Hiai pen Amah tung a i hangsanna ahi: Bangpeuh Amah deihlam bang a i nget leh, Ama’n a hon ngaihkhiak sak hi” (1 Jn.5:14)
Pathian gingta Khristiante kiang a Toupa honchiam hamphatna tuamtuamte lak a tel “Ngen un piak in na om ding uh” chih ahi. Hiai tuh mihing apan thuchiam ahi kei a, deihsaktu leh ittu Pathian bangkim tunga thunei, bangkim thei, leh taksap himhim neilou apan ahihman in manpha kholdiak hi. Himahleh i phawk ding leh i mangngilh louh ding a hoih tuh ei utdan leh deihdan khawng mai a hih louh ding, Amah deihdan leh hoihsak lam bang ahi hiam chih phawkkawm gige a nget di ahi.
Thumna lohchin theihna ding san tuamtuam a omtham ding hi. En bel i thum siam ziak, nuam I sak ziak khawng a lohching ding in I kingaihuah kha ahi maithei. Himahleh huchi ana hikhol kei hial hi. Jesu min a thum, muanngamna neih, Pathian deihlam toh kituak ding a nget chih khawng thumna lohchinna ding a thuguk poimoh khenkhat ahi. Kuhkal tak a ngetna, chih taktak a thumnate banah a ngaihkhiak nop leh A’ lungkimna zon poimoh gige ding hi.
AMAH DEIHLAM BANG A: Bangpeuh Amah deihlam bang a i nget leh Ama’n hon ngaihkhiak sak chih tuh Solomon thumna ah a chiang mahmah hi. Kumpi ding a Solomon hong kipat tung in Pathian kiang ah hichi’n hong thum hi - “Aw Toupa Pathian, ka pa David kiang a Na thuchiam hihtang tun in; Nang lei a leivui zah mipite kumpipa in N’on bawlta hi. Huchi’n hiai mipite ma a lut leh pawt a ka om theihna ding in pilna leh theihna honpia in, na mi hiai zahzah kua’n a hia vai a hawmsak theih ding?” a chi hi. Pathian in Solomon kiang ah - “Hichi bang lungsim na put a, sum-le-pai hauhsaknate, pahtawinate, nang hon mudahte hinnate ngen lou a, a tung ua kumpipa a k’on bawlna mite vai na hawmsak theihna ding a pilna leh theihnate n’on nget zawk ziakin, pilna leh theihna piak na hita hi. Huchi’n na ma a Kumpipate’n a na neih ngeilouh uh, nang nung a leng a neih het louh ding uh sum-le-paite, hausaknate, pahtawinate ka honpe lai ding” A chi hi (2 Kro.1: 9-12). Toupa ngaihkhiak nop thumna, Toupa dawnna a thupi e!
PATHIAN A’ MITE ADI’N A KIHONG: Mi hon-it lou leh deihsak kholloute kitheihna baihlam pen tuh “Hon limsak kei” uhi. Na thugen, na gamtat, na ngetna, na thumna bang hun bang hun a leng hon nawlkhinsak ngeilou, himahleh na nget bangbang a bel hon dawng gige lou pa tuh ‘Pathian’, nang sang a, nang adi’a hoih theizaw, na nget khak louh na poimohte leng hon pe zeltu huai tuh ahi nang a ding a chiklai peuh a leng kihong gige Pathian. Ama’n tuh “Hon sam un ka hon dawng ding, thil thupi leh thil kisel na theih ngeilouh ka hon ensak ding” (Jer. 33:3). Tua banah zong, Sam 91:15 en lai le’ng, “Ama’n honsam ding a, ka dawng ding hi; mangbat lai in a kiangah ka om ding a; amah ka humbit in ka pahtawi ding hi” chi lai ahi. Pathian limsak na I tan theihna dingin Amah deih banga hing in thum photphot ni. Amen?
I HANGSANNA: David in Goliath, amah toh teh in, lian ahi chih a thei, a theih omlai tuh ama’n a belh Pathian tuh Goliath sang a thupi zaw tham leh muanhuai zaw tham ahi chih ahi a, huai mah ahi a vualzohna. David hangsanna tuh a belh Pathian hatna, thilhihtheihna, a theihchetna ziak ahi. Daniel leh a lawm thumte’n zong Kumpipa sanga thil hihthei zaw Pathian, a theihchetna un hangsanna pia in kumpipa thupiak nial in, Pathian adingin kiptak in hihlin vual louh in, bangchiklai peuh in a ginna uh gum in dingkip tawntung ngam uhi.
Deihtakte aw, i lungtang in siamlouh a hontan kei leh Pathian lam ah i hangsan hi. A thupiakte i zuih ua, a mitmuh a thil kipahhuai i hih zel ziakin i nget peuhmah Amah akipan in i mu zel uhi (1 Jn.3: 21-22). Thumtu lohching hi ding leh TOUPA NGAIHKHIAK NOP THUMNA nei theite hizel ding in Toupa’n a misiangthoute tengteng hon vualzawl kim chiat hen!
