Aw Khristmas, Na Gim Daibang Thengta Hiam?

Keimah ah om gige un, kei leng noumau ah ka om gige ding. Hiang, grep gui a a om gige keileh amah in a gah theikei bang in, nou leng keimah a na om gige kei uh leh, na gah theikei ding uh. – Johan 15:4

Khristmas leh Kumthak lopna i zatzoh nung uh hun bangtan hiam i zangtou khinnawnta uh. Phone calls, social media tuamtuam a i gen leh kikup taangpite uh, Khristmas leh Kumthak lopna bang na chi zat ua, chihte i kidongtuah khiukheu uhi. Hiai i kidotna uh atangpi in salam nopsakna leh lungkimna kawk a kidot leh dawn in a om kha sek. Nekkhawm-taakkhawm, innkuan kimuhkhawm, lawm-le-vual toh hun-awl zangkhawm chih tan chiang ah i lungkim ua, anawn chiang in hunpha muzom ding hilehang tuadan mah a zat sawm zel hile kilawm hi. Tanchinhoih Matthai 2:8 & 12 ah Mipil thumte’n Jesu Khrist piang amun ah vamu ua, chibai vabuk uhi. Ahihhangin, Herod thupiak naungek tanchin kumpipa vahilh nawn ding lam ah pailou in, Pathian angel theihsak bang in amau kholam ah lamtuam chiat ah paita uh, kichi hi. E’n leng i lampi zuihte uh Khristmas ma leh nunga pialsan ding bang, zuihthak ding bang neikha ding i hi. Pialsan dingte pialsan a, totthak ding lampi hoih leh dikte tawn chiatta ni.

Ahi a, i zatsa Khristmas leh Kumthak lopna hunte pan in i khalam leh salam hinkhua ua gahkhia ding bang i mu ua? chih kidot chi leh tuakpi hizawlou ding hiam? A mu leh tang i omlai un, a mu khalou leh tang khalou omkha ding i hi.

Ahihleh, a mu khalou leh tang khaloute bangchita ding?

1. Noah apan sinlai: Noah in long (ark) hon lampat tuung in vuahmal phin nailou hi. Pathian thupiak muanna leh ginna toh amah leh a innkuante’n, mailama tuichim apan kihumbitna ding gelna in long bawl in, ana semgim in tha (labour) mahmah inleng ana lohkhia hi. Hun hongtung ding ginna mit a galmuh in huai ding in ana kisakhawl hi.
2. Joseph hinkhua apan sinlai: Aigupta gam heutulian hihna ni khat thu a amuh ahikei. Huai dinmun a tunna ding in Pathian ah ginom leh lau in ze-etnate ana dou mualsuah zou hi. Hiai banga Pathian a akibulphuh ziakin a sungkuante leh ami-le-sate’ hamphatna hong hi hi.
3. Buh-le-baal leh huanhai apan sinlai: Haichi chiin leh loubawlna ah ni khat thu in nek ding piang mawklou hi. Abukima genlouh in leng, buh-le-baal leh huanhai nek ding muhna di tan ah louvat, louhal, mangtom, haichi tuh, lou khoh leh adg.dg. te in nekkhop ding buh/ haichi piangsak pan sek hi.
4. Laisinna apan sinlai: Laizilte’ adi’n kumtawp ekzam a sangtak a pasik tup lianpen ahi. Huai di’n zan khat kia laisim in pianglou hial ding. Huai dinmun tuntheihna ding lampi tuh kumbul akipan niteng/ huntenga sinlai zohna chiangchiang ana theih lumleh tuh kumtawp ekzamna a lohchinna bulpi ahi.

A tunga thulu i gen ua pan in sinlai la in, mailam a Khristmas hongtung ding tuh kumbul akipan in adiakdiak in khalam ah kisakhawl leng a lohching Khristmas zang hi gige ding hihang. Banah, ngeina banga Khristmas hunte zang liam zel mai hilou in “thakna taktak” i salam leh khalam ah hontun mahmah ding ahi. Hunteng in i hinkhua ua Khristmas (Lemna Kumpi pian) lawm gige le’ng i mimal, i innkuan, i nam leh i gamsung hong chidam ngeingei ding ahi. Tangsamte hong pak naikei in, Khristmas paksante pak nai kei in, van ah vuklamte kimu nawn naikei mahleh TUNI apat in hongtung ding Khristmas adi’n niteng-hunteng kisakkholhna in zang chiat le’ng i na zatsa Khristmas tengteng lak ah amanpha penpen Khristmas zang hi ding i hi uh. Gah hoih a i gahtheihna ding un, niteng-hunteng in Pathian ah ki-tulut in kal sangzaw khat-khit-khat in suan gige ni hang.

…

NOTE: Thugelh Tomkim honpetu Pa Songlianthuam @Thuampi in hun paisa ah le DEW/ GC adi thugelh na pe zeuhzeuhta. Lungdam hang. Hun paisa-a thugelhte sim theihna link:

https://blog.ebccdelhi.org/pate-ni-leh-hunteng-a-ding-pate-ni-special/

https://blog.ebccdelhi.org/vualzawlna-leh-hamsia/

https://blog.ebccdelhi.org/khasiangthou-luahtheih-dia-kikhumtuamna-quarantine-for-holy-spirit/

https://blog.ebccdelhi.org/setdet-ding-damna-lifelong-immunity-and-beyond/

https://blog.ebccdelhi.org/ruth-laibu-apan-sinlai/

https://blog.ebccdelhi.org/khangkhelhna-ahi-diam/

https://blog.ebccdelhi.org/christmas-christ-must-khrist-alou-theilou/

https://blog.ebccdelhi.org/baa-baa-black-sheep/

https://blog.ebccdelhi.org/natna-hii-leng-thak-sinlai-poimoh/