Gam-le-Nam adia Chi leh Meivak

Matthai 5:13-16

Tu kha I thupi, gam-le-nam leh khotang vai a Pathian' pomtak biakpiakna chih ahihbang in, khristian taktak in i gam-le-nam leh khotang chidamna leh vakna tun ngeingei ding ahihdan gen khawm leng I chi hi. I tangtel a I muh bang in, I Toupa Jesu'n a nungzuite chi leh meivak in tehkhin hi. Khristiante tuh a siatna mun a damna, a mialna mun a vakna i hih ding ahi.

I. CHI BANG A AL KHRISTIAN IN GAM-LE-NAM DAMSAK DING HI

Chi in mihingte khangthu ah poimohna lianpi nei hi. Tanglai Israelte' hun in thillat leh kithoihna a vanzat poimoh ahi. Pathian leh Israelte kikal, khat leh kal a kilawmtakna tanpha a kichiamna thukhun a ginomna leh muanhuaina ensak hi. Tuaban ah, a sethei leh muatthei thilte kepbitna (preservative) leh damdawi (disinfectant) bang in leng na kizang hi. Hiai bang a chi zatna leh a poimohna thei in, Jesu'n a nungzuite kiang ah, amaute leitung ading a a poimohna uh, gen hi. Ahihleh chii bang a tehkhin ihihna ah, gam leh

1. Chi in chituamna (distinctive character) nei hi: Hiai in, khristian piangthakte'n chituamna leh lamdanna i neih ding ahi, chih hon sinsak hi (cf. 2 Kor. 6:17-18; Rome 12:2). Tulaitak a i gam, nam leh khotang in a poimoh tuh chituam ngam khristian taktak ahi. Toupa deihbang a gam-le-nam leh politiks vai a siangthou leh diktattak a pangngam; tua bang a panla mite hanthawn a, thumsak a, tawisang ngam mimal i poimoh hi.
2. Chi tuh kembittu (preservative) leh damsaktu (disinfectant) ahi: Khristian gam, nambup a khristian chi a kiminloh ihihlai in siatlam leh damlouhlam manoh i bang hi! Chi bang a aseding lai vengbittu, a damsaktu ding a lamet Khristian, nang koi ah na om a?Ahihkei leh, siatna leh damlouhna piangsaktu hikha maimah ihiam? Kivel ni.
3. Chi in a sung a luh (penetrate) hi: I khristianna in I gamsung leh namsung, akilkawmteng a luh ding ahi. A siatna mun pen leh a damlouhna mun pen zong a luhkhiak a, damna a tutding ahi. Chituam ding leh tuam om ding I chih chiang in khelhna leh nitna lak a bualte itlou a taisan ding chihna hilou hi. Amaute adia vualzawlna leh damna taktak ihihtheihna ding ei pen a siangthou, chi bang a zattak damdoi ihih ding gen kihizaw hi. Huaiziak in, a pawlam a om a, tutmun a gengen in omzia a nei taktak kei hi. Chi bang a al a, sungluh Khristian ihih ding kisam hi.
4. Chi in a sukkhakte limsak-taisak hi: Nekthil I bawl a, bangkim kisohkhinna pi, chi a kisoh kei leh a limna taktak dawk theilou hi. Ei khristiante tuh chi bang a, nopna, kipahna, lemna leh damna tuntu ihih ding uh ahi. Khristiante tenna gam leh namsung a nop kei leh koilak nuam ding ahia? ? Khristian society a lemna leh kithutuahna a omkei leh koi a omta ding? Piangthak, Khrist nungzuite ziak a a hoih leh Pathian' deihlam khantouhna a om theih keileh, I gam leh nam in lametna dang a neikei hi! Mangthang ding a himai hi! (Mark 9:50; Gal. 5:22-23). I gam-le-nam leh khotang' lametna leh poimohpen zaw, chi bang a al khristian ahi.

II. KHRISTIAN TAKTAK IN A GAM LEH NAM AH VAKNA TUN DING

Khristian piangthakte tuh vaktate ihi (1 Thes. 5:5). Jesu Khrist zuite mial ah pailou in hinna vak nei uhi (Jn.8:12); Vak gah tuh - hoihna, diktatna leh thutak ahi (Eph. 5:8-9). Huaiziak in, hiai bang Khristian diktak in tuh -

1. Mialna a tanvak ding hi: “Noute leitung ading in meivak na hi uhi…tangtung a khopi om selguuk theih hilou…kuaman meivak loh a khuhkhum kei, meivak mung tung ah kikoih, innsung a omte khempeuh vak pia.” Amah ah hinna a om a, tua hinna mihingte vakna ahi. Tua vak miallak ah a hong tang a, mial in tua vak a theikhe zoukei hi (Jn. 1:5). Philipi bung 2:15 in, “tulai khang gilou laka genbaanglou leh poikhoihlou, Pathian tate na hong hihtheihna ding un tua bang in sem un (Toupa' deihlam sem un). Leitung ah, amaute lak a aksi bang a taang na hi uhi' na chi hi.
2. Mial thilhihte a phoulak hi. Lai Siangthou in, “Gahsuah neilou mial nasepte ah panna nei kei unla, tuate phoulak zaw un. Ahang bel, thumangloute'n a sim a ahihte uh, a gen nangawn a zumhuai hi. Ahihhangin, a kiphoulak khempeuh vaak in a latsak ahi. Ahang bel, bangteng muh theih suaksak vaak hiven. Tua bang ahih man ahi: Nang ihmu aw, khanglou inla misite lak apan thoukhia in, tuachi-in, na tung ah Khrist hong taang ding hi” chi'n a nagen ah (Eph. 5:11- 14). Unaute aw, i khristianna in mial thilhihte a phoulak hiam? a zumzel zaw hiam??
3. Vak in hon humbit hi: Mial thilhihtheihna nasep zohna ding a galvan hoihpen tuh vak ahi. Lai Siangthou in, “huailou in, tu bang hun ahia chih na thei ua, ihmu khanloh a hun mahmahta chih na thei uh. Tu'n zaw i gintak tu'ng lai sang in i hotdamna a nai zaw ta ngal a; Zan a bei dekdekta a, khua a vak dekta hi; huaiziak in mial a thil hihte pai in vak thuam in i kithuam ding uh (Rom. 13:11-12). Zan mial bang a siatna leh lungzinna in bawm lai in, I gammial tanvak thei omsun tuh khristian mimalte ihi.

Thukhitna: I gam-le-nam leh khotang ading a chi leh meivak bang a damna leh vakna tuntu hiding in hanchiam

Photo by Blake Cheek at www.unsplash.com