan na suahtak theihna ding in ahi A’ Tapa tang neihsun Jesu Khrist leitung a hon sawl. Kumpite thukhun palsat mite tuh dan banga mat in a om ua, a kituahpih gawtna a tung uah a tung a, khenkhatte a thubuai ven ma teng suangkul a khum in a om sek uhi. Himahleh ukil toh pang a, a khelhna thukhente mai a gen veng a hong chiang in siamtang in suangkul apan lak-khiak a om in a khelhna ngaihdam hita, dan a hen a omna teng phel hita in suakta (zalen) ahita hi.
PATHIAN TOH KILEMNA: Ngaihdam ngai mihing tuh ngaidam ding Pathian toh kal thubuai sukveng louh nei ahi chih kiphawk ngai hi. Huai thubuai sukvengna ding in a khial pen in a khelhna kisik a ngaidam theitu kiang a thuphatawi a ngaihdam a nget kul hi. Tua banga mikhial kisik leh ngaihdam ngen a thupha tawi pen in ngaidam theitu ngiat leh deih bangtak hon hih buchin chiang in ngaihdamna thu hong kipuang theita hi. Ngaihdam ngai mikhial leh ngaidam theitu Pathian kikal a kingaihdamna thupuan a hong gin toh kiton in “Ngaihdamna ziakin kilemna” a hong om theita hi. Hiai tuh ngaihdamna gah, ngaihdamna in a tup Mikhial leh Pathian kal a kilemna manpha hong hita. Hiai in khelhna man sihna leh Pathian thangpaihna gawtna mulkimhuai akipan zong hon suaktasak lai hi.
MIHINPIHTE TOH KILEMNA: Mi, Pathian toh kal hong kilem chiang in, innkuanpihte toh kal ah hong lang, kholhpih lawm-le-vual toh kal ah, tenpih innsak-innkhang toh kal ah, seppih, nekzonpihte toh kal ah honglang sek hi. A thu a gen kia hilou in omdan-gamtat ah bang, gen leh sak ah bang hong lang hi. Mahni dik kisaka, midang mohsakna, mahni kisiamtanna chihte a honghat chiang in mi toh kilem lam sang in kituahlouhna honglian in kilemna sang in kilem louhna hon tun baih mahmah hi. Mi Pathian toh kal a kilemna hoihtak neitute’n bel akim leh kiang ua midang toh kal leng lemna a tun ngap sek uhi. Huaiziakin ngaihdamna in tuh mihinpihte toh kal ah kituahna, kilemna leh kipumkhatna tun hi. Hiai bang kilemna omna ‘nupa kal’ tuh hong chidam a, tate’n nuam a sa ua, innsung a hong nuam a, zin leh lenglate’n leng nuam a honsa ua, Pathian Khasiangthou in a tenpih theih innkuan, innkuan manpha innsak-innkhang, kholhpih lawm-le-vualte adi’a vualzawlna tuntu mite en leh lamet innkuan hong hi uhi.
NGAIDAMTU ADI’A DAMNA: Nang siatna ding gen le hilou, mi na muhdah mawk a om ngei hia? Na muhdah in lah mudah na hihlam leng thei mahmah lou, a ut bangbang a gamta, a ut-ut gen, a omdan leh thugen na muh leh zakte’n nang hon hehsak, hon thangpaisak khawng in na om ngei hia? Hichi bang a na om leh amah sangin nang na gim zaw ding a, a theih louh kal in na bah in na gimgawp kha ding hi. I Toupa Jesu’n bel Amah linglukhu khusaktute, a puan suahsak a soisatute, kros a kilhden a teipi a A’ nak (rib) dawtsaktute, enghou leh chilphih a bawlsetu tengteng ading in A Pa kiang ah “a’ khelhna uh ngaidam in, a thilhih uh a thei kei ua ahi”chi in ngetsak lai hi. Ngaihdam hon ngente kia ngaidam lou in hon ngen thei loute, ngetna tang leng thei loute khawng na ngaihdam chiangin amau sang in nang tuh na kipak zaw ding a, na khalam leng a tawldam ding a, Pathian toh na kal a chidam ding hi. Hiai vualzawlna tuh mi Pathian Khasiangthou tennate kia in a lohkhiak zoh uh VUALZAWLNA manpha leh chidam ahi. Huai vualzawlna tantheina di’a poimoh tuh ngaihdam a om hilou in NGAIDAMTU apan ding chih ahi. Mi kuapeuh numei-pasal, aneu-alian in i hih theih vek uh ahi, kipan pah ni - damna ding ahiman in! Ngaihdamna nasep tuh a ngaidamtu adi’a damna ahi. I damna di’a ngaidamtu apang thei chiat ding in bangkim hihthei Toupa’n michih hon vualzawl chiat hen!
