November 17, 2019 ni a Huweii province, China a om, mi kum 55 a upa khat apan hiai Covid-19 natna muhkhiak ahihnung tu November 17, 2020 in hiai Covid-19 hiipi (pandemic) kum khat chingta an bangtan daihlai ding hiam chih kuama’n gen theilou hi. Ahia, om hun nei peuhmah in bei hun leng honnei di’a, hongbei ding ahi, chih bel lamethuai mahmah hi. Hiai natna tuh it leh ngaih tampite’n ana thuak mualsuah zou lou in thupina gam ah hon paisanta ua, poi I sa petmah hi. Huan, bangzah hiamte’n tu’n I thuak lellel ua, Pathian hihdamna ngaak leh lamen in I om uhi. Hiai hiipi in khovel pumpi a tuama, bitlou kisak ziaka lauhna in mi tampite lungsim a luah hi. Khat-le-khat baihlam taka kilohsawntheih ahihmanin, mimal khat-le-khat leng kimullit tuah a, kigamla leh kikaka muktuamna (mask) toh niteng khosak ding tuh khawtang paidan (social norms) hong suakta mai hi. Lungkiakna, lauhna leh thawmhau huai khovel ah ki-om hi. Hiai bang ahihmani in, chiamnuih thutakin "the year 2020 should have been cancelled" ana chi hial uhi. Hiai bang hunah ei gingtute’n bang thupuak I mu/I ngah ua?
Khatna ah, khat-le-khat kihihhat tuah leh kihasuan tuaha om hun ahi (Hebrute 10:24-25). Thil hoih hiha khat-le-khat kitokthou ding, nite ahoihlouh ziaka lungkia leh beidonga om mailou a kihasuantuah leh kikhamuantuah hun ahi. Hunhaksa palkhak pen ‘vangsiat ziak ahi’ chimai lou a; midangte hasuantu, panpih ngaite panpihtu hih sawm chiat ding ahi. Nidanga thumna a nana phawk khak ngeilouhte adinga thumsakna hun, sum-le-pai tasamte panpiha, lungkia leh bahte hasuan a kitunding-tuahna hun ahi.
Nihna ah, Toupa Pathian toh tona paikhawm hun ahi (Exodus 3:7-12). Tanglai a Israelte pitu Mosi in haksatna (hiipi leng, kial, natna leh mipite phunchiakna/ rebel) tampi atuah lai in, "Toupa, na ompihna toh n’on tonsak kei ding leh hiai ban hon paisak nawn ke’n" chi'n ana ngen hi. Zahngaitu, hehpihna a dim Pathian in bangchi'n adawnga? "Ka ompihna nang toh aton dinga, khawlna k’on pe ding” (Exodus 33:14) chi'n Ana dawng hi. Toupa toh tona pai hun ahi. Kumdang leh hun dang inleng mihing hinkhua lauhthawnghuai leh chiangkuanlouhna a dim (uncertainty) ahih gige lai in, abiktakin tukum 2020 chiangkuanglou khol bang sakin om hi. Hiai bang hunah Toupa toh ton in pai ni hang. 'Jesu toh na ton chia’n lauh ding na neilou, Ton inla hangtakin masuan…', chih tuh 2020 thupuak khat hi mahmah kasa hi.
Thumna ah, hinkhua-a thiltuah leh ahongtungte peuhmah Pathian thupina kilatna ding ahih banah gospel puanzakna ding ahi. "Unaute aw, tu in ka tunga thil hongtungte Tanchinhoih a khanna di’a hongtung uh ahi chih na theih uh ka deih hi" (Philipi 1:12). Kim-le-kianga thiltungte leh eimah hinkhua a tuah leh tante Pathian thutak ahihna kilatna ding, gospel puanzakna ding leh Pathian toh naisem a kithuahna ding ahi. Hinkhua a I tuahte tungtawna Pathian in ei a A tup theih sawm ding ahi. Pathian thupina kilatna ding leh Amah a muanna ngak ding Pathian in A deih ahi (Exodus 14:4-18, 31 simthak ni). "Kawnggak (belt) mi kawnga abelh gige bangin.... ka mite ka minthanna, ka kilawmna leh ka thupina ahonghih theihna ding ua ka kianga belh gige dinga ka bawl lah ahi ngal ua (Jeremia 13:11). "A kianga om ding leh thugen di’a A sawlkhiak dingin 12te (Jesu'n) A teelkhia hi" (Mark 3:14). Pathian toh naihsema kithuaha, Amah belh gige hun ahi.
Kisoisel hun ahikei a, kihasot hun ahi. Kihuat hun ahikei a, ki-it leh deihsaktuah hun ahi. Ki-etsan hun ahikeia, kikhotuah hun ahi. Pathian gamlatsan hun ahi kei, Amah belh gige hun ahi. Kum dang tengteng sangin leng khat-le-khat kihasuan leh kitundintuah hun hizaw mahmah lou hiam ka chi ahi. Huaiziakin, thilhih, thugen, kampau leh omdan ah midangte hihliam leh lungkesak tu hilou ding in pilvang ni. "Whatever happens, conduct yourselves in a manner worthy of the gospel of Christ" (Phillipi1:27).
Simtute teng Toupa akipan khamuanna leh A’ deihdan theithei dingin Khasiangthou in hon ompih chiat hen aw. Ka kipak. Toupa thupha!
[Tulai hun tawh kituak mahmah, 2020 THUPUAK hon-gelh Vice-Chairman, TBSUC (Upa Ngulminthang) tung ah lungdam lua hang. A gelhtu leh simtute TOUPA’N I kisap bang thupha hong petekta hen!]
