Mi, kilawmlou a hong hau bel vengkeng, amah tui loupi keuhsak di’a op bang ahi, a damlai in amah a tuansan ding ua, a tawp in mihai a hong himai ding(Jer. 17:11).
TULAI MITE: Tulai mite hau thei mahmah in ni khan phial mai uhi. Bang chidan a hong hau na hiam? Bang nasep leh hichi banga hong haukhia na hiam chi a dot ngam ding a om louh mah bang in, amau zong hon-gen ngam lou tam mahmah ding hi. “Na hauh nop leh sep ngam louh nei ke’n” chih thumal zui in sep ngam louh nei lou petmah kibangta. Pathian deih louh, Kumpi deih louh seem in hauh kisawm tamai hi. Tuamah bangin hau mahmahta, inn lianpipi, hoih taktak lam tamta, Gari suakthak a hoih taktak a tai kidem mah kibangta hi. Inn hoih tak sung ah vanzat changkang leh mantam penpente, lupna hoih, mantam taktak, puanphah, puansilh a hoih pente zong silhta. Niteng in duhduh, deihdeih lei zou ne zou zong tamta hang, tua tengteng Toupa vualzawlna, a lemsakna toh i neih i chi ngam diam? “Mi’n a tuh peuh uh huai mah at nawn ngei ding ahih ziak un”(Gal. 6:7b).
PATHIAN VUALZAWLNA I CHI NGAM DIA’M? Pau. 10:22 “Toupa vualzawlna in hauhsakna bawl a, huan huai ah lungkhamna a behlap kei hi.” Toupa vualzawlna tungtawn a hauhsakna om thei ahi chih hiai Laisiangthou in hon hilh a, a kipahhuai sawnsawn tuh, “Lungkhamna a behlap kei” chih ahi. Hau semsem, lunggim semsem a i om leh kivelphat hun, ki-etchet hun hiding hi. Inn hoih semsem, a dai (fencing) bang zong sang semsem napi a sung a giak ngam tuan lou, lupna mantam, a silh leh phahte hoih mahmah napi ihmu thei tuanlou, puanneem tak tung a aw khauh bakbak toh nupa kihou, I zawn mahmah lai a ki-it a kikawi tiptep, tua lah pasal in mi jite peuh buaipih, numei mah leng mi pasalte peuh toh buai chih khawng i tanchin uh hita. Tanchin lungkham leh mangbat huai apan Tanchin Hoih ah lut ni.
MAHNI A CHIAT:- Mahni a chiat toh ki-it kingai le’ng i thu chidam ding, i taksa pumpi dam ding,i chi I lu dam ding, ankam lim ding, ihmut nuam ding, tate naute a kha uh muang ding, a om uh nuam ding, mi lak a zong galmuang, lungnuam maitai tak a om thei ding uh. Innsak-innkhang mah toh zong kituahna, kilemna, ki-itna, kideihsakna, khang ding, kingaihnatna lian semsem ding, sum in a lei theih louh nopna, kilemna leh galmuanna hong om di’a mi hampha, Toupa pahtak, Toupa lungkimna hiding hihang.
Na hauhna, neih-le-lam ziakin mi nupa kal buai sak ke’n, na innsak-innkhang toh kal buaina tuntu in zong pang ke’n, na kepsiam kei leh na hauhna in sawt daih lou ding a, na damlai mahmah a hon tuansan ding a, na neih-le-lam na chih teng zong, na simmoh mahmah na innvengpa kiang tung ding hi. Zawnna, thuakzoh a ngaih mahmah bang in hauhna zong a kemsiam loute kiang ah sawt tham lou hi. Huchibang ahihmanin i neih teng khempeuh hon keppih ding in Pathian mah muanhuai pen gige hi.
ZOMITE: Ei Zomite hauhna paw-lah, kipukpih, kisiatpih tam mahmahta hihang. A zawnlai a mi hoih mahmahte hong hauh chiang ua hongse mawk, a zawn lai ua Pathian phawk mahmahte, hong hauh chiang ua Pathian hon nungngat san. Hau deuhdeuh Pathian toh kigamla deuhdeuh, biakna na-ngawn a tel man nawn lou, a tel thei sun a ji leh tate bang tai leh salh thuak sak gige chih bang om hi hang. Namtom hauhna, luita khan I hih mahbang a khang (generation) khat zong kihau zou lou bang hi. Hauhsak ding Pathian in honphal lou hilou hi, sum tampi neih ding, mun-le-mual, gam leh leitang zong lianpi neih ding, huangvulh ganta, gou leh gam zong i neih sawm ding uh ahi. I zondan, kepdan leh zatna ah Toupa hon neisaktu Pathian khasiatna ding, mitsipna ding, kim-le-kiangte simmohna ahih louh ding thupi hi. Dr. Billy Graham in, “Sum tuh tou (master) ding in hoih het lou a, sikha (servant) ding in bel hoih mahmah hi” na chi hi. Khat veivei sum thupi ngaih law kha in, Pathian sang a liansak zaw, nu leh pa, u leh nau sang a thupi sak zaw chih bang om thei hi. Tua pen tak ahi i biak Pathian in a deih hetlouh pen. Pathian deihlouh siatna hon tun thei ding tan ah ei gingtu Khristiante kiveng siam mahmah ni.Khang tampi in i kham ding diktatna toh sum zong in Pathian mai en ni. Ei aa lou dingte tan khak teitei sawmna ‘chet theihna dan in’ ngai nawn kei ni. Vengkeng amah tui loupi op toh I kibat louhna ding in, mi amau ading awn ngam in, ei aa ding zong i tan zahzah toh lungkim ding in Toupa’n hon vualzawl chiat hen!
