Huan hichi ahi a, Angelte’n van a apaisan tak un, Belamchingte’n, “Tun ah Bethlehem khopha in pai lehang, Toupa’n thu a hon hilh hongtung i en ding uh” a kichi uhi (Lk. 2:15).
BETHLEHEM: Bethlehem min masa tuh Ephrath ahi, Palestine gamsung a om, Jerusalem apan a
Simlam Kilometer sawm vel a gamla, David khopi, asuan leh pakte tenna ahi. Ephrath min khiakna tuh gah pha/chi pha chihna ahi. Bethlehem bel tanghou-inn chihna ahi. Hiai san tuh ahi Mari leh Joseph leng khovel kisimpina a min gelh ding a hong kuanna khua uh. Huai a atam sung un nau a honnei ua khualbuk a atak louh ziak un gan anpiakna kuangsung ah a sial uhi. Nang Bethlehem Ephratha Juda gam a sang tampite lak a tel di’n neu tawk lechin leng, nang akipan in Israelte vaihawmpa ding kei di’n ahong pawt ding; a hong pawtna sawtpi, tanglai nite akipan ahi (Mika 5:2) chi a Jawlneite’n ana gen uh.
Huai gam mah ah Belamchingte a om ua, gamlak ah zan in a belam uh a ching uhi. Huaite tuh khopi thawm za ban lou leh a nna ua buaitak a om lai un Toupa Angel khat a kiang uah a hong ding a, Toupa thupina in a kim uh a tanvak a, Bethlehem khua a naungek Jesu a pian thu, huai naungek dinmun, ahihna leh amau a ding a chiamtehna bang kim theih khelhlouh ding a chiang in a hilhta hi.
Angel in van a paisan takin Belamputen thupukna hoihtak honbawl in, a belamte uh nusia in Angel tungtawn a Toupa thu a zak uh en ding in Bethlehem lam a honzuan pahngal uhi. Belampute bel a pilna ua thil suikhe ding ahi kei ua, a hauhna ua thil leikhe ding leng ahi kei maithei uh, himahleh Toupa’n amaute kiang ah van Angel leh van mipi honte zang in mit a muhtheih, bil a zak theih chiang takin a vagen hi. Mipilte’n bel suahlam ah a’ Aksi ka mu ua amah bedi’a hongpai ka hi uh chi in ‘Toupa nasep’ tuh pilna zang in hon suutkhia uhi. Tukum Khristmas ah nang kiang ah Toupa’n bang zang in hon houpih in na thei a, na pilna zang a suut khiak theih na nei hia? Na nasepna mun ah Toupa Kha vehna chih theih ding don na nei hia? Tua bang teng toh tu a, tawldam mai in om kei ni Belampute bang in dingkhia in Jesu mahmah toh kituahna, kitheihna, leh kichimatna nei ding in a biakinn ah pai zel ni.
BETHLEHEM KHOPHA A PAITE: Huchi’n a pai mengmeng ua, Mari toh, Joseph toh gan anpiakna kuangA naungek lum a vamu uhi. Bethlehem pha ban lou a Khristmas khawng lawmlawm bang hih theih ahihman in kiveelchian zel le’ng uthuai. Bethlehem khopha a paite’n bel Mari toh Joseph a muh banuah gan anpiakna kuang sung a naungek Jesu, mi tengteng Hondampa ding leng a mukhawm uhi. A vamuh un naungek tanchin Angel in a hilh tuh a genthangta uhi. Khristmas program a bei chiang a, a thu lah bei, a la lah bei, gen sawn ding leng om nawn lou.. chih tuh mi tamzawte dinmun ahisek hi. Belamchingte’n zaw a vamuh uh naungek tanchin mi tampi lak leh mun tampi a genthang uh chih ahi. (Now when they see Him, they made widely known the saying which was told them concerning this child. Lk.2 :17). Tukum ngial gen ding tawm mahmah mai thei, himahleh innkuan bing a zat kum ahihman in manpha khat sak zawk in om hi. Kumdang a bel Khristmas zingkal a innkuan a kibuai, pawl khat tuanvai, pawlkhat a tuamtuam a buai ankuang nangawn umkhawm thei lou a om. Naupangte bang leng zalen, nu-le-pa lah I kikhop bana lengkhawm nuam lai I hih chi’a, kibuai chiat.
BETHLEHEM KHOPHA A PAITE THUGEN: A za peuhmah in Belamchingte thugen lamdang a sa mahmah uhi. A pilna thu uh hilou, a hauhna thu uh hilou, a siamna thu uh leng hisam lou, Toupa akipan Angel thugen taksang a kal a vasuan ua leh, Angel in a gen bang geih a gan ankuang sung a naungek lum a vamuh chiang un kipaktak in Pathian pahtawi leh phat kawm a hong kiklamte thugen tuh a za peuhmah in lamdang a sa uh. Khovel pilna toh gen ahikei a, kamsiam man leh kamzol man a gen leng ahi samkei a, Pathian apan thusuak za a Jesu muchiante thugen tuh mite’n lamdang a sa ua, ngaihnophuai leng a sa sek uhi. Nang leh kei, hiipi lauhuai kal a dam khosuak a Khristmas bang zang thei, koisan chiang pai ding in Toupa’n honphut in na thei a? I thugente mite ading a ninhuai, chimtakhuai leh ningkitelhuai khawng ahi maimah khak ding kivel in, bawl dik theih lai in kibawl dik chiat ni.
Behlehem khaw’ pha-a pai a kiknawnte dinmun – Ava muh uh naungek tanchin angel in a hilh a genthangta uh. Aza peuhmah in a thugen uh lamdang a sa mahmah uh. Angel in a hilh bang ngei a bangkim a muh ua a zak ziak un Pathian pahtawi leh phat kawm zel in a kiknawnta uhi. Khristmas zang zou i sepna mun chiat uah bang toh I kik nawn ua? Bangchibang omdan leh bang chibang melput toh I kiknawn ua? Belampute mah bang a Pathian pahtawi leh phat kawm zel, i na/ sepna ua kiknawn thei chiat ding in Toupa Khasiangthou pawlna michih tung ah hong tungta hen!
