Tutung Krismas leh Kumthak hun lai apan lungsim ah Nazareth khomite phunchiakna thu hongsuak suak a, tamlou kikum leng I chi hi. Jesu, Nazareth khomi leh hiai khua a khanglian ahihdan Tanchin hoih teng (Mathai, Mark, Luke leh Johan) in ana record banah nungzui masate’n (Nasepte 2:22; 3:6; 4:10;6:15;10:30;22:8 leh 26:9) ah leng ana genkha uhi.
Mihing ngeina danin milian leh mi thupite pianna leh khanletna khuate’n poimohna liantak nei in, kingaisang chiat hi. US Vice President thak Ms Kamala Harris bang leng Inde suak (Indian origin) ahihkhak ziakin I gam pumpi’n kipahpih in kisaktheihpih hial uhi. Ama pianna vangkhua (ancestral village/ home) nasan mipi'n ngaina in thupisa mahmah uhi. Hiai danin Nazareth khua leng ngaihsang huai leh khaw hampha mahmah hidingin hon ngaihtuahsak thei hi. Ahihhangin, hiai khua ah Jesu’n thil lamdang tampi leh thupi hihlou ahihdan Laisiangthou Mathai 13:58 leh Marka 6:4-5 ah I mu uhi. Hiai Nazareth khoten Jesu ana ngaisang lou uhi. Bang ziak ahi ding? Ngaihtuah tham ching mahmah ka sa hi. A khanletna khua a mite’n Jesu, mihing ahihna lel a en in, amau ngaihtuahna leh hisapna chiang lel ah ana koih uhi. Messiah leh Khrist, Pathian hing tapa ahihlam phawk lou ua, gingta theilou uhi. "Hiai mi'n nasep thupi hihtheihna khawng koi a pata amuh ahia? Apa Joseph, singlembawl (Carpentar) tapa hilou ahi maw? A sanggamte leng I thei vek vele, chi'n Jesu tung ah lunghihlouhna (offended) a neita uhi." Hiai a phunchiakna (grumbling) ziakun leh Amah a gintaklouh ziak un, Nazareth khua ah Jesu’n thil lamdang thupi hihlou hi (Mathai 13:58).
Tuni'n nang leh kei hinkhua ah leng hiai bang ‘samitna leh khovel et dana thil etna’ in Jesu thilhihtheihna muhna ding hon dalkha ahi diam? Saptuam pawlpi gingtu hiai zah omkhawmna a, Pathian thilhih lamdang muh ding leh midangte kup (share) khiak ding leng om ngeilou a I omna ziak uh bang ahi di? Khovel mite kisaidan lel a kisai saptuam/ gingtu pawlpi, beh-le-phung pansan (based) kingaihnatna ei gingtute laka ahatluat ziak ahi diam? Gingtu khat-le-khat manphatna ki-etna/ kitehna di’a, dinmun leh hihna khawng zanga, alian-alalte khawng pahtawi theilel saptuam I hih ziaka, Khasiangthou nasep leh kipahna thak/ halh thaknate eilaka om theilou ahihkha hiam? Pathian thilhihtheihna gingta zoulou tang laia Abraham zi, Sarah (Gen 18:13) leh Mari sanggam nu Martha (John 11:40) te bang hilou dingin ki-enchian thak ni hang. Sarah in, "kei pitek in ta ka nei tel diam maw,” chi'n Pathian Angel ana nuihsan hi. Huaitakin, Angel in, "Toupa a dingin thil himhim ahaksa lua om ahia,” chi'n dawng hi. Huchimah bangin, Martha in Jesu thugen 'thohnawnna' om ding hi chih gingta mahleh a sanggampa Lazar sihnung ni li bang ahihtak manin hingnawn dingin gingta lou hi. Jesu'n akiangah, "na gintak leh Pathian thupina na mu ding, ka hon chi ka hia" chi'n Lazar hankhuk apan kaithou hi (Johan 11:40). Niteng hinkhua ah leng khovel etdan leh hisap dana thil etlouh theihlouh abat hun tampi om ahihmanin, hiai ziaka kimohsak theih leng ahikei maithei. Ahihhangin, Nazareth khawte ginlelhna leh phunchiakna in Pathian thilhih theihna a muhna ding uh dal kha ahih bangin nang leh kei hinkhua leh saptuam vai ah Pathian thilhihtheihna daltu ahih khak ding pilvan huai hi. Pathian in I thugelh saulou vualzawl hen!
NOTE: Thugelh tomkim honpetu Upa Ngulminthang in hun paisa ah Tuailai (BYF), Building Committee, Naupang Pawl (BCD) leh Local Committee (TBSUC) ah dinmun poimawh taktak na len kha, tu laitak in Vice-chairman (ex-officio: Chairman, B&PMSC) hihna lenlel hi. DEW/ Gamchiam adi thugelh le na pe zeuhzeuh. Lungdam hang. Hun paisa-a thugelh hon piakte sim theihna link:
https://blog.ebccdelhi.org/2020-thupuak/
https://blog.ebccdelhi.org/kristian-aw-pilvangin-ephesa-41-16/
https://blog.ebccdelhi.org/pathian-pomtak-biakna-romete-12/
https://blog.ebccdelhi.org/hangsan-takin-be-courageous/
https://blog.ebccdelhi.org/ni-47-kikulkhum-hun-bangchin-na-zang-a/
https://blog.ebccdelhi.org/bang-ziak-ahi-di/
https://blog.ebccdelhi.org/christian-pandemic/
https://blog.ebccdelhi.org/emmau-lampi-dai-leh-thawmhau-huai-ah/
